पतंजली टेलिकम व्यवसायमा

बीएसएनएलसँग यसबारे सम्झौता भएपछि कम्पनीले ‘स्वदेशी समृद्धि सिमकार्ड’ ल्याउने घोषणा गरेको हो । पतंजलीले आफ्नो यो सिमकार्ड लिने ग्राहकका लागि केही प्याकेजसमेत ल्याएको छ ।

जसअन्तर्गत सिमकार्ड लिने ग्राहकले दैनिक दुई जीबीका साथ स्वास्थ्य बिमा र जीवन बिमाको सुविधा प्राप्त गर्नेछन् । कम्पनीले पतंजली सिमकार्ड प्रयोगकर्ताको २ लाख ५० हजार (भारु) को स्वास्थ्य बिमा र ५ लाख (भारु) को जीवन बिमा गरिदिने जनाएको छ । बिमाको यो राशि सडक दुर्घटनामा मात्रै प्राप्त गर्न सकिने कम्पनीले जनाएको छ ।

पतंजलीका अनुसार पहिलो चरणमा आफ्ना कर्मचारीहरूलाई सिमकार्ड उपलब्ध गराइनेछ । त्यसपछि सर्वसाधारणका लागि खुला गरिनेछ । सिमकार्डमा कम्पनीले केही अफरसमेत ल्याएको छ । ‘पतंजली स्वदेशी समृद्धि सिमकार्ड’ खरिद गरेका ग्राहकले कम्पनीका सबै उत्पादनहरूको खरिदमा १० प्रतिशतसम्म छुट पनि प्राप्त गर्न सक्नेछन् ।