लेखाले परामर्शदाता नियुक्तिमाथि छानबिन गर्ने

कान्तिपुर संवाददाता

काठमाडौं — संसद्को सार्वजनिक लेखा समितिले जलाशययुक्त नलसिंगाड जलविद्युत् आयोजनाको विस्तृत आयोजना प्रतिवेदन (डीपीआर) तयार पार्न छनोट गरिएको परामर्शदाता नियुक्तिमा अनियमितता भएको आशंका व्यक्त गर्दै छानबिन गर्ने भएको छ ।

समितिको आइतबारको बैठकले अनियमितता गरी आयोजनाको परामर्शदाता छनोट भएको आशंकामा छानबिन गर्न उपसमिति गठन गर्ने निर्णय गरेको छ । समितिले सोमबार उपसमिति गठन गर्नेछ ।

सदस्यहरूले नलसिंहगाड जलविद्युत् आयोजना विकास समितिले ४ सय १० मेगावाट क्षमताको आयोजनाको डीपीआर तयार गर्न परामर्शदाता छनोट प्रक्रियाको मूल्यांकन नै खोटपूर्ण रहेको उल्लेख गर्दै छानबिन हुनुपर्ने आवाज उठाएपछि बैठकले उपसमिति गठन गर्ने निर्णय गरेको हो ।
सदस्यहरूले डीपीआर तयार पार्न कम रकम प्रस्ताव गरेको परामर्शदातालाई नदिई बढी प्रस्ताव गर्नेलाई दिइएको, आर्थिक अपचलन गरिएको, योग्यता नपुगेका व्यक्तिलाई विज्ञका रूपमा नियुक्त गरिएको दाबी गरेका थिए । 

आयोजना विकास समितिले १ अर्ब १९ करोड ९१ लाख रुपैयाँ प्रस्ताव गरेको स्मेक जेभीलाई डीपीआरको काम दिएको छ । समितिले ८६ करोड ६५ लाख रुपैयाँ प्रस्ताव गरेको एएफ कन्सल्टलाई परामर्श नियुक्त नगरी किन स्मेक जेभीलाई छनोट गरेको भन्ने प्रश्न सदस्यहरूले गरेका थिए ।
समितिका सदस्यहरू विकास लम्साल, योगेन्द्र चौधरी, मोहनबहादुर बस्नेत, रामहरि खतिवडालगायतले परामर्शदाता छनोट प्रक्रियामा आयोजना विकास समितिका कार्यकारी निर्देशकलगायतको नियतमै खोट रहेको दाबी गरेका थिए । 

न्यून रकम प्रस्ताव गर्नेलाई दिनुपर्ने सार्वजनिक खरिद ऐन तथा नियमावलीको प्रावधानविपरीत बढी प्रस्ताव गर्ने परामर्शदातालाई छनोट गरेर राष्ट्रिय स्रोतको दुरुपयोग गरिएको दाबीसमेत उनीहरूको थियो । उनीहरूले आयोजनाको काम निरन्तर अगाडि बढाउन र अनियमिततामा संलग्नमाथि कारबाही गर्न समितिले छानबिन गर्नुपर्ने धारणा राखेका थिए ।

समितिमा आयोजना विकास समितिका कार्यकारी निर्देशक मोतीबहादुर कुँवरले परामर्शदाता छनोट प्रक्रियामा सार्वजनिक खरिद ऐन तथा नियमावलीविपरीत कुनै कार्य नभएको दाबी गरेका थिए । 

उनले ऐन र नियमावलीबमोजिम प्रस्तावक कम्पनीहरूको आर्थिक र प्राविधिक प्रस्ताव मूल्यांकन गरी परामर्शदाता छनोट गरिएको बताए । उनले समितिले गर्ने छानबिनमा विकास समिति र आफूले सहयोग गर्ने आश्वासनसमेत दिएका थिए ।

प्रकाशित : चैत्र ७, २०७३ ०९:२७
प्रतिक्रिया
पठाउनुहोस्

६८ करोड ७७ लाखको सेयर कारोबार

कान्तिपुर संवाददाता

काठमाडौं — अघिल्लो दिनको तुलनामा आइतबार सेयर बजार परिसूचक नेप्से २४.८५ अंकले बढेर १ हजार ३ सय ८२.१९ मा उक्लेको छ । यो करिब २ प्रतिशतको वृद्धि हो । कारोबारमा आएका सबै समूहको परिसूचक बढेपछि समग्र नेप्से उच्च अंकले बढेको हो । तीमध्ये पनि बिमा, जलविद्युत् र होटल समूहको परिसूचक धेरै अंकले बढे ।

बिमा समूहको परिसूचक ५.८७, जलविद्युत्को ३.३८ र होटलको ३.३५ प्रतिशतले बढे । यसैगरी ‘अन्य’ समूहको परिसूचक १.४१ प्रतिशत, विकास बैंकको १.१७ प्रतिशत, वित्त कम्पनीको १.१ प्रतिशत, बैंकिङको १ प्रतिशत र उत्पादन तथा प्रशोधनको ०.१२ प्रतिशतले उकालो लागे ।

कारोबारमा आएकामध्ये १ सय ३ कम्पनीको सेयर मूल्य बढ्यो, २० कम्पनीको घट्यो र १३ कम्पनीको सेयर मूल्य स्थिर रह्यो । ५ हजार १ सय १५ पटकको कारोबारबाट १ सय ३६ कम्पनीका १४ लाख ४८ हजार कित्ता सेयर किनबेच भए । ती किनबेचबाट ६८ करोड ७७ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम करिब १५ करोड रुपैयाँले बढी हो । योसँगै बजार पुँजीकरण (सेयर बजारको आकार) १५ खर्ब ६७ अर्ब रुपैयाँ कायम भएको छ ।

नेप्से बढेपछि सेन्सेटिभ ‘क’ वर्गका कम्पनीको सेयर कारोबार मापक) परिसूचक १.८८ प्रतिशतले र सेन्सेटिभ फ्लोट (कारोबारमा रहेका सबै कम्पनीको सेयर कारोबार मापक) परिसूचक १.७९ प्रतिशतले बढे ।

स्ट्यान्डर्ड चार्टर्डको एफपीओ १२ गुणा बढी
काठमाडौं (कास)– स्ट्यान्डर्ड चार्टर्ड बैंकले निष्कासन गरेको एफपीओ (थप निष्कासन) मा झन्डै १२ गुणा बढी आवेदन परेको छ । आइतबारसम्मको प्रारम्भिक तथ्यांकका आधारमा ११ दशमलव ५७ गुणा बढी आवेदन परेको सेयर रजिस्ट्रार एवं बिक्री प्रबन्धक एनएमबी क्यापिटलले जनाएको छ ।

बैंकले ३ अर्ब ३० करोड रुपैयाँ बराबरको २५ लाख ५८ हजार १ सय ४० कित्ता एफपीओ निष्कासन गरेको थियो । अंकित मूल्य सय रुपैयाँमा १ हजार १ सय ९० रुपैयाँ थप गरी प्रतिकित्ता १ हजार २ सय ९० रुपैयाँमा सेयर निष्कासन गरिएको थियो । चैत १ देखि ४ गतेसम्म खुला गरिएको उक्त सेयरका लागि ३८ अर्ब २० करोड ९४ लाख रुपैयाँ बराबरको आवेदन परेको हो ।

एफपीओमा २ लाख २३ हजार आवदेन परेका थिए । तीमध्ये कागजी (भौतिक) रूपमा १ लाख ३८ हजार र आश्वामार्फत करिब ८५ हजार वटा आवेदन परेको जनाइएको छ । निष्कासन भएको मितिले बढीमा ६० दिनभित्र सेयर बाँडफाँट गरिसक्नुपर्ने कानुनी व्यवस्था छ ।

प्रकाशित : चैत्र ७, २०७३ ०९:२७
पूरा पढ्नुहोस्
प्रतिक्रिया
पठाउनुहोस्