तस्करीले राजस्व प्रभावित

भरत जर्घामगर

सिरहा — खुला सीमाका कारण भन्सार नतिरी तस्करहरूले चोर बाटोबाट मालसामान भित्र्याउन थालेपछि भन्सार असुली प्रभावित भएको छ ।

माडरको खैरटोकास्थित सिरहा भन्सार कार्यालयको चालु आर्थिक वर्षको राजस्व लक्ष्य १५ करोड ७८ लाख रुपैयाँ छ । तर, कार्यालयले चैत मसान्तसम्म ६ करोड २५ लाख ८७ हजार मात्र भन्सार असुली गर्न सकेको छ । कार्यालयको तथ्यांकअनुसार लक्ष्यको अनुपातमा ४० प्रतिशत मात्र राजस्व असुली भएको हो । यो असुलीदर न्यून हो ।

असुली राजस्वमध्ये अधिकांश राजस्व भन्सार र नेपाल प्रहरीको गस्ती टोलीले बरामद गरेको मालसमानका लिलामीबाट उठेको हो । भारतको मुख्य बजारसँग जोडिएको सीमा नाका भए पनि लक्ष्यअनुसारको भन्सार असुली हुन नसकेपछि सिरहा भन्सारको राजस्व सम्बन्धित निकायहरूले जसोतसो उठाउँदै आएका छन् ।

Yamaha

सिरहा भन्सार कार्यालयको तथ्यांकअनुसार चालु आर्थिक वर्षको चैत मसान्तसम्म ११ करोड ३४ लाख भन्सार असुली गर्नुपर्ने लक्ष्य थियो । तर, उक्त अवधिमा ६ करोड २५ लाख ८७ हजार मात्र भन्सार असुली भएको छ । विगतका छोटी भन्सार कार्यालयहरू झाँझपट्टी र औरही अहिले अस्तित्वमा नआए पनि त्यहाँ सशस्त्र प्रहरी बलको बोर्डर आउट पोस्ट (बीओपी) कार्यालय छ । माडर, ठाडी र बरियारपट्टीमा भन्सार कार्यालयका कर्मचारीहरू उपलब्ध भए पनि त्यहाँबाट भन्सार नतिरी तस्करहरूले झाँझपट्टी, औरही, लगाडिगढियानीलगायत सीमावर्ती नाकाबाट चोर बाटो अपनाई मालसमान भित्र्याउने गरेको पाइएको छ ।

‘यहाँ भन्सार काटेरभन्दा पनि चोर बाटो अपनाएर नै मालसमान भित्र्याउन व्यापारीहरू पल्किएका रहेछन्,’ सिरहा भन्सार कार्यालयका प्रमुख भन्सार अधिकृत राजेन्द्र हमालले भने, ‘सोही कारण दिनरात गरेर त्यस्ता सामानहरू पक्रिएकोपक्रियै छौं ।’ उनका अनुसार भन्सार कार्यालयमा संकलित राजस्वको ठूलो हिस्सा गस्तीको क्रममा तस्करीका सामान बरामद गरी लिलामी गर्दा उठेको राजस्व मात्र हो । जबसम्म यथेष्ट कर्मचारी र छुट्टै राजस्व प्रहरी दिइँदैन, तबसम्म यहाँको भन्सार असुलीमा प्रगति हुन कठिन रहेको उनले बताए ।

जिल्ला प्रहरी कार्यालय सिरहाका प्रमुख प्रहरी उपरीक्षक शेखर कोइरालाले भारतबाट आयात हुने भन्सार छलीका समानदेखि तेस्रो मुलुकबाट आयातित मालसमानहरू भारतसम्म पुर्‍याउने गिरोह नै सक्रिय रहेको उल्लेख गर्दै त्यस्ता गिरोहको पहिचान गरी चोरी पैठारी तथा निकासीमा कडाइ अपनाइएको जानकारी दिए । ‘शान्ति सुरक्षाको नाजुक अवस्थाका कारण सिरहाको सम्पूर्ण प्रहरी एकाइहरू त्यसैतर्फ व्यस्त रहेकाले सिरहा प्रहरीले चाहेर पनि भन्सार चोरीतर्फ ध्यान दिन सकेको छैन,’ उनले भने, ‘भन्सार चोरीलाई रोक्न छुट्टै राजस्व प्रहरी तैनाथ गर्नु यहाँ अत्यन्त आवश्यक देखिएको छ ।’

जिल्ला प्रहरी कार्यालय सिरहाका अनुसार नेपाल प्रहरीले तस्करीप्रति देखाएको कडाइका कारण चालु आर्थिक वर्षमा मात्र १ करोड ५८ लाख ७९ हजार ७ सय ९५ रुपैयाँ बराबरको १९ थान सवारी साधन तथा विभिन्न किसिमका मालसमान बरामद गरेर भन्सार कार्यालयलाई बुझाएको छ ।

प्रतिबन्धित कुखुरा तस्करी बढी
खुला सीमाका कारण सबैभन्दा बढी सिरहाका विभिन्न नाकाबाट भारतबाट प्रतिबन्धित कुखुरा तस्करी बढदो छ । शनिबार राति प्रहरीले सीमावर्ती बरियारपटीस्थित दरहियाबाट स१च १३५७ नम्बरको पिकअप भ्यानसहित भारतबाट अवैध रूपमा ल्याउँदै गरेको प्रतिबन्धित ४ सय १० थान कुखुरा बरामद गर्‍यो । जिल्ला प्रहरीको तथ्यांकअनुसार चालु आर्थिक वर्षमा प्रहरीले भारतीय नाकाबाट तस्करी गरेका १ करोड ७ लाख १२ हजार ८ सय रुपैयाँ बराबरको कुखुरा बरामद गरी राजस्व असुली गरेको छ । कुखुरा पछि सबैभन्दा बढी सुनचाँदी, फलफूल, कपडा र किरानाका सामान बरामद भएका छन् ।

Esewa Pasal

प्रकाशित : वैशाख १८, २०७५ ०८:३२
ADVERTISEMENT
प्रतिक्रिया
पठाउनुहोस्
ADVERTISEMENT

दुर्घटनामा ४ को मृत्यु, १० भन्दा बढी घाइते

कान्तिपुर संवाददाता

विराटनगर — मोरङका छुट्टाछुट्टै स्थानमा भएका सवारी दुर्घटनामा चार जनाको मृत्यु भएको छ । १० जना बढी घाइते भएका छन् ।

ग्रामथान गाउँपालिका–५ मा बा १६ च ९३५८ नम्बर कार र को १ च ७६०६ नम्बर पिकअप आपसमा ठोक्किएर साेमबार साँझ भएको दुर्घटनामा दुईजनाको मृत्यु भएको हो ।

मृत्यु हुनेमा कारमा सवार झापाका ५० वर्षीय जयसिंह राजबंशी र मोरङ, जहदाका ३६ वर्षीय विनोद साह रहेको प्रहरीले जनाएको छ । दुर्घटनामा कटहरीका जितेन्द्र साह र कारचालक दिनेश राजबंशी घाइते भएका छन् ।

मोरङकै सुन्दरहरैंचा–५ मा माइक्रो बस दुर्घटना हुँदा झापा भद्रपुरकी ५१ वर्षीया उमा निरौला र ५२ वर्षीया श्यामा कार्कीको मृत्यु भएको प्रहरीले जनाएको छ । भद्रपुरबाट काठमाडौं गइइरहेको बा ४ ख ६९१९ नम्ब्र माइक्रो बस अनियन्त्रित भइ सडक छेउको रुखमा ठोक्किएर दुर्घटना भएको थियो ।

दुर्घटनामा अरु तीनजना घाइते भएको प्रहरीले जनाएको छ । घाइतेहरु चालक दमकका धीरज न्यौपाने, धनुषाका दीपक पाण्डे र दमककी नरमाया तामाङको विराटनगरस्थित एक अस्पतालमा उपचार भइरहेको छ । अरु केही यात्रु सामान्य घाइते भएका छन् ।

यसैगरी सुन्दरहरैंचा–१ मा ना ४ त ५७०२ नम्बर ट्रयाक्टर अनियन्त्रित भइ सडकछेउ बिजुली खम्बामा ठोक्किंदा बेलबारीका करण खवास, छिटकी राजबंशी, शिवनारायण खवास र निर्मला खवास घाइते भएका छन् । उनीहरुको स्थानीय स्वास्थ्य संस्थामा उपचार भइरहेको प्रहरीले जनाएको छ ।

प्रकाशित : वैशाख १८, २०७५ ०८:१९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT