१० अर्ब बराबरको पशुधनमा क्षति

कान्तिपुर संवाददाता

काठमाडौं — अविरल वर्षाका कारण देशभर ३५ बढी जिल्लामा १० अर्ब १७ करोड ८८ लाखको पशुधनमा प्रत्यक्ष र अप्रत्यक्ष क्षति भएको दाबी सरकारले गरेको छ ।

पशुपक्षी विकास मन्त्रालयले शुक्रबार पत्रकारसम्मेलनमार्फत साउन २७ यता भदौ २ गतेसम्मको अनुमानित क्षति विवरण सार्वजनिक गरेको हो ।

मन्त्रालयले १ अर्ब ३७ करोड ७८ लाख मूल्य बराबरको पशुपक्षीको मृत्यु र नष्ट भएको, २ अर्ब ५० करोड १० लाख रुपैयाँ बराबरको पशुजन्य उत्पादन नष्ट भएको जनाएको छ । त्यस्तै पशुजन्य उत्पादनमा ६ अर्ब ३० करोड बराबरको अप्रत्यक्ष क्षति पुगेको सहित कुल १० अर्ब १७ करोड ८८ लाख रुपैयाँ बराबरको क्षति अनुमान गरिएको प्रवक्ता श्यामप्रसाद पौडेलले जनाए ।

मन्त्रालयका अनुसार, १ करोड १९ लाखका गाई गोरु, ५३ लाख मूल्य बराबरका रागा/भैंसी, ४ करोड ४५ लाखका खसी/बख्रा, २ करोड २६ लाखका बंगुर, १० करोडका कुखुरा मरेका छन् । त्यसैगरी १५ करोडका खोर/गोठ, ५० करोडको पशु आहारा, ३० करोडको पशुजन्य उद्योग नष्ट भएको मन्त्रालय अनुमान गरेको छ । अविरल वर्षाका कारण दूध उत्पादनमा प्रत्यक्ष २ अर्ब ४० करोड र अप्रत्यक्ष ४ अर्ब ८० करोड मूल्य बराबरको क्षति भएको छ । त्यस्तै अण्डा उत्पादनमा प्रत्यक्ष १० करोड १० लाख अप्रत्यक्ष १ अर्ब मूल्यको क्षति भएको मन्त्रालयले भनेको छ ।

यसैबीच बाढी, पहिरोलगायत प्राकृतिक विपदबाट देशभर कृषितर्फ ८ अर्ब ११ करोड ५२ लाख रुपैयाँ बराबरको क्षति भएको अनुमान गरिएको छ । कृषि विकास मन्त्रालयले गत बुधबारसम्म धान, मकै, तरकारी बाली, माछा, केरा, दलहन, बेसार, बदाम, कोदोलगायतका मुख्य बालीमा यती क्षति भएको तथ्यांक सार्वजनिक गरेको थियो ।

उसले बाढीलगायतको विपत्तिबाट देशभरका ३१ जिल्ल्लाको २ लाख ७२ हजार ६ सय ३० हेक्टर जमिनमा गरिएको खेती प्रभावित भएको र ७८ हजार ५ सय १५ हेक्टर खेतीमा पूर्ण क्षति पुगेको भनेको छ ।

प्रकाशित : भाद्र ४, २०७४ ०७:४८
प्रतिक्रिया
पठाउनुहोस्

कारोबार २०५ ले घट्यो

कान्तिपुर संवाददाता

काठमाडौं — बाढीले अधिकांश भूभाग डुबानमा परी तराई क्षेत्रको जनजीवन कष्टकर बनेपछि सेयर बजारमा पनि त्यसको प्रभाव देखिएको छ ।

बाढी सुरु भएपछि अधिकांश कारोबार दिन परिसूचक ऋणात्मक बन्नुले पनि त्यो पुष्टि हुन्छ । साप्ताहिक कारोबारमा सेयर बजार परिसूचक नेप्से करिब २४ अंकले घटयो । आइतबार कारोबार सुरु हुँदा १ हजार ६ सय ५३.५३ मा रहेको नेप्से बिहीबार १ हजार ६ सय २९.७५ विन्दुमा ओर्लेको छ । आइतबारको तुलनामा भने परिसूचकमा सवा १२ अंकले कमी आएको नेप्सेले जनाएको छ । 

परिसूचकमा आएको गिरावटसँगै कारोबार रकम करिब २० प्रतिशतले घटेको छ । साताभरको कारोबारमा २७ हजार ४ सय ६६ कारोबारबाट १ सय ७८ कम्पनीका ८४ लाख ४६ हजार ४ सय ६० कित्ता सेयर खरिद–बिक्री भए । उक्त कारोबारबाट ३ अर्ब ५ करोड ६७ लाख ६२ हजार रुपैयाँ परिचालन भयो । कारोबार रकम गत साताको भन्दा १९.९५ प्रतिशतले कम हो । अघिल्लो साता १ करोड २१ लाख ३ हजार पाँच सय ८० कित्ता सेयर खरिद–बिक्री हुँदा ३ अर्ब ८१ करोड ८४ लाख ६० हजार रुपैयाँ परिचालन भएको थियो । 

यो साता वित्त कम्पनीबाहेक सबै समूह अन्तरगत कम्पनीका सेयरधनीका लागि सुखद रहेन । कारोबारमा रहेका सबै समूहको परिसूचक ऋणात्मक रहेपछि बहुसंख्यक लगानीकर्ताको सम्पत्ति घटयो । यसकारण यो साता सेयर बजारको आकार (कुल बजार पुँजीकरण) साढे २७ अर्ब रुपैयाँले साँघुरियो । 

साप्ताहिक कारोबारमा वित्त कम्पनी समूहको परिसूचक १.०९ अंकले बढयो । तर, बिमा समूहको परिसूचक १ सय ५५, उत्पादन तथा प्रशोधन समूहको १ सय २४, होटल र जलविद्युत्को समान अंक (५१/५१ अंक), बैकिङको साढे १६, विकास बैंकको ३४ र ‘अन्य’ को करिब ९ अंकले घटेको नेप्सेले जनाएको छ ।

चार दिनको कुल कारोबारमा बंैकिङ समूहको बजार हिस्सा ३२ प्रतिशत छ । गत साता यो समूहको यस्तो हिस्सा २९ प्रतिशत थियो । सोही अवधिमा बिमा समूहको हिस्सा २० प्रतिशत देखिन्छ । गत साता कुल कारोबारमा बिमा समूहले २१.३३ प्रतिशत अंश ओगटेको थियो । यसैगरी, विकास बैंकको करिब १० प्रतिशत, जलविद्युतको ७.६ प्रतिशत, संस्थापक सेयरको साढे ९ प्रतिशत, लघुवित्तको साढे १३ प्रतिशत र होटलको हिस्सा १.१३ प्रतिशत रहेको नेप्सेले जनाएको छ । कारोबार हिस्साका आधारमा लघुवित्त कम्पनीको सेयरम लगानीकर्ताको आकर्षण बढेको छ । 

यो साता कारोबार रकम (१४ करोड ४८ लाख ६० हजार रुपैयाँ) का आधारमा नेपाल लाइफ इन्स्योरेन्स अग्रस्थानमा छ । कारोबार सेयर संख्या (१४ लाख ९२ हजार कित्ता) का आधारमा नबिल ब्यालेन्स फन्ड १ सबैभन्दा अघि छ । कारोबार संख्या (१ हजार ४ सय ७७ वटा) का आधारमा नेपाल लाइफ इन्स्योरेन्स अग्रस्थानमा रहेको नेप्सेले जनाएको छ ।

सार्वजनिक बिदा परेकाले गत साता नेपाल स्टक एक्सचेन्जको कारोबार कक्ष नियमित कारोबारका लागि चार दिन मात्र खुला रह्यो । विगतमा जस्तै गत साता पनि ऋणपत्रतर्फ संस्थागत तथा सरकारी ऋणपत्रको कारोबार भएन । उक्त अवधिमा फस्ट माइक्रोफाइनान्स, नेरुडे लघुवित्त विकास बैंक र सानिमा बैंकको हकप्रद सेयर तथा माहुली सामुदायिक लघुवित्त संस्थाको साधारण र सेती फाइनान्सको बोनस सेयर सूचीकृत भएको नेप्सेले जनाएको छ ।

प्रकाशित : भाद्र ४, २०७४ ०७:४८
पूरा पढ्नुहोस्
प्रतिक्रिया
पठाउनुहोस्