नवीकरणबिना अस्पताल सञ्चालन

पूर्वस्वीकृतिबिना आईसीयू राखेर सञ्चालन गरेको पाइयो : विभाग
अस्पताल चार्जको नाममा सर्वसाधारणबाट थप १३ प्रतिशत रकम असुल्दै
कान्तिपुर संवाददाता

काठमाडौं — खाद्य–किराना पसलसरह अस्पताल तथा औषधि पसल/फार्मेसीहरू पनि नवीकरणबिना सञ्चालन भइरहेका फेला परेको छ । आपूर्ति व्यवस्थापन तथा उपभोक्ता हित संरक्षण विभागले गरेको अनुगमनमा यस्तो भेटिएको हो ।

अनुगमनका क्रममा सञ्चालन स्वीकृतिभन्दा बढी शय्या राखेको, अस्पताल चार्ज भनेर बढी शुल्क लिएको फेला परेको विभागले जनाएको छ । उपभोक्ता ठगी गर्ने अस्पताललाई कडा कारबाही गरिने विभागका महानिर्देशक कुमार दाहालले बताए । ‘अस्पताल सञ्चालनको नाममा सर्वसाधारणबाट करोडौं रुपैयाँ असुल गरेका छन्,’ उनले भने, ‘सर्वसाधारण ठग्नेलाई उन्मुक्ति हँुदैन । कडा कारबाही हुन्छ ।’ 

विभागले जारी गरेको विज्ञप्तिअनुसार थापाथलीमा रहेको नर्भिक इन्टरनेसनल हस्पिटल एन्ड मेडिकल कलेजले स्वीकृति लिएको भन्दा बढी शय्या सञ्चालन गरी अस्पताल नवीकरण पनि गरेको छैन । जसलाई विभागका महानिर्देशक दाहालले पनि पुष्टि गरेका छन् । ‘अस्पताललाई १ सय शय्याको स्वीकृति दिइएको छ । तर, त्यो संख्याभन्दा बढी शय्या भेटियो,’ उनले भने, ‘अस्पताल चार्जका नाममा सर्वसाधारणबाट थप १३ प्रतिशत असुल्ने गरेको पाइयो । यो सरासर भ्रष्टाचार हो ।’ 

विभागका अनुसार अस्पतालले स्वास्थ सेवा शुल्क भनेर ५ प्रतिशत लिन पाइन्छ तर १३ प्रतिशत लिनु कानुनविपरीत हो । अस्पताल सञ्चालकलाई ३ दिनभित्र सम्पूर्ण कागजातसहित उपस्थित हुन निर्देशन दिइएको विभागले जनाएको छ । चाबहिलको ओम हस्पिटल तथा रिसर्च सेन्टरले पनि नवीकरणबिना सञ्चालन गरेको विज्ञप्तिमा उल्लेख छ । यस्तै अस्पताल परिसरमा रहेको क्यान्टिनमा फोहोर तथा म्याद नाघेका सामानहरू फेला परेको जनाइएको छ । उक्त अस्पताललाई पनि ३ दिनभित्र स्पष्टीकरण पेस गर्न निर्देशन दिएको विभागले जनाएको छ । यस्तै विभागको टोलीले सुन्धारामा रहेको काठमाडौं भ्याली अस्पतालमा अनुगमन गर्दा उक्त अस्पतालमा पनि सोही प्रकृतिका कैफियत फेला परेको जनाइएको छ । दाहालका अनुसार उक्त अस्पतालले ०६६ सालदेखि बिनानवीकरण सञ्चालन गरेको फेला परेको हो । ती अस्पताल सञ्चालकलाई २४ घण्टाभित्र विभागमा उपस्थित हुन निर्देशन दिइएको उनले बताए । 

थापाथलीको डेन्डल डायग्नोसिस्ट प्रालिले पनि सामाजिक सुरक्षा कर, स्वास्थ सेवा करको भौचर र कर्मचारीको सम्झौतापत्र देखाउन नसकेको विज्ञप्तिमा जनाइएको छ । उक्त प्रालिले यसअघि दिइएको निर्देशन पनि पालना नगरेको विभागले जनाएको छ । चाबहिलमा रहेको वेस्ट वाई फार्मेसीमा औषधि व्यवस्था विभागको ‘फम्र्याट’ अनुसारको बिल नभएको विभागको दाबी छ । त्यसैगरी लुनिभा हेल्थ केयर/फार्मेसी युनिटमा अनुगमन गर्दा लागू तथा मनोद्विपक औषधिको रेकर्ड दुरुस्त नभएको जनाइएको छ । लेबल नभएका औषधि बिक्री भएको पनि फेला परेको थियो । बिक्री बिल औषधि व्यवस्था विभागको अनुसार छपाई ३ दिनभित्र पेस गर्न निर्देशन दिएको विभागले जनाएको छ । कुपन्डोलमा रहेको सर्वांगीण स्वास्थ्य सदनमा पनि सञ्चालन स्वीकृत र नवीकरण नभएको फेला परेको जनाइएको छ । 

‘मध्यमाञ्चल क्षेत्रीय स्वास्थ्य निर्देशनालयको निर्णयअनुसार ०७२ जेठ २५ देखि एक वर्षका लागि हुने गरी निर्णय भएको थियो,’ उनले भने, ‘तर, त्यसपश्चात् नवीकरण भएको छैन ।’ सम्पूर्ण कागजातसहित विभागमा उपस्थित हुन निर्देशन दिए पनि व्यवसायीले निर्देशन अवज्ञा गर्दै आएको दाहालले बताए । निर्देशन अवज्ञा गर्ने व्यवसायीलाई कालोबजारी ऐनअनुसार कारबाही गरिने दाहालले बताए ।

प्रकाशित : कार्तिक २५, २०७४ ०८:२६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

‘तोकिएको समयअघि नै निर्माण गर’

त्रिशूली ३ ‘ए’ जलविद्युत् आयोजनालाई निर्देशन
आयोजना सरकारको उच्च प्राथमिकतामा
ठेकेदार कम्पनीले ३ सय कामदार परिचालन गरी काममा तीव्रता
भारतबाट विद्युत् आयात गर्नुपर्ने बाध्यता हट्दै
कृष्ण थापा

शान्तिबजार (नुवाकोट) — त्रिशूली ३ ‘ए’ जलविद्युत् आयोजना तोकिएको समयअघि नै सम्पन्न गर्न उच्चस्तरीय टोलीले निर्देशन दिएको छ । नुवाकोटमा निर्माणाधीन ६० मेगाबाटको उक्त आयोजनालाई समय छोटयाउन ऊर्जा मन्त्रालय र नेपाल प्राधिकरणले निर्देशन दिएका हुन् ।

ऊर्जा सचिव एवं प्राधिकरण सञ्चालक समितिका अध्यक्ष अनुपकुमार उपाध्याय, कार्यकारी निर्देशक कुलमान घिसिङ, ऊर्जा मन्त्रालयका योजना तथा कार्यक्रम महाशाखा प्रमुख प्रवीण अर्याल र उत्पादन निर्देशनालयका निमित्त उप–कार्यकारी निर्देशक हरराज न्यौपानेसहितको टोलीले हालै स्थगलत निरीक्षण गरी अर्को वर्षको हिउँदमा विद्युत् उत्पादन गर्ने गरी काम गर्न ठेकदारलाई निर्देशन दिएका छन् । उनीहरूले आयोजना निरीक्षणस्थलमा भूकम्प र पहिरोले क्षति पुर्‍याएको बाँधस्थलको दायाँ–बायाँ, प्रवेश मार्गमा गएको पहिरोको रोकथाम र सडक मर्मतको जिम्मा पाएको नेपाली सेना र परामर्शदाता कम्पनीबीच छलफल गरेका छन् ।

ती ठाउँमा उनीहरूले काम गरिरहेका छन् । तोकिएको समयभन्दा अगाडि नै निर्माण सम्पन्न गर्न ठेकेदार कम्पनी सहमत भएको छ । ‘यो आयोजनालाई सरकारले उच्च प्राथमिकतामा राखेको छ । तोकिएको समयभन्दा अघि नै आयोजना निर्माण सक्नुपर्छ,’ सचिव उपाध्यायले भने, ‘आयोजना निर्माणमा आउने अवरोध र समस्या समाधानका लागि मन्त्रालय र प्राधिकरण सञ्चालक समिति सधैं तत्पर छ ।’भूकम्प र पहिरोको कारणले प्राधिकरणले ०७६ साल वैशाख १७ सम्म आयोजनाको म्याद थप गरेको हो ।

प्रसारण लाइनसमेत गरी प्रगति ६५ प्रतिशत रहेको आयोजनाले जनाएको छ । चाइना गेजुवा ग्रुप अफ कम्पनी (सीजीजीसी) ठेकेदारलाई समयमा निर्माण स्थल दिन नसक्दा, विद्युत्गृह भूमिगत बनाउने या सतही बनाउने विवाद, क्षमता बढाउने निर्णयलगायतका कारणले आयोजना निर्माणमा ढिलाइ भएको थियो ।

भूकम्पले आयोजनाको निर्माण तालिका प्रभावित बनाए पनि ठेकेदार कम्पनी ३ सय कामदार परिचालन गरी काम गरिरहेको जनाएको छ । कार्यकारी निर्देशक घिसिङले आयोजनाको कामलाई तीव्रता दिन कुनै समस्या नरहेको बताए । ‘चिनियाँ एक्जिम बैंकले ऋणको अवधि थप गरिसकेको छ । सेनाले पनि काम सुरु गरिसकेको छ,’ उनले भने, ‘अर्को वर्षको फेब्रुवरीभित्र विद्युत् उत्पादन गर्ने गरी काम भइरहेको छ ।’

समयमा निर्माण सकिएमा हिउँदमा विद्युत् व्यवस्थापन गर्न भारतबाट बिजुली ल्याउन नपर्ने उनले बताए । उनले लोडसेडिङ गर्नुनपर्ने बताए । आयोजनाले निर्माण गरिहेको त्रिशूली ३ ‘ए’ मातातीर्थ २२० केभी प्रसारण लाइनको १ सय ४२ टावरमध्ये हालसम्म ९१ वटाको जग हालिएको छ ।

प्रकाशित : कार्तिक २५, २०७४ ०८:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT