रूसी साँठगाँठबारे ट्रम्पसँग सोधपुछ गरिने

वासिङटन — अमेरिकी राष्ट्रपतीय निर्वाचनमा रूससँगको साँठगाँठबारे अनुसन्धान गरिरहेको समितिले राष्ट्रपति डोनाल्ड ट्रम्पसँग सोधपुछ गर्ने भएको छ । अमेरिकी अखबार वासिङ्टन पोस्टका अनुसार ट्रम्पसँग आगामी साता छानबिन गरिनेछ ।

सन् २०१६ मा भएको चुनावी अभियानमा रूसी संलग्नताबारे रोबर्ट मुलर नेतृत्वको विशेष टोलीले छानबिन गरिरहेको छ । उनी पूर्व एफबीआई प्रमुख हुन् । बीबीसीका अनुसार उक्त टोलीमा संलग्न अनुसन्धानकर्ताहरूले ट्रम्पका वकिलहरूसँग कुराकानी गरिरहेको जनाएका छन् ।

ट्रम्पका वकिल जोन डोउड र जे सेकुलोसँगको भेटमा मुलरले ट्रमपसँग सोधपुछ गरिने बताएका थिए । अखबारका अनुसार उनीहरूबीच गत डिसेम्बरमा भेट भएको थियो । ट्रम्पनिकट स्रोत उद्धृत गर्दै अखबारले उल्लेख गरेको छ– ‘यो मुद्दा कसैले सोचेको भन्दा तीव्र रूपमा अगाडि बढिरहेको छ ।’ पोस्टले भने उनीहरूबीच पुन: कुराकानी गर्ने सहमति भएको जनाएको छ । भेटमा ट्रम्पका वकिलहरूले मुलरसँग उनीमाथि खुला प्रकारका प्रश्न सोध्न दिन अनिच्छुक रहेको बताएका थिए ।

वासिङ्टन पोस्ट र एनबीसीका अनुसार उनीहरूले ट्रम्पसँग लिखित प्रश्नको जवाफ लिन भने अनुमति दिन सकिने बताए । एनबीसीले कुराकानीमा संलग्न ३ जनालाई उद्धृत गर्दै मुलर र वकिलबीचको वार्ता ‘प्रारम्भिक र जारी रहेको’ उल्लेख गरेको छ । ट्रम्पका वकिलले भने उक्त समाचारबारे कुनै प्रतिक्रिया दिएनन् । तर उनीहरूले राष्ट्रपति कार्यालय ह्वाइटहाउसले रोबर्ट मुलरसँग आवश्यक समन्वय गरिरहेको जनाए । यसबारे मुलरका प्रवक्ताले प्रतिक्रिया दिन अस्वीकार गरे । छानबिन समितिद्वारा चुनावी अभियानका कतिपय सदस्यमाथि मुद्दा दायर गरिएपछि ट्रम्प र मुलरबीच तनाव बढेको छ । राष्ट्रपति ट्रम्प र रूसी अधिकारीले चुनावी अभियानमा कुनै साँठगाँठ नभएको दाबी गर्दै आएका छन् । यसअघि ट्रम्पले उक्त मुद्दा छानबिन गरिरहेका एफबीआई निर्देशक जेम्स कोमीलाई बर्खास्त गरेका थिए । त्यसलगत्तै अमेरिकी न्याय विभागले मुद्दाको अनुसन्धानका लागि रोबर्ट मुलरलाई नियुक्त गरेको हो ।

प्रकाशित : पुस २६, २०७४ ०८:१४
ADVERTISEMENT
प्रतिक्रिया
पठाउनुहोस्

साहित्य र कला सँगसँगै 

नेपाल प्रज्ञा प्रतिष्ठानमा सुरु चित्रकला र पुस्तक प्रदर्शनीमा राखिएका पेन्टिङहरू ।
कान्तिपुर संवाददाता

काठमाडौँ — २९६ औं पृथ्वी जयन्ती तथा राष्ट्रिय एकता दिवसको अवसर पारेर मंगलबारदेखि कमलादीस्थित प्रज्ञा प्रतिष्ठानको प्रतिमा कक्षमा चित्रकला र पुस्तक प्रदर्शनी सुरु भएको छ । नेपाल प्रज्ञा प्रतिष्ठानका कुलपति गंगाप्रसाद उप्रेती र नेपाल ललितकला प्रज्ञा प्रतिष्ठानकी कुलपति रागिनी उपाध्यायले प्रदर्शनीको उद्घाटन गरे ।

रागिनीले ‘कला र साहित्य एउटै रूखको हाँगाबिँगा भएको’ बताइन् । भनिन्, ‘साहित्यमा शब्दका माध्यमले आफ्ना भावना पोखिन्छ भने कलामा चित्रका माध्यमबाट । पृथ्वी जयन्तीलाई एकताको प्रतीकको रूपमा मान्दै कलाकृति र पुस्तक एकै ठाउँमा प्रदर्शनीमा राखिएको हो ।’ कुलपति उप्रेतीले पृथ्वी जयन्तीलाई बिदाको रूपमा मात्र नमनाएर केही उपलब्धिमूलक काम गरेर मनाउनका लागि प्रदर्शनी गरेको बताए ।

दुबईमा सेफमा मास्टर्स गर्दै गरेका सन्तोष ढुंगाना प्रदर्शनीमा भेटिए । उनले पहिले पनि प्रज्ञाबाट प्रकाशित पुस्तकहरू किन्ने गरेका रहेछन् । ‘यहाँ बौद्धिक पाठकहरूले पढ्ने विषयवस्तुका पुस्तकहरू पाइन्छन्, जुन बजारमा हतपत पाइँदैनन्,’ उनले भने, ‘यहाँका समालोचना, भाषा, साहित्य, संस्कृति, अनुवादका पुस्तकहरू थेसिस र विद्यावारिधिको लागि समेत उपयोगी हुन सक्छन् ।’

प्रदर्शनीमा ३ रुपैयाँदेखि १४ सय रुपैयाँसम्मका पुस्तक राखिएको संयोजक सुधीर ढुंगेलले जानकारी दिए । प्रदर्शनीमा कथा, कविता, उपन्यास, निबन्ध, नियात्रालगायत विधाका पुस्तकहरू १५ देखि ६० प्रतिशतसम्म छुटमा बिक्रीमा राखिएका छन् । प्रदर्शनीमा नयाँ प्रकाशनका रूपमा ‘पारिजातका प्रतिनिधि कथाहरू’, ‘प्रज्ञा आधुनिक नेपाली कथा’, ‘प्रज्ञा समकालीन नेपाली कविता विमर्श’, ‘पौरस्त्य दर्शनमा भौतिकवाद’, ‘नेपाली जातीय संस्कार’, ‘दर्शनावली’ लगायत छन् ।

प्रदर्शनीमा २८ पेन्टिङ प्रदर्शित छन् । गत वर्ष ललितकला प्रज्ञा प्रतिष्ठानको चित्रकला विभागले पूर्व, पश्चिम र मध्यमा गरी तीन ठाउँमा कला कार्यशाला गरेकोबाट छानिएका पेन्टिङहरू प्रदर्शनीमा राखिएको विभाग प्रमुख एवं प्राज्ञ रमेश श्रेष्ठले बताए । ‘मोफसलका आर्टिस्टहरूका पेन्टिङ हुन्,’ उनले भने, ‘पृथ्वीनारायण शाहको एकीकरणले सबैलाई एकताको सूत्रमा बाँधे जस्तै नेपालभरिका पेन्टिङहरू एकै ठाउँमा प्रदर्शनीमा राखेका हौँ ।’
पृथ्वी जयन्ती एवं राष्ट्रिय एकता दिवस प्रज्ञा प्रतिष्ठानलगायत, नेपाल संगीत तथा नाटय प्रज्ञा प्रतिष्ठान, नेपाल ललितकला प्रज्ञा प्रतिष्ठान, सांस्कृतिक संस्थान, पृथ्वी जयन्ती तथा राष्ट्रिय एकता दिवस नागरिक समारोह समिति, नेपाल इतिहास संघ, गोरखा सेवा समाज, लायन्स क्लब, उज्यालो नेपाललगायतका संघसंस्थाको संलग्नतामा मनाइँदै गरेको हो ।

कार्यक्रमअन्तर्गत बिहीबार नेपाल प्रज्ञा प्रतिष्ठानको परिसरबाट ब्यान्डबाजा र पञ्चैबाजासहित प्रभातफेरी गर्दै सिंहदरबार पश्चिम ढोकास्थित पृथ्वीनारायण शाहको प्रतिमामा माल्यार्पण गर्दै प्रज्ञा परिसरमा आई कोणसभा गरेर विसर्जन गर्ने कार्यक्रम रहेको प्रतिष्ठानले जनाएको छ ।
प्रदर्शनी माघ १० सम्म चल्नेछ ।

प्रकाशित : पुस २६, २०७४ ०८:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT