विजय माल्या दोस्रोपटक पक्राउ

लन्डन — रक्सीको कारोबार गर्ने भारतीय व्यापारी विजय माल्या मंगलबार दोस्रो पटक बेलायतमा मनी लाउन्डरिङ मुद्दामा पक्राउ परेका छन् । तर, पक्राउ परेको केही समयमै उनी जमानतमा रिहा भएको सञ्चार माध्यमहरूले जनाएका छन् ।

लन्डनस्थित वेस्टमिनिस्टर मजिस्ट्रेट कोर्टमा मंगलबार दिउँसो उपस्थित भएलगतै उनले जमानत पाएका थिए । 

माल्याले विभिन्न बैंकको नौ हजार करोड भारतीय रुपैयाँ ऋण चुक्ता नगरेको मुद्दामा भारतमा ‘वान्टेट’ सूचीमा राखिएको छ । यसै वर्षको अप्रिलमा समेत उनी पक्राउ परेलगतै जमानतमा रिहा भएका थिए । आगामी डिसेम्बरमा माल्याको सुपुर्दगी भारतमा हुन सक्ने अपेक्षा गरिएको छ । सीबीआई र इडीले डिसेम्बर ४ मा सुनुवाइका क्रममा माल्या भारत आउन सक्ने जनाएको छ । तर बेलायतबाट भारतमा उनको सुपुर्दगी सोचेजस्तो सजिलो नभएको ‘इकोनोमिक टाइम्स’ ले जनाएको छ । 

‘फ्याक्टली इन’ द्वारा सार्वजनिक गरिएको रिपोर्टअनुसार भारतमा सुपुर्दगी दर विगत १५ वर्षमा ३६ प्रतिशत मात्रै रहेको छ । 

प्रकाशित : आश्विन १८, २०७४ ०९:०५
प्रतिक्रिया
पठाउनुहोस्
ADVERTISEMENT

बैंक नहुँदा गाउँपालिकामा समस्या

-जिल्लाका अधिकांश गाउँपालिकाको वित्तीय कारोवारलाई हेटौंडा धाउनुपर्ने बाध्यता
-गाउँपालिकामा सुरक्षा, इन्टरनेट सेवा र भौतिक पूर्वाधार नभएकाले बैंक स्थापना गर्न कठिनाइ
कान्तिपुर संवाददाता

हेटौंडा — जिल्लाका अधिकांश गाउँपालिकामा बैंक सेवा पुगेको छैन । बैंक नहुँदा गाउँपालिकालाई आर्थिक कारोवार गर्न समस्या भएको छ ।

जिल्लाका अधिकांश गाउँपालिकाको वित्तीय कारोवारका लागि हेटौंडा धाउनुपर्ने बाध्यता यथावत् छ । कैलाश, राक्सिराङ, इन्द्रसरोवर, मकवानपुरगढी र बागमती गाउँपालिकामा बैंक सेवा छैन । बकैया र मनहरी गाउँपालिकामा एकएक वटा निजी बैक छन् । मनहरीमा स्थानीय तहको निर्वाचनपछि बैंक स्थापना भएको हो । ‘बैंक अभावले गाउँपालिकालाई आर्थिक कारोवार गर्न समस्या भएको छ,’ कैलाश गाउँपालिकाका अध्यक्ष टंक मोक्तानले भने, ‘सानोतिनो कारोवार गर्न पनि हेटौंडा पुग्नैपर्ने अवस्था छ ।’

गाउँपालिकाले सामुदायिक विद्यालयको शिक्षक, कर्मचारी, स्वास्थ्य, कृषि र भेटनरीका कर्मचारीलाई मासिक तलब उपलब्ध गराउनुपर्छ ।

बैंक नभएकाले मासिक तलब होस् वा अन्य आर्थिक कारोवार गर्न सदरमुकाम धाउनुपर्छ । गाउँपालिकाले हेटौंडास्थित राष्ट्रिय वाणिज्य र नेपाल बैंकबाट कारोवार गर्दै आएको छन् । सरकारले गाउँपालिका क्षेत्रमा साउनभित्रमा बैंक स्थापना हुने बताए पनि अधिकांश गाउँपालिकामा असोज बित्न लाग्दा पनि स्थापना भएका छैनन् ।

गाउँपालिका रहेको स्थानमा सुरक्षा, इन्टरनेट सेवा र भौतिक पूर्वाधार नभएकाले बैंक स्थापना गर्न कठिनाइ भएको हो । कैलाश र मकवानपुरगढी गाउँपालिकामा शाखा स्थापना पनि पूर्वाधार नभएकाले हुन सकेको छैन ।बैंक अभावले तलबबाहेक आर्थिक कारोवार गर्न घण्टौं हिँडेर हेटौंडा आउनुपर्ने कैलाश गाउँपालिकास्थित कृषिका कर्मचारीले बताए । पूर्वाधार अभावमा अधिकार प्रयोग गर्न गाउँपालिकालाई समस्या छ ।

बैंकले शाखा स्थापना गर्न आवश्यक पूर्वाधारको अभाव भएकाले गर्न नसकेको जनाएको छ ।

प्रकाशित : आश्विन १८, २०७४ ०९:०५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT