एकीकृत भन्सार निर्माण सुरु

कान्तिपुर संवाददाता

रसुवा — चीनसँग सीमा जोडिएको अन्तर्राष्ट्रिय व्यापारिक नाका रसुवागढीमा एकीकृत भन्सार कार्यालय भवनको निर्माण सुुुरु भएको छ । ५४ करोड ८५ लाख ५५ हजार ८ सय १९ रुपैयाँ लागतमा ६ तले भवनको निर्माण सुरु भएको हो ।

एकीकृत भन्सार कार्यालयका लागि अहिले जग्गा सम्याउने, जग खन्ने र घेराबार लगाउन थालिएको सहरी विकास तथा भवन निर्माण विभाग डिभिजन रसुवाका प्रमुख धीर फडेराले बताए । उनले भने, ‘३ वर्षभित्रै एकीकृत भवन निर्माण सम्पन्न हुनेछ ।’ भवन निर्माणको जिम्मा श्यामसुन्दर रबिना जेभीले पाएको छ ।

०७४ असार १९ मा रबिना जेभीसँग भवन निर्माणका लागि सम्झौता भए पनि अदालतमा परेको रिटका कारण निर्माण सुरु हुन सकेको थिएन । एकीकृत भन्सार भवन निर्माणको ठेक्का आफूले पाउनुपर्ने माग गर्दै एमबी चक्रेश्वरी शिवशक्ति जेभीले ०७३ पुस १९ मा सर्वोच्चमा रिट हालेको थियो ।

Yamaha

गत जेठ २४ न्यायाधीशद्वय चोलेन्द्रशमशेर जबरा र डम्बरबहादुर शाहीको संयुक्त इजलासले रिट निवेदन खारेज गरेसँगै भवन निर्माणका लागि बाटो खुलेको हो । एकीकृत भवनमा भन्सार, अध्यागमन र सुरक्षा निकाय, क्वारेन्टाइन कार्यालय र बैंक रहनेछन् ।

सीमामा अध्यागमन, भन्सार, क्वारेन्टाइन, बैंकलगायतका कार्यालयहरू छरिएर रहेकाले जाँचपास गर्न समस्या परेको रसुवा भन्सार कार्यालयका प्रमुख अधिकृत गोपाल कोइरालाले बताए । उनले भने, ‘नाकामा एकीकृत भन्सार कार्यालय बनेपछि सबैलाई सहज हुन्छ ।’ सीमा क्षेत्रमा सुरक्षा र सामान जाँचको कुनै पनि उपकरण नहुँदा समस्या रहेको प्रमुख जिल्ला अधिकारी कृष्ण पौडेलले बताए ।

सामान्य चेक जाँच गर्दा तस्करहरू उम्कन सक्ने सम्भावना रहेको छ । उनले भने, ‘उपकरण अभावमा सुरक्षाकर्मीले टहरा र टेन्टमुनि बसेर यात्रुहरूको झोला हेर्ने र सामान छाम्ने गर्नुपर्ने अवस्था छ ।’ चीन जोड्ने सिन्धुपाल्चोकको तातोपानी नाका र रसुवागढी नाका भूकम्पपछि बन्द भएका थिए ।

प्रकाशित : असार ३२, २०७५ ०८:०९
ADVERTISEMENT
ADVERTISEMENT
प्रतिक्रिया
पठाउनुहोस्

सलाद फिर्ता लियो म्याकडोनल्डले

एजेन्सी

काठमाडौँ — अमेरिकी फास्टफुड चेन कम्पनी ‘म्याकडोनल्ड’ ले आफ्नो हजारौं आउटलेटमा रहेको सलाद फिर्ता गरेको छ । परजीवीजन्य रोगका कारण सर्वसाधारण बिरामी भएपछि कम्पनीले अमेरिकाभरि रहेका झन्डै ३ हजार आउटलेटबाट सलाद फिर्ता गरेको ‘दि वासिङटन पोस्ट’ ले जनाएको छ ।

परजीवीजन्य रोगले दर्जनौं ग्राहक थला परेपछि तत्कालै ३ हजार स्थानमा कम्पनीले सलाद बेच्न रोकेको हो । फास्टफुड चेनका अधिकारीहरूले शुक्रबार एक विज्ञप्ति जारी गर्दै प्रभावित क्षेत्रमा रहेका रेस्टुरेन्टबाट सलाद हटाइएको जनाएका हुन् । ‘नयाँ आपूर्तिकर्ताबाट सलाद नपाएसम्म बेच्न रोक लगाइएको छ,’ विज्ञप्तिमा उल्लेख छ, ‘सावधानी अपनाउँदै यो कदम चालिएको हो ।’

अमेरिकी राज्य इलिनोइस र लोवाका जनस्वास्थ्य प्राधिकरणले दूषित सलादका कारण ठूलो संख्यामा ‘साइक्लोस्पोरा’ संक्रमण भेटिएको घोषणा गरेपछि रेस्टुरेन्टले यो कदम चालेको ‘दि वासिङटन पोस्ट’ मा लिन्डसे बेभेरले लेखेका छन् ।

‘म्याकडोनाल्ड खाद्य सुरक्षा र गुणस्तर नियन्त्रणको उच्च स्तरप्रति प्रतिबद्ध छ,’ रेस्टुरेन्टको विज्ञप्तिमा छ, ‘प्रकोपबारे जाँच थालेका जनस्वास्थ्य अधिकारीहरूलाई सहयोग गर्न कम्पनी तयार छ ।’ प्रारम्भिक परीक्षणका क्रममा सलादमा पाइएको ‘क्लोस्पोरा केइटानेन्सिस’ नामक परजीवी मलमूत्रमार्फत खाना र पानीलाई दूषित गर्न सक्छ ।

अमेरिकाको रोग नियन्त्रण तथा रोकथाम केन्द्र (सीडीसी) का अनुसार यो परजीवी शरीरमा प्रवेश गरेपछि पेटलाई सबैभन्दा पहिले संक्रमित गर्छ । सामान्यतया: यो परजीवीको प्रारम्भिक संक्रमण सातापछि मात्रै देखापर्ने गरेको सीडीसीले जनाएको छ । अमेरिकामा मे यता यो परजीवीको संक्रमण फैलिएका सयौं मामिला सार्वजनिक भएका थिए ।

सीडीसीका अनुसार फल तथा तरकारीहरू वितरण गर्ने ‘डेल मोन्टे’ ले जुनमा बिक्रीका लागि पठाएको मोन्ट फ्रेस प्रोडयुस भेजिटेबल ट्रेजलाई फिर्ता गरेको थियो । ‘क्विक ट्रिप’ र ‘पिपोड’ जस्ता खुद्रा बिक्रेताहरूबाट ब्रोकाउली, गाजर, काउली, ज्वाइनोलगायत वस्तु फिर्ता गरेको जनाइएको छ । अमेरिकी चार राज्यहरू लोवा, मिचिगन, मिनेसोटा र विस्कोन्सिनका सर्वसाधारणले परजीवीका कारण आफूहरू थला परेको जानकारी दिएका थिए ।

प्रकाशित : असार ३२, २०७५ ०८:०५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT