दूधकोसी जलविद्युत्को डीपीआर तयार गरिने

डम्बरसिं राई

खोटाङ — दूधकोसी जलाशययुक्त जलविद्युत् आयोजनाको डीपीआर तयार गरिने भएको छ । खोटाङको रावाबेंसी गाउँपालिका र ओखलढुङ्गाको चिसङ्खुगढी गाउँपालिकाको बीचमा पर्ने दूधकोसी नदीमा उत्पादन हुन लागेको तीन सय मेगावाट क्षमताको जलविद्युत् आयोजनाको डीपीआर निर्माणको काम हुने भएको हो ।

प्रतिनिधिसभा सदस्य विशाल भट्टराईका अुनसार गत जेठ १६ गते ऊर्जामन्त्री वर्षमान पुन, खोटाङ, ओखलढुङ्गा र सोलुबाट विजयी प्रतिनिधिसभा सदस्यहरू, विद्युत् प्राधिकरणका प्रबन्ध निर्देशक, विद्युत् विभागका महानिर्देशक सम्मिलित बैठकले उक्त आयोजनाको डीपीआर गर्ने टुङ्गो लागेको हो ।

दूधकोसी जलाशययुक्त जलविद्युत् आयोजनाको रावाबेसी गाउँपालिका–३ लामीडाँडाको रभुवास्थित नकटीडाँडा र चिसङ्खुगढी गाउँपालिका–६ भदौरेस्थित दोभानडाँडामा परीक्षण सुरुङ निर्माणका लागि गत जेठ १० गते हिमाल कन्स्ट्रक्सन–वाइबा इन्फ्राटेक जेभीले विस्फोटकको काम गरेको छ ।

आयोजनास्थलको प्रगतिबारे बुझ्न प्राधिकरणको कार्यकारी निर्देशक कुलमान घिसिङ जेठ ५ गते रभुवा आएका थिए । ३० महिनामा पूरा गर्ने गरी इटली र जापानको संयुक्त इएकलसी इलेक्ट्रोकन्सल्ट एसपीए इन एसोसिएसन विथ न्युजेक नामक कम्पनीले २०७३ जेठ १७ गतेदेखि आयोजनाको विस्तृत इन्जिनियरिङ डिजाइन, सामाजिक तथा वातावरणीय र सम्भाव्यता अध्ययन गरिरहेको छ । रभुवामा एक सय ६० मिटर अग्लो बाँध हालेर उक्त जलाशयबाट १३ दशमलव ५ किलोमिटर हेडरेस सुरुङ मार्फत पानी खसाएर विद्युत् उत्पादन गर्ने योजना बनाइएको छ । पौने एक खर्बको लागतमा उक्त आयोजना सम्पन्न हुने भएको हो । यसबाट वार्षिक एक अर्ब ८० करोड युनिट विद्युत् उत्तपादन हुने प्राधिकरणले जनाएको छ । एसियाली विकास बैंकको सहयोगमा सन २०२४ सम्म काम सक्ने गरी आयोजनालाई प्राथमिकतामा राखेर काम भइरहेको जनाएको छ ।

जापान सरकारको सहयोगमा कोसी बेसिन अध्ययन गुरुयोजनाअन्तर्गत २०४२ सालमा यो आयोजना सञ्चालन गर्न सकिने पहिचान भएको थियो । त्यसै आधारमा यो आयोजना सम्पन्न गर्न सिफारिस गरिएको थियो । आर्थिक वर्ष २०७५/७६ को मध्यसम्ममा आयोजना निर्माणको टेन्डर आह्वान र सम्झौता गरी आर्थिक वर्ष २०७६/७७ देखि निर्माण सुरु गरिने प्राधिकरणले जनाएको छ । दूधकोसीमा सुरुङ बनाएर ६ सय मेगावाट र थप प्रविधि प्रयोग गरेर दुई सय मेगावाट गरी आठ सय मेगावाट क्षमताको आयोजना निर्माण गर्ने गरी अध्ययन भइरहेको प्रतिनिधिसभा सदस्य भट्टराईले बताए ।

Yamaha

प्रकाशित : जेष्ठ २०, २०७५ ०७:५०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

खण्डहर बन्यो आदिवासी संग्रहालय

डम्बरसिं राई

खोटाङ — आठ वर्षअघि निर्माण सुरु भएको आदिवासी जनजाति भवन सम्पन्न नहुँदै खण्डहर बनेको छ । दल संलग्न उपभोक्ता समितिले आर्थिक अनियमितता गरेपछि भवन सम्पन्न नहुँदै खण्डहर बनेको हो ।

दल संलग्न उपभोक्ता समितिले आर्थिक अनियमितता गरेपछि निर्माण नसकी खण्डहर बनेको खोटाङको दिक्तेल रुपाकोट मझुवागढी नगरपालिकाको अल्छेढुंगास्थित आदिवासी जनजाति संग्रहालय । तस्बिर : डम्बरसिं

दिक्तेल रुपाकोट मझुवागढी नगरपालिका वडा नं–१ अल्छेढुंगास्थित आदिवासी जनजाति संग्रहालय निर्माणमा तत्कालीन जिल्ला विकास समितिको आदिवासी जनजाति अन्तर्गत विनियोजन गरिएको १३ लाख ८३ हजार रुपैयाँ सर्वदलीय उपभोक्ता समितिका पदाधिकारीहरूले हिनामिना गरेपछि भवन निर्माण अलपत्र परेको हो ।

आदिवासी जनजाति संग्रहालय निर्मााण उपभोक्ता समितिका अध्यक्ष जयबहादर राई र कोषाध्यक्ष रामकुमारी राईको हस्ताक्षर किर्ते गरी बैंकबाट रकम निकासा गरिएको भन्दै कोषाध्यक्ष राईले जिल्ला प्रशासनमार्फत अख्तियारमा उजुरी दिएकी थिइन् । कोषाध्यक्ष राईका अनुसार राष्ट्रिय वाणिज्य बैंक शाखा दिक्तेलमा रहेको चल्ती हिसाव नम्बर २५८३ को रकम पटक–पटक गरी १३ लाख ८३ हजार रुपैयाँ निकालिएको हो ।

राईले गुणस्तरहीन भवन निर्माण गरिएकाले आफूले रकम निकासा गर्न नमानेकाले किर्ते हस्ताक्षर गरेर निकासा गरेको बताइन् । उनले जनाएअनुसार २०६७ साल ३१ गते दुई लाख ५० हजार, असोज २१ गते तीन लाख, चैत १ गते एक लाख ८० हजार र २० गते ८३ हजार रुपैयाँ किर्ते हस्ताक्षरबाट निकालिएको छ । यसबारे सबै विवरण खुलाएर जिल्ला प्रशासनमार्फत अख्तियार आयोगमा उजुरी दिएको राईले सुनाइन् ।

उपभोक्ता समितिमा कांग्रेस, तत्कालीन एमाले र माओवादी संलग्न पदाधिकारीहरू संलग्न थिए । निर्माणमा संलग्न विष्णुराज राई लगायतको संलग्नतामा किर्ते गरेको भन्दै अख्तियारमा उजुरी परेको थियो । यसमध्ये निर्माण उपभोक्ता समितिका अध्यक्ष जयबहादुर राई र निर्माणमा संलग्न भक्तकर्ण राईको मृत्यु भइसकेको छ ।

दल संलग्न उपभोक्ता समितिले निर्माण थालेको आदिवासी जनजाति भवन खण्डहर बनेपछि चौतर्फी विरोध भएको छ । उपभोक्ता समिति अध्यक्षमा कांग्रेसका जयबहादुर राई, उपाध्यक्ष तत्कालीन एमालेका सुरेन्द्रकुमार राई, सचिवमा तत्कालीन माओवादीका दीपेन्द्र राई, कोषाध्यक्षमा कांग्रेसकी रामकुमारी राई थिइन् । सदस्यहरूमा अन्य दलका पनि संलग्न थिए । दिक्तेल रुपाकोट मझुवागढी नगरपालिकाका मेयर दीपनारायण रिजालले उक्त भवन निर्माण अनियमिततापछि अख्तियारमा परेको उजुरी समेत अलपत्र परेको बताए ।

प्रकाशित : जेष्ठ ११, २०७५ १०:३२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT