तीनदिने सेलो फेस्टिभल

कान्तिपुर संवाददाता

काठमाडौँ — मौलिक खाना, पुस्तक अनि नाटक । यी सबै एकैथलोमा उपलब्ध गराउँदै छ, तामाङ सेलो नाट्य महोत्सव–२०७५ ले ।

नेपाल संगीत तथा नाट्य प्रज्ञा प्रतिष्ठान र सेलो फाउन्डेसनले आउँदो असार २ गतेदेखि तीनदिने महोत्सव गर्न लागेका हुन् । महोत्सवमा तामाङ समुदायको मौलिक खाना, पुस्तक प्रदर्शनीसहित पाँच नाटक प्रस्तुत हुने बताइएको छ ।

बत्तिसपुतलीस्थित शिल्पी थिएटरमा हुने महोत्सवमा भाषाविद् अमृत योञ्जन तामाङको लेखन एवं निशा पाख्रिन र सन्तोष तामाङको निर्देशन रहेको नाटक ‘स्यालगार’, फूलमान वलको लेखन र सोनाम तामाङको निर्देशन रहेको ‘सोनाम ग्याल्मो’, वसन्त चौधरीको लेखन र शान्ति वाइबाको निर्देशन रहेको कविता नाटक ‘ङाला फ्रेङबा धोङला टा’, ल्हाप्साङ कर्पो म्युजिकको तर्फबाट रोशन फयुबाको संयोजन रहेको लोक नाटक ‘लालिमो’, सत्यदेवी काठमाडौं सम्पर्क समाजका तर्फबाट मारनेन वाइबाले संयोजन गरेको लोकनाटक ‘ताचेमा’ छनोटमा परेको प्रतिष्ठानका रंगमञ्च विभाग प्रमुख एवं प्राज्ञ पुष्कर गुरुङले जनाए ।

‘सेलोलाई तामाङ समुदायको सांस्कृतिक पहिचान मानिन्छ । यसभित्र गायन र नृत्य मात्रै नभई लोक नाटक र संस्कृतिका अनेक रंगमञ्चीय आयाम लुकेका हुन्छन्,’ गुरुङले भने, ‘तिनै आयाम उजागर गर्ने ध्येयसाथ फेस्टिभल गर्न लागेका हौं ।’ राणा शासनको जग बसाल्ने तत्कालीन श्री ३ जंगबहादुरको मृत्युसम्बन्धी तामाङ समुदायमा प्रचलित मिथमा आधारित नाटक ‘सोनाम ग्याल्मो’ मार्फत पहिलो पटक तामाङ नायिका चाँदनी मोक्तान, गायकहरू फूलकुमार बमजन र सुसन लामा रंगमञ्चमा देखिँदै छन् । ‘लामो समयदेखि नाटकमा आउन चाहन्थें,’ दर्जनभन्दा बढी तामाङ फिल्म खेलेकी चाँदनीले भनिन्, ‘बल्ल समय मिल्यो ।’ महोत्सवमा तामाङ र नेपाली दुवै भाषामा नाटक मञ्चन गरिने सेलो फाउन्डेसनका अध्यक्ष जगत तामाङले जनाए ।

Yamaha

प्रकाशित : जेष्ठ २५, २०७५ ११:४८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

युद्ध बिर्सेर सिर्जना

काशीराम डाँगी

रोल्पा — विगतको सशस्त्र द्वन्द्वलाई बिर्साउँदै शान्तिका लागि रोल्पा नगरपालिकाले गरेको बृहत् साहित्य सम्मेलन राष्ट्रिय कविता प्रतियोगिता आयोजना, युद्ध साहित्यको चर्चा, गजल गायनलगायतका कार्यक्रमसहित समापन भएको छ ।

सम्मेलनमा सहभागीहरू युद्ध र त्रास बिर्सेर सिर्जनामा रमाए । स्रष्टाहरूलाई साथ दिए ।

राष्ट्रिय कविता प्रतियोगितामा लमजुङका प्रज्वल अधिकारी पहिलो, अछामका लक्ष्मण संगम दोस्रो र सिन्धुपाल्चोकका सुरेश बुढाथोकी ‘फकिर’ तेस्रो भए । सोलुखुम्बुका गणेशप्रसाद खतिवडा र काठमाडौंका अमी प्रिन्सले सान्त्वना पुरस्कार पाए । पहिलो, दोस्रो र तेस्रो हुनेले क्रमश: ३५ हजार, २५ हजार र २० हजार रुपैयाँ प्राप्त गरे । सान्त्वना स्थान पाएका कविद्वयलाई १०/१० हजार रुपैयाँ दिइयो । सम्मेलनमा बाबु त्रिपाठीको टोलीले गजल सुनाएको थियो ।

तीनदिने सम्मेलन एवं राष्ट्रिय कविता प्रतियोगिताका निर्णायकमा त्रिभुवन विश्वविद्यालयका प्रा. केशव सुवेदी, नेपाल प्रज्ञा प्रतिष्ठानका पूर्वप्राज्ञ उत्तमकृष्ण मजगैंया र प्रज्ञासभा सदस्य वियोगी बुढाथोकी थिए । आयोजकले कवि नारायणप्रसाद शर्मा, भूपिन, प्रोल्लास सिन्धुलीय, हेम प्रभासलगायत एक दर्जन कविलाई कविता सुनाउन विशेष निम्तो गरेको थियो । रोल्पाबाटै सुरु भई करिब दशकसम्म सञ्चालित माओवादी सशस्त्र द्वन्द्वसँग जोडिएको ‘युद्ध साहित्य र सिर्जनामा युद्धको प्रभाव’ बारे सम्मेलनमा चर्चा गरियो । रोल्पाका साहित्यकारद्वय नवीन विभास र क्षितिज मगरले तत्कालीन सशस्त्र द्वन्द्वबाटै साहित्य सिर्जनामा अभिप्रेरित भई लागेको खुलासा गरे । युद्ध साहित्यका बारेमा प्रवचन गर्न सम्मेलनमा पाहुनाका रूपमा निम्त्याइएका दाङका कवि यज्ञबहादुर डाँगीले तत्कालीन सशस्त्र द्वन्द्वले युद्ध साहित्य सिर्जनामा मलजल गरेको बताए ।

प्रकाशित : जेष्ठ २५, २०७५ ११:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT