बोर्डका कर्मचारीलाई सेयर लगानीमा कडाइ

कान्तिपुर संवाददाता

काठमाडौं — नेपाल धितोपत्र बोर्डले आफ्ना कर्मचारीहरूलाई सेयरमा लगानी गर्न कडाइ गरेको छ । बोर्डले पहिलोपटक कर्मचारीहरूका लागि आचारसंहिता जारी गर्दै प्राथमिक निष्कासन (अंकित मूल्यका सेयर मात्र) बाहेक सबै प्रकारका सेयरमा लगानी गर्न बन्देज गरेको हो ।

बोर्डले आइतबार सार्वजनिक गरेको आचारसंहितामा यस्तो उल्लेख छ । यसअघि बोर्डको आचारसंहिता नभए पनि नियमावलीमा कर्मचारीहरूले संस्थापक सेयर र दोस्रो बजारमा लगानी गर्न नपाउने व्यवस्था थियो । अहिले त्यसलाई झनै परिमार्जित गरी थप निष्कासन (एफपीओ) र प्रिमियम मूल्य तोकी निष्कासन भएका सेयरमा पनि लगानी गर्न नपाइने व्यवस्था गरेको हो । 

‘कर्मचारीहरूले सेवा अवधिभर आफ्नो वा आफ्नो एकाघरको परिवारको नाममा संस्थापक सेयरमा लगानी गर्न पाइँदैन । यस्तै सूचीकृत संस्थाको दोस्रो बजारबाट तथा प्रिमियम मूल्य तोकी निष्कासन भएको सार्वजनिक निष्कासनबाट खरिद गर्न नहुने,’ बोर्डले जारी गरेको आचारसंहितामा भनिएको छ । कर्मचारीहरूले यसअघि त्यस्ता सेयरहरू खरिद गरेका भएमा आचारसंहिता जारी भएको ३० दिनभित्र कार्यालयमा विवरण बुझाउन पनि बोर्डले निर्देशन दिएको छ । 

निजामती कर्मचारीहरूले जस्तै बोर्डका कर्मचारीहरूले पनि अन्य मुलुकमा स्थायी आवासीय अनुमति (पीआर) लिन नपाउने भएका छन् । आचारसंहिता लागू हुनुअघि त्यस्तो अनुमति लिएको वा अनुमति लिन आवेदन पेस गरेको भए ३० दिनभित्र स्वघोषणा गरी बोर्डमा बुझाउनुपर्ने व्यवस्था पनि आचारसंहितामा छ । आचारसंहिता लागू भएपछि अन्य देशको स्थायी आवासीय अनुमति लिन वा यस्तो अनुमति प्राप्त गर्नको लागि आवेदन दिन नहुने संहितामा उल्लेख छ । यस्तै बोर्डका कर्मचारीहरूले कामसँग सम्बन्धित कुनै व्यक्तिसँग ऋण सापटी लिन वा निजको आर्थिक कृतज्ञतामा पर्ने कार्य गर्न नहुने र इजाजत प्राप्त कम्पनीको सामूहिक औपचारिक कार्यक्रममाबाहेक अन्य भोजभतेरमा सहभागी हुन नपाउने व्यवस्था पनि बोर्डले गरेको छ । 

प्रकाशित : चैत्र ८, २०७३ ०८:४४
प्रतिक्रिया
पठाउनुहोस्

नेप्से पुन: १४ सय माथि

कान्तिपुर संवाददाता

काठमाडौं — सोमबारको वृद्धिले सेयर बजार परिसूचक नेप्से पुन: १ हजार ४ सय अंक माथि उक्लिएको छ । अघिल्लो दिनको तुलनामा सोमबार नेप्से ४२.१९ अंकले बढेर १ हजार ४ सय २४.३८ मा उक्लेको हो । यो गत माघ ११ यताकै उच्च हो । गत माघ ११ मा नेप्से १ हजार ४ सय ३२.९९ अंकमा थियो ।

 

नेप्सेको वृद्धिसँगै कारोबार रकममा पनि उल्लेख्य रूपमा सुधार भएको छ । करिब ८ हजार कारोबारबाट २५ लाख २७ हजार ५ सय ३५ कित्ता सेयर किनबेच हुँदा १ अर्ब २६ करोड रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम करिब ५८ करोड रुपैयाँले बढी हो ।

करिब ४ महिनापछि सेयर बजारमा एकै दिन सवा अर्ब रुपैयाँ बराबरको कारोबार भएको हो । नेप्से बढेपछि सेन्सेटिभ (‘क’ वर्गका कम्पनीको सेयर कारोबार मापक) परिसूचक ३.०७ प्रतिशतले र सेन्सेटिभ फ्लोट (कारोबारमा रहेका सबै कम्पनीको सेयर कारोबार मापक) परिसूचक ३.१ प्रतिशतले बढे ।

कारोबारमा आएका सबै समूहको परिसूचक बढेपछि समग्र नेप्से उच्च अंकले उकालो लागेको हो । तीमध्ये पनि बिमा, होटेल, बैंकिङ र विकास बैंक समूहको परिसूचक उच्च दरले बढे । जसमध्ये बिमा समूहको परिसूचक ८.५५ प्रतिशत र होटलको ४.१३ प्रतिशतले बढे । 

यस्तै वित्त कम्पनी समूहको परिसूचक २.८९, विकास बैंकको २.६४, जलविद्युतको २.६, बैंकिङको २.२४ र ‘अन्य’ को ०.२६ प्रतिशत उकालो लागे । योसँगै सेयर बजारको आकार (बजार पुँजीकरण) बढेर १६ खर्ब १६ अर्ब रुपैयाँ कायम भएको छ । 

शाखा विस्तार सक्न निर्देशन
आउँदो वैशाख १५ भित्र शाखा विस्तारको काम पूरा गर्न नेपाल स्टक एक्सचेन्ज (नेप्से) ले ब्रोकर कम्पनीहरूलाई निर्देशन दिएको छ । सोमबार विज्ञप्ति जारी गरी नेप्सेले उक्त निर्देशन दिएको हो । 

शाखा विस्तारका लागि नेप्सेले गत माघ ११ गते केही ब्रोकर कम्पनीहरूलाई स्वीकृत प्रदान गरी विभिन्न सर्तहरूसहित पूर्वाधार तोकिदिएको थियो । सोहीअनुरूप सम्बन्धित ब्रोकर कम्पनीहरूलाई यस सम्बन्धमा भएको प्रगति विवरण पेस गर्न गत फागुन २४ मा पुन: पत्राचार गर्‍यो । त्यस समयमा केही ब्रोकर कम्पनीहरूले तोकिएको मापदण्ड पूरा नगरेको भेटिएपछि वैशाख १५ गतेभित्र सबै काम पूरा गर्न निर्देशन दिएको हो । दिइएको समयभित्र पनि तोकिएको मापदण्ड पूरा नभए शाखा विस्तारको अनुमति रद्द गर्ने नेप्सेले जनाएको छ । 

प्रकाशित : चैत्र ८, २०७३ ०८:४४
पूरा पढ्नुहोस्
प्रतिक्रिया
पठाउनुहोस्