सूर्तीजन्य पदार्थ नियन्त्रण गर्न महत्वकाङ्क्षी रणनीति सार्वजनिक

काठमाडौँ — स्वास्थ्य मन्त्रालयले सूर्तीजन्य पदार्थको प्रयोगमा कमी ल्याउन ‘सूर्तीजन्य पदार्थ नियन्त्रण महासन्धि, २०३० रणनीति’ सार्वजनिक गरेको छ । 

रणनीतिले नीति निर्माता, सेवा प्रदायक, यससँग सम्बन्धित मन्त्रालय, निकाय एवं राष्ट्रिय तथा अन्तर्राष्ट्रिय गैरसरकारी संस्थालाई सूर्तीजन्य पदार्थ नियन्त्रण कार्यक्रम विकास र कार्यान्वयनमा मार्गदर्शन गर्नेछ । राष्ट्रिय स्वास्थ्य शिक्षा, सूचना तथा सञ्चार केन्द्रले सो महत्वकाङ्क्षी रणनीति तयार गरेको हो ।

केन्द्रद्वारा शुक्रबार यहाँ आयोजित कार्यक्रममा स्वास्थ्यमन्त्री दीपक बोहोराले रणनीति सार्वजनिक गर्दै नसर्ने रोगको प्रमुख कारक तत्वका रुपमा रहेको सूर्तीजन्य पदार्थ नियन्त्रण र रोकथाममा रणनीति कोशेढुङ्गा सावित हुने विश्वास व्यक्त गरे ।
उनले स्थानीय, प्रदेश र केन्द्रमा रणनीतिलाई कार्यान्वयनमा ल्याउन अन्तरमन्त्रालय समन्वयको आवश्यकता औँल्याउँदै सूर्तीजन्य पदार्थ उत्पादनमा नै रोक लगाउनुपर्छ भने ।

सरकारले विश्व स्वास्थ्य संगठनको सूर्तीजन्य पदार्थ नियन्त्रण महासन्धिमा सन् २००३ डिसेम्बर ३ मा हस्ताक्षर गरी सन् २००६ को नोभेम्बर ७ मा पारित गरेको थियो । महासन्धि कार्यान्वयन गर्न यससम्बन्धी ऐन तथा नियमसमेत मन्त्रालयले जारी गरिसकेको छ । मन्त्रालयका अनुसार नेपालमा सूर्तीजन्य पदार्थ सेवनका कारण वर्षेनी १५ हजारको अकालमै मृत्यु हुने गर्छ । खासगरी क्यान्सर, दीर्घ श्वासप्रश्वास, मुटुरोग र मधुमेहजस्ता रोग यसको सेवनका कारणले लाग्ने गर्छन् ।

स्वास्थ्य मन्त्रालयका सचिव डा. पुष्पा चौधरीले नसर्ने रोगलाई कमी ल्याउन सूर्तीजन्य पदार्थको सेवनमा कमी ल्याउन आवश्यक रहेकामा जोड दिँदै रणनीतिलाई कार्यान्वयनमा ल्याउन निर्देशन दिए ।

स्वास्थ्य सेवा विभागका महानिर्देशक डा. रोजेन्द्र पन्त र केन्द्रका निर्देशक बद्रिबहादुर खड्काले सूर्तीजन्य पदार्थको नियन्त्रणले दिगो विकासको लक्ष्यलाई प्राप्त गर्न सहयोग पुग्ने विश्वास व्यक्त गरे । रणनीतिमा सूर्तीजन्य पदार्थको प्रयोगको अनुगमन, धुवाँरहित सार्वजनिकस्थल, सूर्तीजन्य पदार्थ त्याग्न प्रोत्साहनलगायत बुँदा रहेका छन् ।

प्रकाशित : पुस २८, २०७४ १५:५२
प्रतिक्रिया
पठाउनुहोस्

नगरपालिकै बन्द गरेर कर्मचारी र जनप्रतिनिधि एनजिओको तालिममा भाग लिन सदरमुकाममा

प्रकाश अधिकारी

सुर्खेत — कार्यालय बन्द गरेर यहाँको पञ्चपुरी नगरपालिकाका जनप्रतिनिधि र कर्मचारीहरु एक एनजिओद्वारा सञ्चालित तालिममा सहभागी हुन वीरेन्द्रनगर आएका छन् ।

युएसएआईडी साझेदारी विकास परियोजनाको आर्थिक सहयोगमा सुन्दर नेपाल संस्थाद्वारा सञ्चालित स्थानीय सरकार, कार्यसञ्चालनसम्बन्धी अभिमुखीकरणमा सहभागी हुन बिहीबारदेखि जनप्रतिनिधि/कर्मचारी सदरमुकाम आएका हुन्।

नगरपालिकाका वडा कार्यालय, विषयगत कार्यालय शुक्रबार पूर्ण रुपमा बन्द रहे। पञ्चपुरी–२ का यामु बिसीले नगरपालिका नेतृत्वको गैरजिम्मेवारपनप्रति कडा आक्रोश पोखे। ‘सिंहदरबारको अधिकार गाउँ–गाउँमा भनेपनि हाम्रा जनप्रतिनिधिले आफ्नै हैसियत ख्याल गर्न सकेनन्,’ उनले भने, ‘हुँदाहुँदा नगरपालिकामै चलाउन सकिने तालिम वीरेन्द्रनगरमा भएछ। यो भन्दा हेलचेक्र्याइँ अरु के हुन्छ?’ उनले नगरपालिकाको मुख्य कार्यालयदेखि वडा कार्यालय सबै बन्द भएको टेलिफोनबाट जनाएका छन्।

स्थानीय तहको क्षमता अभिवृद्धि गर्ने उद्देश्यले आयोजना गरिएको उक्त तालिम शनिबारसम्म चल्नेछ। बाटो अवधीसहित कर्मचारी/जनप्रतिनिधिको चार दिन समय खर्च हुनेछ। जसले गर्दा अत्यावश्कीय सेवा लिनुपर्ने सर्वसाधारणहरु मर्कामा पर्ने बिसीले गुनासो गरे। पञ्चपुरी नगरपालिकाका जनप्रतिनिधि/कर्मचारीलाई मात्र तालिम दिन वीरेन्द्रनगर बोलाएकामा सुरुमा केही जनप्रतिनिधि असन्तुष्टि जनाएका थिए। वीरेन्द्रनगरको ‘थ्रीस्टार’ लेभलको एक होटलमा सञ्चालित यस तालिमको नगरपालिका आफैं आयोजक हो। नगरप्रमुख उपेन्द्र थापाले आफूहरुको जस्तै तालिम जिल्लाका अन्य तहको पनि भएकाले प्रशिक्षकलाई सजिलो होस् भनेर आफूहरु वीरेन्द्रनगर आएको बताए।

पञ्चपुरीमा तालिम हल र आवासको राम्रो व्यवस्था नभएकाले वीरेन्द्रनगरमा आयोजना गरिएको सुन्दर नेपाल संस्थाले बतायो। तालिमका प्रमुख अतिथि पूर्व मन्त्री एवं प्रदेशसभा सदस्य यामलाल कँडेलले स्थानीय तह नै खाली गरेर जनप्रतिनिधिले दातृ निकायले जता बोलायो उतै नहिँड्न आग्रह गरेका थिए। ‘दातृ निकायलाई पनि स्थानीय तहको क्षमता विकासको नाममा जनताको काममा बाधा पर्ने गरी केन्द्रमा कार्यक्रम नगर्न मेरो सुझाव छ,’ कँडेलले शुक्रबार उद्घाटन सत्रमा भने। तालिमको सहजीकरणका लागि अरुण रेग्मी र विष्णुदत्त गौतम राजधानीबाट आएका छन्।

प्रकाशित : पुस २८, २०७४ १५:१७
पूरा पढ्नुहोस्
प्रतिक्रिया
पठाउनुहोस्