रेणु अधिकारी

पितृसत्ता भन्नेबित्तिकै पुरुषको शासन चल्ने सत्ता बुझिन्छ । अहिलेसम्म पितृसत्ता नै महिलामाथि हुने हिंसाका लागि जिम्मेवार छ भनेर बुझ्ने पनि गरिएको छ । देशभर महिलामाथि भएका हिंसाका कुरा गर्दा करिब ८५ प्रतिशत महिला पुरुषबाटै पीडित छन् । गहिरो गरी हेर्ने हो भने यो पितृसत्ता समग्रमा समानताविरोधी, सामाजिक न्यायमा आधारित संरचनाद्वेषी भन्‍यो भने अत्युक्ति हुँदैन ।

१९१० अगस्ट २६–२७ मा कोपनहेगनमा भएको समाजवादी महिलाको दोस्रो सम्मेलनमा जर्मन समाजवादी महिला क्लारा जेट्किन र लुइस जेइट्सको अगुवाइमा महिला दिवसको सुरुवात भएको हो । अन्तर्राष्ट्रिय तहमै रहेका महिलाको स्थितिलाई सम्बोधन गर्न साझा महिला दिवस आवश्यक छ भन्ने आवश्यकता बोध गरी उनीहरूले ल्याएको प्रस्तावलाई सम्मेलनले अनुमोदन गर्‍यो ।