१० महिनामा साढे ७ लाख पर्यटक

सन २०१७ मा हालसम्मकै धेरै १० लाख पर्यटक आउँछन् : पर्यटन बोर्ड
कान्तिपुर संवाददाता

काठमाडौं — पछिल्लो १० महिनामा नेपाल आउने पर्यटकको संख्यामा उल्लेख्य वृद्धि भई ७ लाख ५७ हजार ४ सय ४८ पुगेको छ । यो अघिल्लो वर्षको यसै अवधिको तुलनामा एक तिहाइले बढी हो ।

अध्यागमन विभागले जारी गरेको सन् २०१७ को पहिले १० महिनामा नेपाल घुम्न आउने विदेशी पर्यटकको संख्या सात लाख नाघेको हो । सन् २०१६ को पूरै १२ महिनाको दाँजोमा चालु वर्षमा ४ हजार ४ सय बढी पर्यटक आएका हुन् ।

पर्यटन बोर्डले यस वर्ष १० लाख पर्यटक पुग्ने प्रक्षेपण गरेको छ । ‘यस वर्षको तथ्यांक अघिल्लो वर्षसँग विश्लेषण गर्दा ३० देखि ३५ प्रतिशतले विदेशी पर्यटक बढेको देखिन्छ,’ बोर्डका निर्देशक सुनील शर्माले भने, ‘यही अनुपातले पर्यटक आगमन रहयो भने अबको दुई महिनामा नेपाल आउने पर्यटकसहितको कुल संख्या सन् २०१७ मा १० लाख पुग्नेछ ।’

शर्माका अनुसार यो संख्या हालसम्मकै उच्च हुनेछ । अहिलेसम्म सबैभन्दा धेरै विदेशी पर्यटक सन् २०१२ मा आएका थिए । त्यस वर्ष ८ लाख ३ हजार ९२ विदेशी नेपाल घुम्न आएका थिए । यस वर्ष तारे र पर्यटक स्तरका होटलको अकुपेन्सी ९० प्रतिशत हाराहारी रहेको छ । पर्यटक बोक्ने अधिकांश विदेशी एयरलाइन्समा यो नोभेम्बर महिनाभर टिकट ‘सोल्ड आउट’ भइसकेका छन् । बोर्डका प्रमुख कार्यकारी अधिकृत दीपकराज जोशी अहिले नेपालमा पर्यटकको संख्या बढ्नुमा पहिलो कारण भूकम्पलाई मान्छन् । ‘भूकम्पले नेपाललाई विश्वभर चिनायो,’ उनले भने । यसबाहेक पछिल्लोपटक सोसल मिडियाका कारण पनि नेपाल घुम्न आउने पर्यटकको संख्या बढेको बोर्डले जनाएको छ ।

यस वर्षको पहिलो दस महिनामा हवाई मार्ग भएर सबैभन्दा धेरै भारतीय पर्यटक नेपाल घुम्न आएका थिए । तथ्यांकअनुसार भारतबाट १ लाख ३३ हजार, दोस्रोमा चीनबाट ८३ हजार, तेस्रोमा संयुक्त राज्य अमेरिकाबाट ६५ हजार पर्यटक नेपाल आएका थिए । यी मुलुकपछि धेरै पर्यटक आउनेहरूमा क्रमश: श्रीलंका, बेलायत, थाइल्यान्ड, म्यानमानर, कोरिया, अस्ट्रेलिया र जर्मनी छन् ।

सबैभन्दा धेरै पर्यटक अक्टोबरमा १ लाख १२ हजार र मार्चमा एक लाख ६ हजार आएका थिए । सन् २०१७ को पहिलो दस महिनामा नेपालमा हवाई बाटो भएर आउने १३ लाख ८१ हजार नेपालीसहित विदेशीको संख्या २१ लाख ३९ हजार पुगेको छ । नेपालीलाई अध्यागमन विभागले पर्यटकको सूचीमा राख्दैन ।

प्रकाशित : मंसिर ४, २०७४ ०९:२६
ADVERTISEMENT
प्रतिक्रिया
पठाउनुहोस्
ADVERTISEMENT

एकीकृत बस्ती बसाउनेलाई भोट

कान्तिपुर संवाददाता

रसुवा — विस्थापित भूकम्पपीडितको सबै टहरामा पार्टीका झन्डा राखिएको छ । हाकु र डाँडागाउँबाट विस्थापित करिब ६ सय भूकम्पपीडितको थातथलोमा पहिरो नरोकिएपछि विस्थापित भएका उनीहरू उत्तरगया गाउँपालिकाको बोगटीटार र नौबिसेमा बस्दै आएका छन् ।

उनीहरू अर्काको जमिन भाडामा लिएर बसिरहेका छन् । उनीहरू ३० महिनादेखि यसरी अरूको जग्गामा बसिरहेका हुन् । एकीकृत बस्ती बनाएर राख्ने आश्वासन पटकपटक पाए पनि अहिलेसम्म त्यो पूरा हुन सकेको छैन । 

उत्तरगया गाउँपालिका ५ बोगटीटारको विस्थापित भूकम्प पीडितहरूको टहरामा पुग्दा प्रत्येक टहरामा सबै पार्टीको झन्डा गाडिएको देखिन्छ । टहरामा पार्टीको झन्डा गाडिए पनि भूकम्पपीडितहरूको समस्या नेताहरूले समाधन गर्छन् भन्ने विश्वास नलागेको पीडित बताउँछन् । लामो समय बितिसक्दा पनि पुन:स्थापनामा न नेताले चासो दिए न सरकारले पीडितहरूको गुनासो छ । ‘काम गर्नेभन्दा पनि धेरै आश्वासन बाँडेर होला नेताहरू प्रतिहाम्रो विश्वास गुम्दै गएको छ,’ छेकु लामाले भने । पीडितहरूको टहरामा प्रतिनिधिसभा र प्रदेशसभाको निर्वाचनले खासै प्रभाव पार्न सकेको छैन । 

‘जग्गाधनीले पटकपटक ठाउँ छाड्न ताकेता गरिरहेको र गाउँ फर्कन सक्ने अवस्था रहेको छैन, हाम्रो पिरमर्का कसले बुझ्ने,’ लामा गुनासो गर्छन् । ३० महिनादेखि उनीहरू यसरी अरूको जग्गामा बसिरहेका हुन् । ‘थातथलो भूकम्पले बस्नै नहुने अवस्थामा छ,’ उनले भने, ‘तीन वर्ष पुग्न लागिसक्यो भूकम्पपीडितहरूको समस्या जस्ताको तस्तै छ ।’

प्रकाशित : मंसिर ४, २०७४ ०९:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT