त्रिवि मानवशास्त्र विभाग प्रमुखमा चेम्जोङ
काठमाडौँ — त्रिभुवन विश्वविद्यालय मानवशास्त्र केन्द्रीय विभाग प्रमुखमा उपप्राध्यापक डा. डम्बर चेम्जोङ नियुक्त भएका छन् ।
निवर्तमान विभाग प्रमुख प्राध्यापक लयप्रसाद उप्रेतीले राजीनामा गरेपछि बुधबार चेम्जोङलाई नियुक्त गरेको उपकुलपति तीर्थराज खनियाले बताए ।
त्रिवि र अमेरिकी सहयोग नियोग (युएसएआईडी) बीच भएको सम्झौता अनुसारको परियोजनालाई ‘विभाग प्रमुखले दुरुपयोग गरेको’ विद्यार्थी र शिक्षकले आरोप लगाएपछि उप्रेतीले राजीनामा गरेका थिए ।
त्रिविमा २३ वर्षदेखि प्राध्यापनरत मानवशास्त्री चेम्जोङ यसअघि सरकारले पहिलो संविधानसभा अन्तर्गतको ‘निर्वाचन क्षेत्र निर्धारण आयोग’ (२०६३) र ‘निर्वाचन क्षेत्र निर्धारण आयोग’ (२०७०) का सदस्य थिए ।
साथै सरकारले नै गठन गरेको संस्कृति मन्त्रालयअन्तर्गत अभौतिक सांस्कृतिक परिषदको समेत सदस्य थिए ।
प्रकाशित : भाद्र ७, २०७५ २०:१४