विद्यालयलाई महिलामैत्री शौचालय हस्तान्तरण
काठमाडौँ — आयंका फाउण्डेशनले धनुषा जिल्लाका तीन विद्यालयमा महिलामैत्री शौचालय हस्तान्तरण गरेको छ ।
फाउण्डेशनले ती विद्यालयमा दुईवटा शौचालय, फल दिने ९ वटा बोटबिरुवा, २ थान डस्टबिन, सय थान ब्याग र ५० थान पुनः प्रयोग गर्न मिल्ने प्याड पनि वितरण गरेको छ । धनुषाको जनता मावि, हरिपुर निगाहपुर मावि र आधारभूत माविमा उक्त सामग्री वितरण गरिएको फाउण्डेसनले जारी गरेको विज्ञप्तीमा जनाइएको छ ।
फाउण्डेशनका अध्यक्ष एवं कलाकार प्रियंका कार्की, कोषाध्यक्ष आयुष्मान देशराज जोशी एवं सल्लाहकार सरोज ओलीको उपस्थितिमा भएको कार्यक्रममा महिनावारी सम्बन्धि सचेतना अभिवृद्धि पनि गरिएको छ ।
प्रियंका र आयुष्मानलाई खानेपानी मन्त्रालयले महिनावारी स्वच्छता दूतमा नियुक्त गरेको थियो । फाउण्डेशनलाई शौचालय निर्माणमा पञ्चकन्या ग्रुपले सहयोग गरेको छ भने प्याड वितरणमा केजीएच ग्रुपले सहयोग गरेको हो ।
प्रकाशित : फाल्गुन २१, २०७५ १७:३२