टंकलाई अर्को स्वर्ण

कान्तिपुर संवाददाता

काठमाडौँ — मध्यमाञ्चलका एमेच्योर गल्फर टंकबहादुर कार्कीले पूर्वाञ्चलका शुक्रबहादुर राईलाई सात स्ट्रोकले पछाडि पार्दै शुक्रबार राखेप ओपन गल्फ च्याम्पियनसिपको व्यक्तिगत स्पर्धामा पनि उपाधि जितेका छन् ।

यसअघि टिम स्पर्धामा सफलता हात पारेका टंकले रोयल नेपाल गल्फ क्लब (आरएनजीसी) मा भएको ५४ होलको च्याम्पियनसिपमा कुल तीन ओभर २ सय ७ स्कोर गरे । उनले अन्तिम दिन दुई ओभर ७० को कार्ड बनाए भने सुरुका दुई दिन ७१ र ६६ शट खेलेका थिए । धरानस्थित निर्वाणा कन्ट्री क्लबका शुक्रले अन्तिम चरणमा १ अन्डर ६७ स्कोर गर्दै समग्रमा आठ ओभर २ सय १२ को कार्ड बनाएर रजत पदक हात पारे । उनले सुरुका दुई दिन ७१ र ७४ शट खेलेका थिए ।
मध्यमाञ्चलका सुवास घिसिङले १८ ओभर २ सय २२ स्कोरसहित कांस्य प्राप्त गरे । पहिलो दिन ७ ओभर ७६ खेलेका उनले दोस्रोमा १ ओभर ६९ र तेस्रो चरणमा नौ ओभर ७७ स्कोर गरेका थिए । विपिन तामाङ (१९ ओभर २ सय २३) चौथोमा रहे भने सुन्दर राई (२१ ओभर २ सय २५) शीर्ष पाँचमा अटाए ।
अघिल्लो दिन टंक, सुवास, सन्दीप तामाङ समावेश मध्यमाञ्चलले टिम स्पर्धामा स्वर्ण जितेको थियो । शुक्र, युवराज भुजेल र सुन्दर राई रहेको पूर्वाञ्चल टिमले रजत हात पारेको हो ।

प्रकाशित : पुस २९, २०७४ ०६:५४
प्रतिक्रिया
पठाउनुहोस्

पुलिसको वर्चस्व कायमै

कान्तिपुर संवाददाता

काठमाडौँ — नेपाल पुलिस क्लबले ३९ औं हुआवे राष्ट्रिय टेबलटेनिसको डबल्सतर्फ महिला र पुरुष विधाको दुवै उपाधि हात पारेको छ । विभागीय वर्चस्व कायम राख्दै राखेप च्याम्पियनसिपअन्तर्गत जारी प्रतियोगितामा पुलिसका युगल जोडीले दुवै विधामा आर्मीका खेलाडीलाई पराजित गरे ।

महिला डबल्समा प्रतिस्पर्धा गर्दै पुलिसका एलिना महर्जन र नविता श्रेष्ठ ।

महिलातर्फ साबिक विजेता आर्मीका रविना महर्जन र स्वेच्छा नेम्वाङको जोडीलाई पराजित गर्दै पुलिसका नविता श्रेष्ठ र एलिना महर्जनले उपाधि हात पारे । पहिलो दुई सेट ११–४, १२–१० ले जितेका आर्मीका खेलाडीले त्यसपछि लय गुमाएका थिए । नविता र एलिनाको जोडीले उत्कृष्ट पुनरागमन गर्दै अन्तिम तीन सेटमा
११–७, १२–१०, ११–५ को अग्रता लिए । चौथो सेटमा ९–७ ले पछाडि परेको स्थितिमा म्याच प्वाइन्ट बचाउँदै पुलिसको जोडी उपाधि जित्न सफल रह्यो ।

फाइनलमा आर्मीविरुद्ध खेल्दै पुलिसकै स्यान्टु श्रेष्ठ र दीप साउन । तस्बिर : एएनटीटीए

लैनचौरस्थित राष्ट्रिय टेबल टेनिस प्रशिक्षण केन्द्रमा पुरुषतर्फ पुलिसका स्यान्टु श्रेष्ठ र दीप साउनले आर्मीका नारायण घिमिरे र कृष्ण थापामगरलाई पराजित गर्दै उपाधि जिते । एकतर्फी फाइनलमा ११–३, ११–२, ११–५ को सोझो सेटमा जित हात पार्दै स्यान्टु र दीपको जोडीले पुलिसको दबदबा कायम राख्यो । त्यसअघि सेमिफाइनलमा उनीहरूको जोडीले एपीएफका पुरुषोत्तम बज्राचार्य र अमरबहादुर मल्ललाई पाखा लगायो । साबिक विजेता पुलिसका प्रदीप रोक्का र विनेश खनियाँलाई पराजित गरेका आर्मीका कृष्ण र नारायणले फाइनलमा अपेक्षाकृत प्रदर्शन गर्न सकेनन् । एकलतर्फ विभागीय टोलीका शीर्ष खेलाडी क्वाटरफाइनलमा स्थान बनाउन सफल रहेका छन् । पुरुषतर्फ शीर्ष वरीयताका स्यान्टु श्रेष्ठ, दीप साउन, अमरबहादुर मल्ल लगायतका खेलाडी अगाडि बढे भने महिलातर्फ नविता श्रेष्ठ, एलिना महर्जन, स्वेच्छा नेम्वाङ र रविना महर्जन पनि अगाडि बढेका छन् । सम्पूर्ण खेल शनिबार सकिने छ ।

प्रकाशित : पुस २९, २०७४ ०६:५४
पूरा पढ्नुहोस्
प्रतिक्रिया
पठाउनुहोस्