२७ प्रतिशतले घट्यो कारोबार

कान्तिपुर संवाददाता

काठमाडौं — यो साता बजारमा ३ अर्ब ८१ करोड रुपैयाँ बराबरको सेयर कारोबार भएको छ । गत साताको तुलनामा कारोबार रकम २७.३० प्रतिशतले कम हो । चार दिनको कारोबारमा १ सय ६८ कम्पनीका ३४ हजार ७ सय ७३ कित्ता सेयर खरिद–बिक्री भएका थिए ।

गत साता १ सय ६७ कम्पनीका १ करोड ५ लाख ८० हजार ४ सय ९० कित्ता सेयर खरिद–बिक्री हुँदा ५ अर्ब २५ करोड २४ लाख रुपैयाँ परिचालन भएको थियो ।

साताको पहिलो दिनको तुलनामा नेप्से परिसूचक ११.५२ अंकले घटेर १ हजार ६ सय ५३.५३ अंकमा ओर्लियो । तर, गत अघिल्लो बिहीबारको तुलनामा यस्तो परिसूचक ७.०५ अंकले घटयो । नेप्सेमा सूचीकृत ‘क’ वर्गका कम्पनीको कारोबार मापक सेन्सेटिभ परिसूचक २.०८ अंकले र कारोबारमा रहेका सबै कम्पनीको कारोबार मापक फ्लोट परिसूचक १.२४ अंकले ऋणात्मक रहे । अघिल्लो साता सन्तोषजनक रूपमा बढेको बजार गत साता भने घट्दो क्रममा छ । पछिल्लो एक डेढ महिनायता बैंक तथा वित्तीय संस्थामा सेयर अधिक तरलता बढ्दै गएको छ । तरलता बढे पनि ब्याजदर भने घटेको छैन । यसकारण सेयर बजार उकालो लाग्न नसकेको विश्लेषण गरिएको छ । 

यो साता कारोबार रकम (१९ करोड ५३ लाख १० हजार रुपैयाँ) का आधारमा नागरिक लगानी कोष सबैभन्दा अघि रहयो । कारोबार सेयर संख्या (३१ लाख २७ हजार कित्ता) का आधारमा ‘सिद्धार्थ इन्भेस्टमेन्ट ग्रोथ स्किम १’ अग्रस्थानमा छ । त्यसैगरी, कारोबार संख्या (१ हजार ७ सय ६१ वटा) का आधारमा नेपाल लाइफ इन्स्योरेन्स सबैभन्दा अघि रहेको नेप्सेले जनाएको छ । 
साप्ताहिक कारोबारमा वित्त कम्पनी, होटेल र ‘अन्य’ समूहका अन्तर्गतका कम्पनीका सेयरधनी सामान्य नाफामा रहे । कारोबारमा रहेका बाँकी समूहका सेयरधनीको सम्पत्तिमा सामान्य कमी आयो । साताभरको कारोबारमा होटल समूहको परिसूचक १६.५४, वित्त कम्पनीको ११.३१ र ‘अन्य’ समूहको परिसूचक ८.६७ अंकले उकालो लागे । तर, जलविद्युत् समूहको परिसूचक सबैभन्दा बढी २५.६५ अंकले घट्यो । यसैगरी, विकास बैंक समूहको २०.९७, वाणिज्य बैंकको १६.९१, उत्पादन तथा प्रशोधनको १६.२४ र बिमाको ४.६५ अंकले ऋणात्मक रहे । 

यो साता पनि कुल कारोबारमा सबैभन्दा हिस्सा बैंकिङ र बिमाले ओगटेका छन् । उक्त अवधिमा कुल कारोबारमा बैंकिङ समूहको बजार हिस्सा २९.२९ प्रतिशत छ । गत साता यस्तो हिस्सा १९.३४ प्रतिशत थियो । यसैगरी, साताभरको कारोबारमा बिमा समूहले २१.३३ प्रतिशत हिस्सा ओगटेको छ । गत साताको भन्दा यो २५.१५ प्रतिशत विन्दुले कम हो । 

चार दिनको कारोबारमा विकास बैंक समूहको हिस्सा १०.६४, वित्त कम्पनीको ६.६९, होटलको १.२८, जलविद्युत् ६.४, सामूहिक लगानी कोष ३.४५ र संस्थापक सेयरले ४.२३ प्रतिशत हिस्सा ओगटेको नेप्सेले जनाएको छ । गत साता नेपाल स्टक एक्सचेन्जको कारोबार कक्ष नियमित कारोबारका लागि चार दिन खुला रहयो । विगतमा जस्तै गत साता पनि ऋणपत्रतर्फ संस्थागत तथा सरकारी ऋणपत्रको कारोबार भएन । यो साता जनउत्थान सामुदायिक लघुवित्त विकास बैंक र हिमालयन पावर पार्टनरको मात्र सेयर सूचीकृत भए । 

प्रकाशित : श्रावण २९, २०७४ ०८:००
प्रतिक्रिया
पठाउनुहोस्

बालुवा निकासी ठेक्कामा ‘अनियमितता’

कान्तिपुर संवाददाता

गुलरिया — जिल्ला समन्वय समिति (जिसस) मार्फत ढुङ्गा, गिट्टी र बालुवा उत्खनन तथा निकासीको ठेक्का गत आर्थिक वर्षको तुलनामा करिब ३७ प्रतिशत कम अंकमा स्वीकृतिको तयारी गरिएको छ । निकै कम मूल्यमा ठेक्का पर्न थालेको भन्दै स्थानीयले मिलेमतो भएको आरोप लगाएका छन् ।

 गत आवमा ४ करोड ३४ लाखको ठेक्का बोल कबोल भएकोमा चालु आवमा घटेर १ करोड ६१ लाखमा टेन्डर परेको छ । उक्त ठेक्का महिमा कालीगण्डकी जेभीले कबोल गरेको छ । जिससले बबई, गेरुवा र कर्णाली नदीबाट उत्खननका लागि न्यूनतम १ करोड ५० लाख मूल्य तोकेको थियो । असार २१ गते एक राष्ट्रिय पत्रिकामा सूचना प्रकाशित गरी साउन २० गते टेन्डर खोलेको जिससले जनाएको छ । ई–बेडिङबाट टेन्डर दिने व्यवस्था गरिए पनि मल्ल कन्स्ट्रक्सन मात्र दिएको थियो । मल्ल कम्पनीले ई–बेडिङबाट टेन्डर फिर्ता लिएको थियो । लगत्तै जिससमा हार्ड कपी पेस गरि पाँच जना ठेकेदार कम्पनीले टेन्डर दर्ता गराएका थिए ।

 तीमध्ये दुईवटा फाइलमा अंक कबोल नगरी पेस गरिएको थियो । सबैभन्दा बढी कबोल गरेको महिमा काली गण्डकी जेभीले १ करोड ६१ लाख परेकाले स्वीकृत गर्ने तयारी गरेको जिससले जनाएको छ । विवाद सेलाएपछि टेन्डर स्वीकृत गर्ने जिससका एक कर्मचारीले बताए । गत वर्ष बबई, गेरुवा र कर्णाली नदीको फरक–फरक प्याकेजमा ठेक्का दिइएको थियो । चालु आवमा तीनवटै नदीबाट एउटा प्याकेजमा गिट्टी, ढुङ्गा र बालुवा उत्खननका लागि दिएको ठेक्का मिलेमतोमा टेन्डर परेको स्थानीयले आरोप लगाएका छन् । 

जिससको राजस्व परामर्श समितिको बैठकले ठेक्काको बन्दोबस्त मिलाएको थियो । समितिमा स्थानीय विकास अधिकारी, कोलेनिका प्रमुख, उद्योग वाणिज्य संघका प्रतिनिधि र एक विज्ञसहितको टोलीले ठेक्का व्यवस्था मिलाएको जिससले जनाएको छ । ठेकेदार कम्पनीको मिलेमतोमा करिब ३७ प्रतिशत न्यून मूल्य तोकेर सरकारी राजस्व घाटामा पारिएको छ । एक नागरिक अगुवाले ५० लाखको आर्थिक चलखेल भएको आशंका गरे । जिल्ला प्राविधिक कार्यालयलाई ठेक्का बोल कबोल गर्दा कुनै परामर्श लिने गरेको छैन । कार्यालयका डिभिजन इन्जिनियर हरी शर्माले मूल्यांकन गर्ने क्रममा जिससले जिम्मेवारी दिएको खण्डमा प्राविधिकको हैसियतले सिफारिस गर्ने विषयमा निर्णय दिने काम हुने गरेको बताए । 

स्थानीय विकास अधिकारी तेज शर्माले मिलेमतो नभएको दाबी गरेका छन् । ‘ठेक्का दिंदा सबै प्रक्रिया पुर्‍याएका छौं,’ उनले भने, ‘बढी विवाद हुन थालेकाले ठेक्का सदर गरेका छैनौं ।’ यसैबीच जिल्ला प्रशासन कार्यालयले करिब ३७ प्रतिशत कम अंकमा ठेक्का दिने तयारीमा लागेकोमा जिससलाई पत्राचार गरेको छ । सहायक प्रमुख जिल्ला अधिकारी गन्जबहादुर एमसीले ठेकेदारलाई फाइदा र कार्यालयलाई घाटा किन भएको भन्दै ऐन कानुनअनुसार गर्न गराउन निर्देशन दिएको बताए ।

प्रकाशित : श्रावण २९, २०७४ ०८:००
पूरा पढ्नुहोस्
प्रतिक्रिया
पठाउनुहोस्