पन्त सर्वाेत्कृष्ट किसान

सुरज कुँवर

काठमाडौँ — गोरखा पालुङटारमा ३ सयवटा गाई पालेर वार्षिक १ करोड रुपैयाँ बराबरको अम्दानी गर्दै आएका राजेन्द्रराज पन्तलाई सरकारले यस वर्षको सर्वोत्कृष्ट कृषक घोषणा गरेको छ ।

बुधबार कृषिमन्त्री चक्रपाणि खनालले पन्तलाई हरिहरभवनस्थित कृषि विभागमा आयोजित समारोहमा नगद २ लाखसहित राष्ट्रपति सर्वोत्कृष्ट पुरस्कार प्रदान गरे ।

कृषि, भूमि व्यवस्था तथा सहकारी मन्त्रालयका सहसचिव लेखनाथ आचार्यका अनुसार पन्तले २०५२ सालमा स्थापना गरेको कामधेनु गाईपालन केन्द्र स्थापना गरेका थिए । हाल उनको गाईपालनमा केन्द्रमा लगानी ५ करोड पुगेको छ । परिवारका ६ सदस्यसहित ३५ जना स्थायी कर्मचारी फर्ममा छन् । ‘दुधे गाई २ सय ६० वटा र ४० बाच्छाबाच्छी, ३ सय ४० रोपनीमा घाँस खेती छ,’ मन्त्रालयले तयार पारेको मूल्यांकन प्रतिवेदनमा लेखिएको छ, ‘१७ रोपनीमा गाई गोठ, प्रशिक्षण केन्द्र, दाना उत्पादन घर, चिलिङ भ्याटसहित फर्म कुल ३ सय ५७ रोपनीमा छ ।’

Yamaha

पन्तले दुध बेचेर वार्षिक १ करोड ५ लाख रुपैयाँ आम्दानी गर्छन् । उनको फर्ममा होलिस्टिन र जर्सी नश्लका गाई छन् ।

कृषि क्षेत्रको सबैभन्दा ठूलो धनराशिको ‘राष्ट्रपति कृषक पुरस्कार’ पाउनेमा पन्त चौथो किसान हुन् । व्यावसायिक कृषि पेसामा युवा पुस्ताको आकर्षण बढाउन सरकारले आर्थिक वर्ष ०७०/०७१ देखि थालेको यो पुरस्कार प्राप्त गर्नेमा टीकापुरमा १० बिघा जमिनमा केरा खेती गर्ने कालु हमाल पहिलो हुन् । दोस्रो वर्ष कास्कीको लाहाचोकमा ६ करोड लगानीमा भैंसीपालन गर्दै आएका इमानबहादुर गुरुङ पुरस्कृत भएका थिए । वार्षिक ३ करोड रुपैयाँ बराबरको माछाको कारोबार गर्ने सर्लाहीको पिडारीका अफजल हुसेन गत वर्ष सर्वोत्कृष्ट कृषक पुरस्कार प्राप्त गर्ने तेस्रो किसान थिए ।

त्यसैगरी मन्त्रालयले चारजना किसानलाई राष्ट्रपति उत्कृष्ट पुरस्कार प्रदान गरेको छ । मन्त्रालयका वरिष्ठ कृषि अर्थविज्ञ शिरीष पुनका अनुसार राशि १ लाख भएको पुरस्कार पाउनेमा भरतपुरमा बाख्रापालन व्यवसाय गर्दै आएका योगेन्द्रबहादुर खडका (जगतपुर एग्रो प्राइभेट लिमिटेड), खजुरा बाँकेमा च्याउ खेती गर्दै आएका लालबहादुर सुनार (श्याम सुन्दर) च्याउ खेती उद्योग), धनुषाको ननुपट्टीमा माछा उत्पादन गर्दै आएका बौएलाल मुखिया (मुखिया मत्स्य प्रजनन फर्म) र कैलालीको टीकापुरमा केरा खेती गर्दै आएका रामबहादुर कुँवर (केरा खेती व्यवसाय) छन् ।

यी किसानलाई उत्पादन स्थिति, उत्पादकत्व, व्यवसायको दिगोपना, लगानी, आर्थिक आम्दानी, रोजगारी सिर्जना, स्रोत साधनको स्थितिलगायतका मापदण्डका आधारमा मूल्यांकन गरिएको हो । जिल्ला कृषि विकास कार्यालयले तीन उत्कृष्ट कृषक छानेर क्षेत्रीय कृषि कार्यालयमा सिफारिस गर्छ। क्षेत्रले ५ जनालाई उत्कृष्ट घोषणा गर्दै मन्त्रालय मातहतमा रहेको केन्द्रीय छनोट समितिमा पनि पठाउँछ ।

प्रकाशित : असार २१, २०७५ ०८:३५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

एकातर्फ ठूला टोली

एएफपी

मस्को — इंग्ल्यान्ड विश्वकप २०१८ को अन्तिम आठमा पुग्ने अन्तिम टिम बन्यो मंगलबार राति । इंग्ल्यान्डले कोलम्बियामाथि टाइब्रकेरमा नाटकीय जित निकालेको हो । अन्तिम आठमा पुग्ने अरु दुई ठूला टिममा ब्राजिल र फ्रान्स रहेका छन् ।

हुनसक्छ, सेमिफाइनलमा यिनै दुई टिम एक आपसमा भिड्ने छन् । गारेथ साउथगेटको टोलीले जसरी कोलम्बियालाई हरायो, लाग्छ उसले स्वीडेनलाई पनि हराउन सक्छ ।

स्वीडेनले यसअघि स्वीट्जरल्यान्डलाई १–० ले हराएको थियो । इंग्ल्यान्ड र स्वीडेन दुवै यस प्रतियोगिताको तल्लो छेउमा छन् । ‘बटम–हाफ’ भने हुन्छ यसलाई । यसमा आयोजक रुस पनि छ अनि क्रोएसिया । यसमा पूर्व विश्वकप विजेता इंग्ल्यान्डमात्र हो । माथिल्लो छेउ अर्थात ‘टप–हाफ’ मा भने ठूला टिम छन् हेभिवेटहरू । यी हुन् सन् १९९८ को विजेता फ्रान्स र दुईपल्टको विजेता उरुग्वे । यिनीहरू नै एक आपसमा भिड्ने छन् ।

पाँचपल्टको विजेता ब्राजिलले भने बेल्जियमको सामना गर्नेछ । एरिक डायरको स्पट–किकले विश्वकपमा इंग्ल्यान्डलाई पहिलो पेनाल्टी सुटआउट जित दिलाएको थियो । योसँगै टुंगिएको छ इंग्ल्यान्डलाई टाइब्रेकरले दिने दु:ख पनि । एक अर्थमा इंग्ल्यान्डले ठूलै खटो काटेको छ । साउथगेटले भने यसमै अल्झेर बस्नुभन्दा शनिबारको क्वाटरफाइनलमा आँखा लगाएका छन् ।

सामरामा यो खेल स्वीडेनविरुद्ध छ । अर्को खेलमा क्रोएसिया र रुस खेल्दै छन् । ‘कोलम्बियामाथिको जित विशेष छ, तर म अगाडि बढ्न चाहन्छुं,’ साउथगेटले भनेका छन् । उनले नै सन् १९९६ को युरो सेमिफाइनलमा जर्मनीविरुद्ध पेनाल्टीमा गोल गर्न चुकेपछि इंग्ल्यान्ड बाहिरिएको थियो । त्यो खेल वेम्बलीमा भएको थियो । ‘स्वीडेनविरुद्ध पनि हाम्रो प्रदर्शन खराब छ, त्यसैले हामी उनीहरूलाई कम आँक्ने छैनौं,’ साउथगेट मान्छन् ।

जेन एन्डरसनको स्वीडेनले भने जर्मनीविरुद्ध अन्तिम समयमा बेहोरेको हारबाट मुक्ति पाइसकेको देखिन्छ । समूह चरणको त्यस स्तब्धपूर्ण हारपछि स्वीडेनले मेक्सिको र स्वीट्जरल्यान्डलाई हराएको छ । आरबी लेप्जिप मिडफिल्डरले स्वीस टिमविरुद्ध एकमात्र गोल गरे काउन्टर आक्रमणमा । स्वीडेन सन् १९९४ यता पहिलोपल्ट अन्तिम आठमा पुगेको हो ।

केन्द्रमा नेयमर
इंग्ल्यान्डमाथि सबैको ध्यान केन्द्रित भए पनि विश्वकप विजेता सम्भवत: माथिल्लो छेउबाट नै आउने छ । यसमा रहेका टिमले संयुक्त रूपमा आठपल्ट विश्वकप जितिसकेको हुनाले पनि यो दाबी गर्न सकिन्छ । कजानमा हुने खेलमा ब्राजिलको सामना हुनेछ, ‘स्वर्णिम पुस्ता’ का खेलाडीबाट गुज्रिइरहेको बेल्जियमविरुद्ध । केलियन एमबाप्पेसहितको युवा फ्रान्सेली टिमले भने निज्नी नोभ्गोरोडमा उरुग्वेविरुद्ध खेल्नेछ ।

ब्राजिल कीर्तिमानी छैटौंपल्ट विश्वकप उपाधिको अभियानमा छ । यो अभियानको केन्द्र हुनेछन् नेयमर । तर विश्व फुटबलका सर्वाधिक महँगा खेलाडी भने गलत कारणले समाचारमा छाइरहेका छन् । मैदानमा उनीमाथि अभिनय गरेको आरोप लागेको छ । एउटा तथ्य के भने ब्राजिलले तय गरेको यहाँसम्मको यात्रामा खासै ठूलो चुनौती पनि सामना गर्नुपरेको छैन ।

तर मेक्सिकोका प्रशिक्षक हुँवा कार्लोस ओसारियोले नेयमरले नै चोट लागेको अभिनय गरेर जुन समय खर्चे, त्यसै कारणले पनि आफ्नो टिमको हारको आधार तयार भएको माने । कार्लोसले म्यागुइल लयनको टयाकलमा जसरी चोट लागेको अभिनय गरे, यसलाई ‘विश्व फुटबलकै लज्जा’ को संज्ञा दिएका छन् । बेल्जियम भने जापानविरुद्ध एक समय निकै खराब मोडमा थियो । अन्तत: टोली जित निकाल्न सफल रह्यो ।

अर्कोतर्फ फ्रान्सले समूह चरणमा त खासै प्रभाव पार्न सकेन । तर अर्जेन्टिनामाथि प्राप्त ‘क्लासिक’ ४–३ को जितमा भने निकै राम्रो प्रदर्शन गर्‍यो । ‘हामीले यस्तो खेलका लागि अहिले होइन, धेरै अगाडिदेखि अभ्यास गरिरहेका थियौं । भनौं साता होइन, महिनौं अगाडिदेखि,’ फ्रान्सेली प्रशिक्षक डिडियर डेसच्याम्पले भनेका छन् ।

उरुग्वेले अहिलेसम्म प्राप्त गरेको सफलता भने धेरे हदसम्म ठोस रक्षापंक्तिमा टिकेको छ । यसको नेतृत्व गरिरहेका छन् एट्लेटिको म्याड्रिडका खेलाडीद्वय जोसे जिमिनेज र डिएगो गोडिन । अनि टिमको आक्रामणमा लुइस स्वारेज र एडिन्सन काभानीको जोडीले पनि गज्जब गरिरहेको छ । उनीहरूले संयुक्त रूपमा ५ गोल गरिसकेका छन् ।

केलियन एमबाप्पे, फ्रान्स
उमेर–१९, खेल–४, गोल–३

लुइस स्वारेज, उरुग्वे
उमेर–३१, खेल–४, गोल–२

नेयमर, ब्राजिल
उमेर–२९, खेल–४, गोल–२

इडेन हाजार्ड, बेल्जियम
उमेर–२७, खेल–३, गोल–२

ह्यारी केन, इंग्ल्यान्ड
उमेर–२४, खेल–३, गोल–६

लुका मोड्रिच, क्रोएसिया
उमेर–३२, खेल–४, गोल–२

प्रकाशित : असार २१, २०७५ ०८:३४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT