तातोपानीबाट ८९ लाख

कान्तिपुर संवाददाता

म्याग्दी — सिंगास्थित तातोपानी पोखरी व्यवस्थापन समितिले ८९ लाख आम्दानी गरेको छ । बेनी नगरपालिका ४ स्थित प्राकृतिक तातोपानी कुण्डमा नुहाउनेहरूको प्रवेश शुल्क र चन्दा गरी आव ०७३/०७४ मा ८८ लाख ९३ हजार आम्दानी भएको समितिले जनाएको हो ।

प्रवेश शुल्कबाट ५४ लाख र चन्दाबाट १९ लाख, पर्यटन कार्यालयबाट ९ लाख ६१ हजार र आजीवन सदस्यता शुल्कबाट ३ लाख ३१, विविधबाट २ लाख २० हजार आम्दानी भएको छ । समितिले आम्दानी मुहानको संरक्षण, व्यवस्थापनमा बाहेक स्थानीय सरस्वती माविमा १० शिक्षकलाई तलबभत्ता, भौतिक पूर्वाधार निर्माण, युवा क्लब र विभिन्न सामाजिक काममा खर्च गर्दै आएको छ ।

म्दानीमध्येबाट १० जना विभिन्न्न तह र दरबन्दीका शिक्षकलाई तलबभत्ता स्वरूप १७ लाख ७४ हजार, विद्यालय भवन निर्माणमा ६ लाख, तातोपानी बजार ढल निर्माणमा ८ लाख, कुण्ड व्यवस्थापन कर्मचारी, स्टेसनरी, भैपरी, खेलापरीक्षण र नवीकरण शुल्कमा २ लाखभन्दा बढी खर्च भएको छ । त्यस्तै विभिन्न सामाजिक संस्थालाई चन्दा ३५ हजार, कृषि सहकारी ६८ हजार ८ सय १०, प्रहरी चौकीको खानेपानी र बिजुली महसुलमा २५ हजार, स्थानीय युवा क्लबलाई खेलकुद प्रतियोगिता गर्न २ लाख खर्च गरेको समितिले जनाएका छ । बाँकी २५ लाख रुपैयाँ बैंकमा मौज्दात रहेको छ । 

प्रकाशित : भाद्र २८, २०७४ ०८:२१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

११७ कामदारलाई अवकाश

पोखराको फूलबारी रिसोर्ट
लालप्रसाद शर्मा

पोखरा — व्यवस्थापन र मजदुर संगठनको सहमतिपछि पोखराको पाँचतारे होटल ‘दि फूलबारी रिसोर्ट एन्ड स्पा’ बाट सबै १ सय १७ मजदुरले एकैसाथ अवकाश पाएका छन् ।

गत फागुनदेखि ठप्प उक्त होटलको व्यवस्थापन र मजदुर संगठनबीच खाइपाई आएको सेवा सुविधा दिएर कामबाट बिदाइ गर्ने सहमतिअनुसार शनिबारदेखि कामदार एकैसाथ बाहिरिएका हुन् । मजदुरलाई पहिलो चरणमा ४० प्रतिशत र बाँकी दुई महिनापछि दोस्रो चरणमा रकम पाउने गरी व्यवस्थापनले चेक दिएको छ । बन्द भएको ६ महिनाको हकमा बेसिक तलब मात्रै उपलब्ध गराइएको छ ।

समस्या आइसकेपछि दुवै पक्ष एउटा बिन्दुमा पुगेर निकास निकालेको रिसोर्टले जनाएको छ । महाप्रबन्धक समिर कपिलले पहिलो चरणमा एक करोड रुपैयाँभन्दा बढी उपलब्ध गराइएको बताए । ‘दुई महिनापछि बाँकी सबै रकम मजदुरले पाउने व्यवस्थासहित बिदाइ गरिएको छ,’ उनले भने, ‘यसका लागि साढे तीन करोड रुपैयाँ वितरण हुनेछ ।’ रिसोर्टमा १ सय ४५ कर्मचारी कार्यरत रहेकामा बन्दपछि केहीले आफैं जागिर छाडेका थिए । एक्जुकेटिभ पदका भने यथावत् रहनेछन् ।

मजदुर संगठनको आन्दोलनका कारण रिसोर्ट गत फागुन १७ देखि ठप्प छ । मजदुरले कुनै पनि काम नगरेपछि यो अवस्था आएको हो । कांग्रेस निकट नेपाल पर्यटन तथा होटल मजदुर संघ, एमाले निकट नेपाल स्वतन्त्र होटल मजदुर संघ र माओवादी केन्द्र निकट अखिल नेपाल होटल तथा रेस्टुरेन्ट मजदुर संघ सेवा सुविधा कार्यान्वयन नभएको भन्दै आन्दोलनमा उत्रेका थिए । दुई महिनाको तलबभत्ता,२६ महिनाको सञ्चय कोष, १४ महिनाको सेवा शुल्क, ७ वर्षको स्वास्थ्य बिमा नपाएको मजदुरले बताउँदै आएका थिए ।

अखिल नेपाल होटल तथा रेस्टुरेन्ट मजदुर संघका उपाध्यक्ष नवराज गिरीले सहमतिअनुसार एकैसाथ बिदा लिएको बताए । ‘व्यवस्थापनले होटलै बन्द गर्छु भनेपछि बसिरहने कुरा भएन,’ उनले भने, ‘सञ्चय कोष, सामाजिक सुरक्षा कोषको रकम भने श्रम कार्यालयमार्फत दिने सहमति भएको छ ।’ नेपाल स्वतन्त्र होटल मजदुर संघका अध्यक्ष गोपाल गिरीले अनिर्णयको बन्दीजस्तो भएकाले निकास निकाल्न सहमति भएको बताए । ‘सधैंभरि अविश्वासको वातावरणमा काम गर्नुभन्दा निस्कनै राम्रो देख्यौं,’ उनले भने । मजदुर काममा फर्किसकेको अवस्थामा पनि दुवै पक्षबीच विश्वासको संकट पैदा भइसकेकाले के गर्ने भनेर अवसर र विकल्प खोज्न भनेपछि मजदुरले अहिलेसम्मको रकम दिए जागिर छाड्ने बताएका थिए ।

६ महिनादेखि बन्द रिसोर्ट यतिबेला ‘भूतबंगला’ जस्तो भएको छ । रिसोर्ट परिसर, भवनको छत, भित्ता झारपातले ढाकिएको छ । कोठामा ढुसी पलाएको छ । स्विमिङ पुललगायत संरचना जीर्ण बनेका छन् । रङ खुइलिएको, पानी चुहिएर सामान बिगारेको छ ।

लामो समयदेखि रिसोर्ट बन्द हुँदा व्यवस्थापनले करोडौं रुपैयाँ नोक्सानी बेहोर्नुपरेको छ । एकातिर बुकिङ रद्द गर्नुपरेको र अर्कोतर्फ भौतिक संरचना बिग्रिएकाले मर्मतका लागि करोडौं रुपैयाँ व्ययभार व्यवस्थापनलाई परेको छ । महाप्रबन्धक कपिलले भूकम्प र नाकाबन्दीका बाबजुद पनि मासिक तलब समयमै दिइरहेको र अरू सेवा सुविधा छिट्टै दिन्छौं भन्दा पनि बन्दै गर्नुपर्ने अवस्था आएको बताए । बन्दका कारण केकति क्षति भयो भन्नेबारे पछि हिसाब हुने उनको भनाइ छ ।

४ सय ५० रोपनी क्षेत्रफलमा फैलिएको रिसोर्टमा १ सय ६४ कोठा छन् । सन् १९९८ देखि यो सञ्चालनमा थियो ।

प्रकाशित : भाद्र २८, २०७४ ०८:२१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT