नुवाकोट मासुमा आत्मनिर्भर

यहाँका ब्रोइलर कुखुरा व्यवसायी तथा पोल्ट्री व्यवसाय संघका सदस्य कृष्णहरि गजुरेलले जिल्लाभित्र खपत भएको मासु बाहिर बिक्री हुने गरेको बताए । ‘यहाँ बढी भएको बाहिर बिक्री गर्छाैं’, उनले भने, ‘जिल्ला मात्र खपत गर्न सकिन्न । उत्पादित कुखुरा काठमाडौंमा बिक्री वितरण हुने गरेको छ ।’ जिल्लाको बजारलाई दैनिक १ देखि २ हजार कुखुरा चाहिने उनले बताए । ‘त्यसभन्दा बढी मासु बाहिर जान्छ,’ व्यवसायी गजुरेलले भने । उनले १२ वर्षअघि ३ सयवटा चल्लाबाट व्यवसाय थालेका हुन् । अहिले २ हजार ५ सय कुखुरा छ । वार्षिक सालाखाला ४–६ लटसम्म निकाल्छन् । यति लट निकाल्न धेरै मिहिनेत चाहिने उनले बताए । जिल्लामा करिब ३ सयवटा फर्म छन् ।

विदुरका धनेश्वरी दाना व्यवसाय गर्दै आएका इन्द्र न्यौपानेले कुखुरापालक व्यवसायीले समयमा चल्ला र दाना पुर्‍याउन सकेमा मासु बाहिर जिल्लाबाट ल्याउनु नपर्ने बताउँछन् ।

सहरी क्षेत्र जग्गा भएका ठाउँमा कुखुरा र गाउँमा बाख्रापालन व्यवसाय पनि फस्टाएको छ । बाख्रापालन व्यवसाय गर्दै आएका ककनी–३ चाउथे घुमाउनेडाँडा कृषि तथा पशुपालन फर्मका अध्यक्ष जीवन धितालले २ सय बाख्रा पालेका छन् । उनी खसी र बोका बिक्री गर्छन् । मासुका लागि गाउँमै उनको खसी र बोका बिक्री हुन्छ भने बढी भए काठमाडौं बिक्री गर्ने बताए । बाख्राका लागि चरिचरन, डालेघाँस र स्याहार चाहिन्छ ।