नामिबियासँग नेपालको पहिलो खेल

माघ ७, २०७४कान्तिपुर संवाददाता

काठमाडौँ — नेपालले आयोजक नामिबियासँग विश्व क्रिकेट लिग डिभिजन २ को पहिलो खेल खेल्ने भएको छ । नामिबिया क्रिकेटको आधिकारिक वेबसाइटमा फेब्रुअरी ६ देखि १६ सम्म हुने प्रतियोगिताको खेलतालिका सार्वजनिक गरिएको छ । त्यसअनुसार नेपालले घरेलु टोलीसँग फेब्रुअरी ८ मा पहिलो खेल खेल्नेछ ।

डिभिजन २ मा नामिबिया र नेपालसहित केन्या, यूएई, ओमान र क्यानडाले प्रतिस्पर्धा गर्दै छन् । प्रतियोगिताको शीर्ष दुई टोली मार्चमा जिम्बावेमा हुने विश्वकप छनोटमा पुग्ने छन् । नेपालले ओमानसँग फेब्रुअरी ९ मा दोस्रो खेल खेल्नेछ । त्यस्तै ११ मा यूएई, १२ मा केन्या र १४ मा क्यानडासँग खेल्ने छ । नेपालले २०१५ मा नामिबियामै डिभिजन २ खेलेको थियो, जसमा नेपाल चौथो भएको थियो ।