बाबुआमाले छोरीलाई भिरबाट खसाए

प्रदीप मेन्याङ्बो

धरान — सुनसरीको बराहक्षेत्र दर्शन गर्न जाने भनेर फकाउँदै ल्याएर आफ्नै बाबुआमाले अरूलाई लगाएर छोरीलाई भिरबाट खसालिदिएका छन् ।

खसालिएकी एक भारतीय युवती ज्योतिकुमारी यादवको उद्धारपछि बीपी कोइराला स्वास्थ्य विज्ञान प्रतिष्ठानमा उपचार भइरहेको छ । गत बिहीबार उनको उद्धार गरिएको थियो ।
आफूले चाहेको युवकसँग विवाह गर्न लागेको थाहा पाएपछि बाबुआमाले मान्छे लगाएर बराहक्षेत्र मन्दिरनजिकको सप्तकोसी भिरमा खसालेका थिए । टाउको, घाँटी र छातीमा चोट लागेकी उनको अवस्था सामान्य बन्दै गएको बिपी प्रतिष्ठानस्थित प्रहरी बिटका इन्चार्ज तिलक गिरीले बताए ।
ज्योतिको हत्या गर्न लगाउने आमा ममता यादव, बाबु कुञ्जनकुमार यादव र हजुरबुबाका भाइ पर्ने प्रदीपकुमार यादव र सँगै आएका मनोजकुमार यादवलाई पक्राउ गरी इलाका प्रहरी कार्यालय महेन्द्रनगरमा राखिएको छ । घटनाको अनुसन्धान गर्दा बाबुआमाले नै हत्या गराउन खोजेको देखिएकाले पक्राउ परेका चारजनालाई ज्यान मार्ने उद्योगअन्तर्गत मुद्दा दर्ता गरिने इप्रका महेन्द्रनगरका प्रहरी निरीक्षक राम ढकालले बताए । बाबु कुञ्जनकुमार र आमा ममताले मान्छे लगाएर भिरमा खसालेको बिहारस्थित मध्यपुरा-२१ बस्ने २२ वर्षीया ज्योतिले बताइन् । उनको प्रतिष्ठानको आकस्मिक कक्षमा उपचार भइरहेको छ । प्रहरीले छोरीको हत्या गर्न चाहने बाबु, आमा, हजुरबुबा र हत्या गर्न ल्याएका युवालाई प्रहरीले पक्राउ गरेको छ । गत बिहीबार साँझ एकान्त ठाउँ पुगेपछि बाबुआमा र हजुरबुबाको इसारामा भाडामा ल्याइएका युवाले आफ्नो मुख थुनेर घाँटी थिचेको र त्यसपछि मुन्टो बटारेर भीरबाट सप्तकोसीतिर हुत्याइदिएको बताइन् ।
प्रतिष्ठानमा उपचाररत ज्योतिका अनुसार बाबु कुञ्जनकुमार र आमा ममताले दर्शन गराउन भन्दै बराहक्षेत्र मन्दिर ल्याएपछि हजुरबुबाका भाइ पर्ने प्रदीपकुमारले मनोजकुमार यादव नामका युवालाई लिएर आए । बराहक्षेत्र दर्शन गरिसकेपछि उनका बाबुआमाले गाडीमा नजाने भन्दै हिँडाउँदै ल्याएको उनले बताइन् ।
उनले भनिन्, 'भिरैभिर र तल सप्तकोसी बगेको एकान्त स्थानमा पुगेपछि मनोजले मुख थुनेर घाँटी समाते पनि बाबु, आमा र हजुरबुबा नदेखेझैं गरी सरासर हिँडे । मलाई मार्न मान्छे लगाएका रहेछन्, मलाई मरी भनेर फालेका थिए, तर भीरमा अल्भिmएर बाँचें ।' उनका अनुसार आफ्नै खुसीले विवाह गर्न चाहेको बाबुआमाले थाहापाएपछि परिवारका अन्य सदस्य उनीसँग पहिलादेखि नै रिसाएका थिए । उनले भनिन्, 'आफूलाई जन्मदिने बाबुआमाले मान्छे लगाएर मार्न लगाउँछन् भन्ने मैले कल्पनासमेत गरेकी थिइनँ ।' मरी भनेर यादव परिवारले छाडेपछि भिरमा ज्यान बचाइदिन गुहार मागिरहेकी युवतीको आवाज सुनेपछि स्थानीय गाउँलेले उद्धार गरेका थिए । उनको उपचार प्रतिष्ठानमा भइरहेको थाहा पाएर सुनसरीको भोक्राहा-५ मा रहेका मामा लक्ष्मण यादव प्रतिष्ठान आइपुगेका छन् । उनले भान्जीलाई आफ्नै घरमा राख्ने बताए ।


 
 
 

प्रकाशित : पुस १५, २०७१ ११:१०
प्रतिक्रिया
पठाउनुहोस्

गर्भपतन गराउने बढे

कान्तिपुर संवाददाता

विराटनगर — परिवार नियोजन संघ मोरङमा सुरक्षित गर्भपतन गराउने महिला बढेका छन् । नौ महिना अवधिमा २ सय ६३ ले गर्भपतन गराएको संघले जनायो ।

कार्यालय प्रमुख सुरेश प्रधानका अनुसार तीमध्ये ११ जना २० वर्षमुनिका युवती छन् । वर्षको त्यही अवधिमा २ सय ५३ ले यो सेवा लिएका थिए । 'गर्भपतन गराउनेमा केही अविवाहित पनि भएको पाइएको छ' प्रधानले भने, 'यो अवधिमा २० देखि २४ वर्षभित्रका ६९ जनाले र २५ वर्ष माथिका १ सय ८३ महिलाले सुरक्षित गर्भपतन गराएका छन् । विराटनगरमा सुरक्षित गर्भपतन गराउन संघसहित कोसी अञ्चल अस्पताल, मेरी स्टोप क्लिनिक र न्यूरो अस्पताललाई अनुमति छ ।

प्रकाशित : पुस १५, २०७१ ११:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT