७ महिनामा  संयुक्त भन्सार चेक पोस्ट 

विनोद भण्डारी

विराटनगर — भारतको लगानीमा मोरङको बुधनगरमा आउँदो डिसेम्बर अन्तिम सम्ममा एकीकृत संयुक्त भन्सार चेक पोस्ट (आईसीपी) को निर्माण कार्य पूरा हुने भएको छ । यसको निर्माणकार्य विगत डेढ वर्षदेखि भारतको दिनेशचन्द्र आर इनफलाक्सन प्रालि अहमदावादले गर्दै आएको छ ।

कम्पनीलाई निर्माण कार्य सम्पन्न गर्न आगामी डिसेम्बर २६ सम्मको म्याद दिइएको छ । निर्माण कम्पनीका इन्जिनियर अवधेशप्रसाद साहले भने तोकिएको म्यादभन्दा पहिला नै सक्ने गरी निर्माण कार्य भइरहेको छ ।

Yamaha


गत वर्षको बाढीले झन्डै तीन महिना काम अवरुद्ध भयो । अहिलेसम्ममा करिब ४० प्रतिशत निर्माण कार्य पूरा भएको छ । साहले भने बाँकी रहेको काम सात महिनाभन्दा पहिला नै सम्पन्न गर्ने गरी काम भइरहेको छ ।

सन् २००५ मा नेपाल र भारतबीच विराटनगर, वीरगन्ज, भैरहवा र नेपालगन्ज नाकामा भारतले दुवैतर्फ (आईसीपी) संयुक्त भन्सार चेक पोस्ट निर्माण गर्ने सम्झौता भएको थियो । सम्झौतामा निर्माणको सबै खर्च भारतले व्यर्होने र नेपाल पक्षले आवश्यक जमिन उपलब्ध गराउने सहमति छ ।

दुई मुलुकबीचको सहमतिअनुसार नेपाली पक्षले डेढ वर्षअघि भारतीय पक्षलाई नेपालतर्फको चेक पोस्ट निर्माणका लागि आवश्यक पर्ने १ हजार ४ सय मिटर लम्बाइ र ५ सय मिटर चौडाइ भएको १ सय ६९ बिघा जमिन हस्तान्तरण गरेको थियो ।

जमिन हस्तान्तरण भएपछि भारतीय पक्षले काम सुरु गरेको हो । उक्त जमिन सरकारले दशकअघि सर्वसाधारणलाई मुआब्जा तिरेर अधिग्रहण गरेको थियो । यो प्रोजेक्ट निर्माणका लागि प्राकृतिक स्रोत गिट्टी, बालुवा र ढुंगा नेपाली पक्षले सशुल्क उपलब्ध गराउने सहमतिमा उल्लेख छ ।

त्यसैगरी चेक पोस्टबाट सामान बोकेर आउने मालबाहक ट्रकलाई कोसी राजमार्गमा जोड्ने सडक निर्माणका लागि सरकारले अधिग्रहण गरेको ४० बिघा जमिनमा निर्माण कम्पनीले ग्राभेलको काम सकेर पिच गर्ने तयारी गरेको छ ।

संयुक्त भन्सार चेक पोस्ट निर्माणको कार्य भारततर्फ करिब सकिएको छ । इन्जिनियर साहले भने, ‘भारततर्फ करिब १० प्रतिशत काम बाँकी छ ।’ ‘दुवैतर्फको काम डिसेम्बरसम्म सकिनेछ,’ उनले भने, ‘त्यसपछि जोगबनी नाकाबाट हुने आयात निर्यात ब्रडगेज रेलमार्गमार्फत हुनेछ ।’

चेक पोस्ट भारततर्फ ९० प्रतिशत निर्माण सम्पन्न भएपछि भारतको बथनाहासम्म ब्रोडगेज रेलमार्गमार्फत औद्योगिक कच्चा पदार्थ आयात हुन थालेको छ । बथनाहादेखि मोरङको कटहरीसम्मको निर्माणाधीन १३ दशमलव १ किलोमिटर रेलमार्ग निर्माण मुआब्जा विवादका कारण रोकिएको छ ।

उक्त रेलमार्ग पनि भारतीय लगानीमा निर्माण सुरु भएको हो । नेपाली पक्षले १ सय १९ बिघा जमिन अधिग्रहण गरेर इन्डियन रेल्वे कन्ट्रक्सन इन्टरनेसनललाई ६ वर्षअघि हस्तान्तरण गरेपछि कन्ट्रक्सनले ट्रयाक खोल्ने, कल्भर्ट र पुल बनाउने काम सुरु गरेसँगै मुआब्जा निर्धारण समितिविरुद्ध जग्गाधनी अदालत पुगेपछि निर्माण रोकिएको छ । स्रोतका अनुसार यो प्रोजेक्ट निर्माण अझै अनिश्चित छ ।

भन्सार चेक पोस्ट र ब्रोडगेज रेलमार्ग निर्माण भारतको पूर्ण लगानीमा हुने हो । तत्कालीन सम्झौतामा भारतीय रुपैयाँ २ अर्ब ८० करोड लागतमा निर्माण हुने रेलमार्गका लागि सरकारले करिब ५३ करोड मुआब्जा तिरेर बुधनगर, कटहरी र विराटनगरको जतुवाका ५ सय ६५ जनाको १ सय १९ बिघा जमिन अधिग्रहण गरेर इन्डियन रेल्वे कन्ट्रक्सन इन्टरनेसनललाई बुझाइसकेको छ ।

भारतको ‘राइटस’ कम्पनीले सन् २००६ मा बुधनगरको भेडियारीमा निर्माण हुने संयुक्त भन्सार चेक पोस्टको सर्भे गरेको थियो । उक्त सर्वेले संयुक्त चेक पोस्ट र रेलमार्गको नक्सांकनसमेत गरेको थियो । भारतले सन् २००९ जनवरीदेखि पोस्ट निर्माण गर्ने तयारी गरेको थियो ।

Esewa Pasal

प्रकाशित : वैशाख ३१, २०७५ २०:४४
ADVERTISEMENT
प्रतिक्रिया
पठाउनुहोस्
ADVERTISEMENT

संकटाले लियो बदला

विनोद भण्डारी

विराटनगर — विभागीय टोली सशस्त्र प्रहरी बलको एपीएफ क्लबको चुनौतीलाई १–० गोलले पन्छाउँदै संकटा क्लब मंगलवार पाँचौं विराट गोल्डक फुटबल प्रतियोगिताको सेमिफाइनल पुगेको छ ।

संकटाका जिबरेलले खेलको ६१ औं मिनेटमा गरेको गोल नै निर्णायक बन्यो ।

जितसँगै संकटाले चितवनमा विकास रनिङ सिल्डको फाइनलमा एपीएफसँग पाएको हारको बदला पनि लिएको छ । उक्त प्रतियोगितामा संकटा एपीएफसँग ३–२ ले स्तब्ध भएको थियो ।

विराट गोल्डकपको दोस्रो संस्करणमा पनि संकटाले एपीएफमाथि १–० को जित दर्ता गरेर उपाधि हात पारेको थियो ।

संकटाको सेमिफाइनल भेट थ्रीस्टार र मनाङ मस्र्याङ्दी क्लबवीचको विजेतासँग शनिवार हुनेछ । दर्शको अपेक्षाभन्दा निकै सुस्त देखिएको मंगलबारको खेलको पहिलो हाफमा एपीएफविरुद्ध संकटा हाबी देखिए पनि उसले गोलको खाता खोल्न सकेन र ६१ मिनेटसम्म कुर्नुपर्‍यो ।

संकटाका जिवरेलले मैदानको मध्यभागबाट गरेको कडा प्रहार गोलमा परिणत भएको थियो । खेलको २७ औं मिनेटमा उनैले ३० यार्ड टाढाबाट गरेको प्रहार बारमा लागेर रिबाउन्ड भएको थियो । उनी म्यान अफ द म्याच पनि भए । संकटाले कोलकातालाई पन्छाउँदै अन्तिम आठको यात्रा गरेको थियो ।

दोस्रो हाफमा एपीएफले केही सुधारिएको खेल पस्के पनि पाएको अवसर सदुपयोग गर्न नसक्दा खेलमा फर्कनबाट वञ्चित बन्यो । ६४ औं मिनेटमा रुपक लामाले विपक्षी गोलकिपर सागर बिट हुँदा गरेको हेड प्रहार पोस्ट बाहिरिँदा खेलमा फर्कने अवसर गुम्यो । ८२ औं मिनेटमा हरि कार्कीको प्रहारलाई संकटाका किपरले उत्कृष्ट बचाउ गर्दै टिमको संकट टारेका थिए । खेलको ८८ औं मिनेटमा विश्वास उदासको पावर सुट पनि पोस्टबारमा ठोक्किएर रिवाउन्ड हुँदा एपीएफ चुक्चुकाएको थियो ।


वैकल्पिक खेलाडी सुनील खड्काले ७९ औं मिनेटमा विपक्षी गोलकिपर राजु नगरकोटी बिट हुँदा गरेको प्रहार पोस्ट बाहिरिँदा संकटाको थप गोल गर्ने अवसर गुमेको थियो । उनी दोस्रो हाफको २५ औं मिनेटमा अनिल गुरुङको ठाउँमा मैदान छिरेका थिए ।


पहिलो हाफमा कमजोर प्रदर्शन गर्नु र दोस्रो हाफमा पाएका अवसर सदुपयोग गर्न नसक्दा पराजय भोग्नुपरेको एपीएफका प्रशिक्षक रत्नकाजी मर्हजनको प्रतिक्रिया थियो । अधिकांस खेलाडीले पहिलोपल्ट फ्लडलाइटमा खेलेका कारण पनि टिमको समीकरण नमिलेको उनको तर्क रह्यो ।

उता संकटाका प्रशिक्षक सल्यान खड्गीले खेलाडीका लागि डे–नाइट म्याच अनुकूल भएको र युवा खेलाडीको तालमेल मिलेका कारण जित सम्भव भएको बताए । बुधबार नेपाल पुलिसले त्रिभुवन आर्मीसँग खेल्नेछ ।

प्रकाशित : चैत्र २१, २०७४ १०:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT