एनआईसीको नयाँ घरकर्जा योजना
काठमाडौं — एनआईसी एसिया बैंकले दसैं, तिहार तथा छठको अवसर पारेर नयाँ घर कर्जा योजना ल्याएको छ । बैंकले ‘एनआईसी एसिया बैंकको दसैं–तिहार उपहार, घर कर्जामा छुटैछुटको बहार’ नामक योजना ल्याएको जारी विज्ञप्तिमा उल्लेख छ ।
यस योजनाअन्तर्गत सहज रूपमा ०.९ प्रतिशत प्रतिमहिनाको ब्याजदरमा घरकर्जा उपलब्ध गराइने तथा ग्राहकहरूले सम्पूर्ण कागजातहरू पेस गरेको ३ कार्य दिनभित्रै घरकर्जासम्बन्धी निर्णय भइसक्ने व्यवस्था गरेको जनाइएको छ ।
कर्जा लिँदा ब्याजदरबाहेक प्रोसेसिङ, अग्रिम भुक्तानी, धितो मूल्यांकन, बिमा वा कर्जा सूचनालगायतका कुनै पनि दस्तुर/शुल्क नलाग्ने विज्ञप्तिमा उल्लेख छ ।
साथै, नयाँ घर निर्माण गर्न, घर वा जग्गा खरिद गर्न वा अन्य बैंक तथा वित्तीय संस्थाको कर्जा सार्नसमेत उक्त कर्जा उपलब्ध हुने जनाइएको छ । यो कर्जाको अवधि २५ वर्षसम्म छ । २ वर्षसम्म ब्याजदरमा समेत परिवर्तन नहुने बैंकको दाबी छ ।
प्रकाशित : आश्विन ९, २०७४ ११:१०