रुदीमा साढे १५ मेगावाटको जलविद्युत्

कान्तिपुर संवाददाता

लमजुङ — लमजुङ र कास्कीको सिमानाको रुदीखोलामा दुईवटा जलविद्युत् आयोजना एकसाथ निर्माण थालिएको छ । बिन्ध्यवासिनी हाइड्रोपावर डेभलपमेन्ट कम्पनी प्रालिले तल्लो क्षेत्रमा ८.८ मेगावाटको रुदी ‘ए’ र माथिल्लो क्षेत्रमा ६.६ मेगावाटको रुदी ‘बी’ जलविद्युत् आयोजनाको निर्माण थालेको छ ।

 

आयोजनाका डेपुटी प्रोजेक्ट म्यानेजर इन्जिनियर सरोज भट्टराईका अनुसार ०७२ वैशाख १२ को भूकम्प, त्यसपछिको नाकाबन्दी र गत भदौमा आएको बाढीपहिरोले आयोजना निर्माणमा ढिलाइ भएपनि हाल द्रुत गतिमा चलिरहेको छ । उनका अनुसार गत असारमै निर्माण सक्ने योजना रहेको थियो । ‘गएको भदौमा पहिराले निर्माणस्थलमा क्षति पुर्‍यायो,’ उनले भने, ‘आगामी भदौभित्र सबै काम सक्ने योजना छ । दसैंअगावै केन्द्रीय प्रसारण लाइनमा विद्युत् जोडिन्छ ।’ आयोजनाको ६० प्रतिशत निर्माण सकिएको उनले बताए ।

आयोजनाको सिभिलतर्फ हाई हिमालय हाइड्रो कन्स्ट्रक्सन प्रालि, हाइड्रोमेकानिकलतर्फ नर्थ हाइड्रो एन्ड इन्जिनियररिङ प्रालिले काम गरिरहेको छ । इलेक्ट्रोमेकानिकलतर्फ तोसिबा प्लान्ट सिस्टम एन्ड सर्भिस कर्पोरेसनले जिम्मा लिएको छ । रुदी ‘ए’ आयोजना लमजुङको सिङीबेंसीमा बाँध बाँधेर कास्कीको रबैडाँडा हुँदै ६ किमि पेनस्टक पाइपमार्फत पानी ल्याई बालुवाबेंसीमा निर्माण हुने गृहबाट विद्युत् उत्पादन गरिनेछ । रुदी ‘ए’ को ०६९ माघ २८ मा विद्युत् खरिद बिक्री सम्झौता (पीपीए) भएको थियो । हिउँदमा ८ रुपैयाँ ४० पैसा र बर्खायाममा ४ रुपैयाँ ८० पैसामा सम्झौता भएको छ । उक्त आयोजना १ अर्ब ३६ करोड २० लाख रुपैयाँ लागतमा निर्माण हुन लागेको हो । रुदी ‘ए’ सँगै प्रवद्र्धक कम्पनीले रुदी ‘बी’ साना जलविद्युत् आयोजनाको पनि निर्माण थालेको हो । 

बिन्ध्यवासिनीले नै निर्माण थालेको रुदी ‘बी’ आयोजना आगामी भदौसम्म निर्माण सक्ने योजनामा छ । ‘आउँदो असारभित्र काम सक्नुपर्ने हो । प्राकृतिक प्रकोपका कारण यसको पनि समयमै काम अघि बढाउन सकिएन,’ उनले भने, ‘यसलाई पनि आउँदो भदौसम्म सक्ने हाम्रो योजना छ ।’ आयोजनाको लागत १ अर्ब ३ करोड रुपैयाँ छ । सिङदी गाउँ नजिकैको टोंगो खोला दोभानमा बाँध बाँधेर सिङीबेंसीमा निर्माण गरिने गृहमा पानी खसालेर विद्युत् उत्पादन गरिने उनले बताए । पानी ल्याउन साढे ३ किलोमिटर लामो पेनस्टक पाइप प्रयोग गरिनेछ ।

प्रकाशित : चैत्र ८, २०७३ ०८:२३
प्रतिक्रिया
पठाउनुहोस्

छोटकरी

कान्तिपुर संवाददाता

काठमाडौं — टुरिजम डेभलेपमेन्ट बैंकले आठौं वर्ष प्रवेश गरेको अवसरमा धुर्मुस सुन्तली फाउन्डेसनलाई ५ लाख रुपैयाँ सहयोग गरेको छ । बैंकका नायब प्रमुख कार्यकारी अधिकृत मनोज खडकाले फाउन्डेसनकी कुञ्जना घिमिरेलाई सोमबार राजधानीमा सहयोग रकमको चेक हस्तान्तरण गरेको जारी विज्ञप्तिमा छ ।

टुरिजम डेभलपमेन्टद्वारा ५ लाख 

काठमाडौं (कास)– नमुना मुसहर बस्ती निर्माण गर्न सहयोग पुगोस् भनेर फाउन्डेसनलाई सहयोग गरिएको बैंकले जनाएको छ । 

एभरडाइमको वितरक नियुक्त 
काठमाडौं (कास)– डेउ हेभी इन्डस्ट्रिज कोरियाको भगिनी कम्पनीका रूपमा स्थापित ‘एभरडाइम’ ले नेपालमा आफ्नो वितरकमा एफजी इन्कर्पोरेटेडलाई नियुक्त गरेको छ । कम्पनीले रकब्रेकर तथा एट्याचमेन्ट, फायर फाइटिङ भेइकल, टावरक्रेन, बुमपम्प, ह्यामरड्रिललगायतका उत्पादन गर्दै विश्वका ८० भन्दा बढी मुलुकहरूमा बिक्री वितरण गर्दै आएको जारी विज्ञप्तिमा छ । विभिन्न खानीहरू, सिमेन्ट कारखाना तथा निर्माण कम्पनीहरूमा ७५ थानभन्दा बढीको संख्यामा एभरडाइम रकब्रेकरहरू नेपालमा चलिरहेका र यिनको माग दिनानुदिन बढदै गइरहेको कम्पनीले दाबी गरेको छ ।
 
युनिभर्सल इलेक्ट्रोकमद्वारा हिटाचीसँग साझेदारी
काठमाडौं (कास)– हिटाचीले युनिभर्सल इलेक्ट्रोकमसँग व्यापारिक साझेदारीको घोषणा गरेको छ । राजधानीमा आयोजित कार्यक्रममा आगन्तुकहरूलाई कम्पनीका टीभी, एयर कन्डिसनर, रेफ्रिजेरेटर, भ्याकुम, क्लिनर तथा ग्यास चुलो नेपाली बजारमा ल्याएको जानकारीसमेत दिइएको विज्ञप्तिमा छ ।

उद्योग विज्ञ सम्मेलन सकियो 
काठमाडौं (कास)– राजधानीमा उद्योग विज्ञहरूको सम्मेलन सम्पन्न भएको छ । नेपालको प्रतिभा पलायन नियन्त्रण तथा बेरोजागरी समस्या समाधान गर्ने उपायहरूको खोजीमा सम्मेलन केन्द्रित रहेको जारी विज्ञप्तिमा छ । काठमाडौं डोन बस्को कलेजसँगको सहकार्यमा मानवसंसाधन समाजद्वारा आयोजित दोस्रो उद्योग विज्ञ सम्मेलनका सहभागीहरूले रोजगारी सिर्जना र श्रमशक्तिलाई ज्ञान–संसाधनमा परिवर्तन गर्ने सन्दर्भमा नेपालले सामना गरिरहेका विभिन्न समस्याहरू उठान गरेका थिए ।

प्रकाशित : चैत्र ८, २०७३ ०८:२३
पूरा पढ्नुहोस्
प्रतिक्रिया
पठाउनुहोस्