साढे ७ अर्बका नयाँ नोट साटिए, यो दसैंमा १६ अर्बसम्म नयाँ नोट बजारमा जाने आकलन

- एकै दिन राष्ट्र बैंकबाट मात्रै १३ करोड बाँडियो
- बाँकी रकम बैंक र अन्य सरकारी कार्यालयमा गयो
कान्तिपुर संवाददाता

काठमाडौं — यो वर्षको दसैं तिहारका लागि बुधबारसम्म राष्ट्र बैंकले करिब ७ अर्ब ५० करोड रुपैयाँ बराबरको नयाँ नोट वितरण गरेको छ । बैंक तथा वित्तीय संस्था, सरकारी कार्यालय, नेपाली सेना, प्रहरी र सर्वसाधारण गरी उक्त रकम बराबरको नयाँ नोट वितरण गरिएको राष्ट्र बैंकले जनाएको छ ।

सर्वसाधारणका लागि राष्ट्र बैंकले बुधबारदेखि नयाँ नोट साट्न सुरु गरेको छ । काठमाडौंमा थापाथलीस्थित कार्यालय र मोफसलमा ७ वटै क्षेत्रीय कार्यालयमार्फत नयाँ नोट वितरण सुरु गरेको हो । यसैगरी बुधबारदेखि नै नेपाल बैंक, राष्ट्रिय वाणिज्य बैंक र कृषि विकास बैंकका १६ वटा शाखामार्फत नयाँ नोट वितरण सुरु भएको राष्ट्र बैंक मुद्रा व्यवस्थापन विभागका कामु कार्यकारी निर्देशन भीष्मप्रसाद उप्रेतीले बताए । ‘बुधबार मात्रै राष्ट्र बैंकबाट करिब साढे १३ करोड रुपैयाँ बराबरका नयाँ नोट वितरण भएको छ,’ उनले भने, ‘थापाथली कार्यालयबाट मात्र करिब १ हजार १ सय सर्वसाधारणले नयाँ नोट साटेका छन् ।’ बाँकी करिब ७ अर्ब ३७ करोड रुपैयाँ विभिन्न बैंक वित्तीय संस्था, सेना प्रहरीलगायतका निकायमा यसअघि नै वितरण भएको हो । बैंक र संघसंस्थालाई भदौ २१ देखि राष्ट्र बैंकले दिन थालेको थियो । सर्वसाधारणका लागि भने राष्ट्र बैंकले बुधबार मात्रै ढोका खोलेको हो ।

थापाथलीस्थित राष्ट्र बैंकका कार्यालयबाट सर्वसाधारणले बढीमा प्रतिव्यक्ति २७ हजारका दरले नयाँ नोट सटही गर्न पाउँछन् । त्यसका लागि पहिले टोकन लिनुपर्छ । राष्ट्र बैंकले हरेक दिन दिउँसो २ बजेसम्म सर्वसाधारणलाई टोकन वितरण गर्छ । टोकन पाएका व्यक्तिलाई सोही दिन नयाँ नोट दिइने कामु कार्यकारी निर्देशक उप्रेतीले बताए ।

सर्वसाधारणले नेपाल बैंकका काठमाडौं बैंकिङ कार्यालय न्युरोड, बालाजु, पाटन औद्योगिक क्षेत्र, कीर्तिपुर र भक्तपुरबाट पनि नयाँ नोट साट्न पाउँछन् । यसैगरी राष्ट्रिय वाणिज्य बैंकको सिंहदरबार प्लाजा भवन, टेकु, नयाँ बानेश्वर, सानो थिमी, विशालबजार र नक्सालबाट पनि नयाँ नोट साट्ने सुविधा उपलब्ध छ । गौशाला, कोटेश्वर, रामशाहपथ, रत्नपार्क र मंगलबजारस्थित कृषि विकास बैंकका शाखाबाट पनि सर्वसाधारणले नयाँ नोट साट्न पाउने राष्ट्र बैंकले जनाएको छ । ती बैंकहरूबाट सर्वसाधारणले प्रतिव्यक्ति २० हजारका दरले नयाँ नोट सटही गर्न पाउँछन् । ‘ती बैंकहरूले ५, १०, २०, ५० र १०० दरका नयाँ तथा सफा, सुकिलो नोट प्रतिव्यक्ति अधिकतम २० हजार रुपैयाँका दरले वितरण गर्नेछन्,’ राष्ट्र बैंकको सूचनामा उल्लेख छ ।

यो वर्ष राष्ट्र बैंकले १० दिनसम्म नोट सटही सुविधा दिएको छ । गत वर्ष सात दिनमा १० अर्ब ३१ करोड रुपैयाँ बराबरको नयाँ नोट वितरण गरिएको थियो । यो वर्ष १० दिनमा करिब १६ अर्ब रुपैयाँ बराबरका नयाँ नोट वितरण हुने राष्ट्र बैंकको अनुमान छ । सटही सुविधालाई सहज बनाउन प्रत्येक दरका नोटको खुद्रा संख्या १ सयको प्याकेटका आधारमा मात्र सटही गरिनेछ । यसकारण सोहीबमोजिम नोट माग गरी सटही कार्यलाई सहयोग पुर्‍याउन सर्वसाधारणलाई राष्ट्र बैंकले आग्रह गरेको छ ।

प्रकाशित : भाद्र २९, २०७४ ०८:०२
प्रतिक्रिया
पठाउनुहोस्

कमलाले रचिन् कीर्तिमान

कान्तिपुर संवाददाता

काठमाडौं — आर्मीकी खेलाडी कमला श्रेष्ठले बुधबार सुरु पहिलो स्ट्रोङगेस्ट २०१७ सुनीललाल जोशी स्मृति भारोत्तोलनमा तीन राष्ट्रिय कीर्तिमान बनाएकी छन् ।

महिला ६३ केजी जुनियरतर्फ उनले स्न्याचमा ६२ केजी, क्लिन एन्ड जर्कमा ८१ केजीसहित कुल १ सय ४३ केजी उचालेर कीर्तिमान बनाएकी हुन् । यसअघि २०७० सालमा काठमाडौंमा भएको लुम्बिनी च्याम्पियनसिपमा सोनम चौधरीको नाममा स्न्याचमा ३५, क्लिनमा ५३ र कुलमा ८८ केजी तौलको कीर्तिमान थियो । उक्त विधामा आर्मीकै मनिता श्रेष्ठ (स्न्याच ६१ र क्लिन ८०) कुल १ सय ४१ केजीसाथ दोस्रो भइन् ।

सोही तौलको सिनियरतर्फ सप्तरीकी शान्ति चौधरीले स्न्याचमा ५५ केजी र क्लिनमा ६८ केजीका गरी कुल १ सय २३ केजीसाथ पहिलो भइन् । आर्मीकी उषा खड्का स्न्याचमा ५५ र क्लिनमा ६७ केजीसहित कुल १ सय २२ केजीसाथ दोस्रो भइन् ।

सिनियर ५३ केजी तौलमा बााकेकी सञ्जु चौधरीले क्लिनमा ८१ केजी उचाल्दै आफ्नै नामको कीर्तिमानमा सुधारिन । यसअघि उनले एसियन युथ एन्ड जुनियर च्याम्पियनसिपमा ८० केजी उचालेकी थिइन् । उनले स्न्याचमा ५७ उठाउँदा कुल १ सय ३८ केजीसाथ स्वर्ण जितिन् । दोस्रो स्थानेकी झापाकी सुमी भट्टराई स्न्याचमा २२ र क्लिनमा २७ गरी कुल ४९ केजी उचालेर दोस्रो भइन् । जुनियरतर्फ बाँकेकी कविता चौधरीले स्न्याचमा ३५ र क्लिनमा ५१ केजीबाट स्वर्ण जितिन् । सप्तरीकी सन्तोषी यादवले रजत र पर्साकी रबिना बस्नेतले कांस्य जिते ।

काठमाडौं जिल्ला भारोत्तोलन संघले ललितपुरस्थित बालकुमारी ब्याङक्वेटमा आयोजना गरेको प्रतियोगिताको ४८ केजी जुनियरमा झापाकी करिना चौधरीले स्नाचमा २८ र क्लिनमा ३७ केजीबाट स्वर्ण, सप्तरीका सरिता यादवले रजत र बन्जिता थापामगरले कांस्य जिते । सोही स्पर्धाको सिनियरतर्फ आर्मीकी रिता गुरुङले स्न्याचमा ४०, क्लिनमा ४५ केजीसाथ स्वर्ण तथा बाँकेकी तारा चौधरीले रजत जिते ।

जुनियर ५८ केजीमा कास्कीकी टीकामाया गुरुङले स्न्याचमा ५० र क्लिनमा ६४ केजी उचालेर स्वर्ण जितिन् । सप्तरीकी काजल यादवले रजत जितिन् । सोही तौलको सिनियरतर्फ आर्मीकी मनीषा रानाभाटले स्न्याचमा ४८ र क्लिनमा ६५ केजीसाथ स्वर्ण जितिन् । ६९ केजी जुनियरमा लाइफ फिजिकलकी प्रियंका शाह ठकुरीले स्न्याचमा ३८ र क्लिनमा ४३ केजीसहित स्वर्ण तथा चितवनकी पूजा कुमालले रजत जितेका थिए । ७५ केजीमा मनकुमारी कुमाल र ९० केजीमा अस्मिता राईले स्वर्ण जिते ।

प्रकाशित : भाद्र २९, २०७४ ०८:०२
पूरा पढ्नुहोस्
प्रतिक्रिया
पठाउनुहोस्