प्रदेश राजधानीसँग जोडिएन हवाई सम्बन्ध

जयबहादुर रोकाया

हुम्ला — सडक सञ्जालमा नजोडिएका हुम्ला र डोल्पाका बासिन्दालाई प्रदेश राजधानी सुर्खेतसँग हवाई सम्बन्ध नजोडिँदा असुविधा भएको छ । कर्णालीमा उडान भर्ने निजी हवाई कम्पनी र नेपाल वायु सेवा निगमले नेपालगन्जबाट मात्र उडान भर्ने गरेकाले स्थानीयलाई प्रदेश राजधानी आउजाउ गर्न समस्या भएको हो ।

स्थानीयलाई नेपालगन्जसम्म जहाजमा र त्यसपछि सडक मार्गबाट प्रदेश राजधानी जानुपर्ने बाध्यता छ ।

‘काम विशेषले सुर्खेत गएको थिएँ, सर्खेतबाट यात्रु उडान नहुने भन्दै हवाई कम्पनीले टिकट नदिएपछि नेपालगन्ज जानैपर्ने भयो,’ स्थानीय रामचन्द्र बुढाले भने, ‘सुर्खेतदेखि सिमकोटसम्म उडान हुने भए यात्रुलाई धेरै सजिलो हुन्थ्यो ।’ अहिले सुर्खेतबाट जहाजले कार्गो उडान मात्र गर्ने गरेका छन् ।

Yamaha

सीता एयरलाइन्सले सुर्खेतदेखि सिमकोटसम्म सातामा दुई दिन नियमित यात्रु उडान गर्ने घोषणा गरे पनि कार्यान्वयन भएको छैन । सीता एयरको उद्घाटन उडानमार्फत कर्णाली प्रदेशका मुख्यमन्त्री महेन्द्रबहादुर शाहीसहितको टोली केही समयअघि हुम्ला पुग्यो । मुख्यमन्त्री शाहीले समेत नियमित उडान गराउने व्यवस्था मिलाइने बताएका थिए । तर, त्यसपछि सीताले अर्को उडान गरेको छैन । यात्रु नपाएर नियमित उडान नभएको एयरलाइन्सले दाबी गरे पनि सुर्खेतबाट टिकट वितरण सुरु नगरेको यात्रुको गुनासो छ ।

सुर्खेतबाट हुम्ला आउन खोजेका स्थानीय पुन्दबहादुर शाहीले एयरलाइन्सले आफूलाई टिकट नदिएको बताए । ‘नेपालगन्जबाट टिकट नपाएपछि सुर्खेतबाट पाइन्छ कि भनेर गएँ,’ उनले भने, ‘तर, एयरलाइन्सले कार्गाे उडान मात्र हुन्छ भनेर टिकट दिएन, तीन दिनको अनुरोधपछि मात्र कार्गो उडानमै सिमकोट पुगें ।’

निजी हवाई कम्पनीमध्ये समिट एयरले पनि सुर्खेतबाट यात्रु उडान गर्ने घोषणा गरेको थियो । समिटको सिमकोटस्थित कार्यालयका स्टेसन म्यानेजर गोविन्द लामाले एक–दुई उडान भए पनि कम्पनीले निरन्तरता नदिएको बताए । उनका अनुसार नेपालगन्ज जाने यात्रु धेरै हुने भएकाले सुर्खेतबाट उडान नगरेको हो ।

यसैबीच चार्टर उडानका नामबाट चर्काे भाडा लिने निजी हवाई कम्पनीले केही समययता सिमकोट आउँदाको भाडा घटाएका छन् ।

सिमकोटबाट फर्कंदाको भाडा भने बढाइएको छ । नेपालगन्जबाट १२ हजारसम्म लिने र सुर्खेतबाट १० हजारभन्दा बढी भाडा असुल्ने निजी हवाई कम्पनीले अहिले नेपालगन्जबाट ७ हजार २ सय र सुर्खेतबाट ५ हजार २ सय भाडा लिने गरेका छन् ।

त्यस्तै सिमकोटदेखि नेपालगन्ज र सुर्खेतका लागि ५ हजार २ सयदेखि ५ हजार ५ सयसम्म दिइने गरेको भाडा बढेको छ । निजी हवाई कम्पनीले अहिले नेपालगन्जका लागि ७ हजार २ सय र सुर्खेतका लागि ५ हजार २ सय भाडा लिने गरेका छन् । फर्कंदाको भाडा बढाएको भन्दै उद्योग वाणिज्य संघले भाडा घटाउन माग गर्दै आन्दोलन गरेको थियो ।

प्रकाशित : श्रावण १, २०७५ ०८:४१
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

काठमाडौं किंग्समा यूएईका कप्तान

कान्तिपुर संवाददाता

काठमाडौँ — यूएईका कप्तान रोहन मुस्ताफाले टीभीएस ईपीएलमा काठमाडौं किंग्स इलेभेनबाट खेल्ने भएका छन् । गत सिजन ईपीएलमा प्लेअफ पुग्न नसकेको किंग्सले सोमबार मुस्ताफाले आफ्नो टोलीबाट खेल्न लागेको जनाएको छ । यसअघि नै टोलीले आयरल्यान्डका केभिन ओ’ब्राइनलाई पनि अनुबन्ध गरेको घोषणा गरिसकेको छ ।

मुस्ताफाले यूएईबाट २६ वान–डे अन्तर्राष्ट्रिय र २४ टान्टी–२० मा सहभागिता जनाइसकेका छन् । उनकै कप्तानीमा यूएई फेब्रुअरीमा जिम्बावेमा भएको आईसीसी विश्वकप छनोटमा सातौं हुँदै लगातार दोस्रो वर्ष वान–डे अन्तर्राष्ट्रिय मान्यता राष्ट्र बनेको थियो । मुस्ताफा एक दशकदेखि यूएईबाट खेल्दै आएका छन् ।

मुस्ताफा दोस्रोपल्ट नेपाल आएर खेल्न लागेका हुन् । चैतमा वैशाखमा सम्पन्न रुस्लान धनगढी प्रिमियर लिगमा उनले सोपमाल कामीको कप्तानीमा रहेको टिम चौराह धनगढीबाट खेलेका थिए । स्थानीय टोली धनगढीलाई विजेता बनाउने क्रममा मुस्ताफा १ सय ९८ रन बनाउनुका साथै ५ विकेट लिएपछि म्यान अफ द सिरिजमा चुनिएका थिए । काठमाडौं गोल्डेन्सविरुद्ध उनले फाइनलमा ६० रन बनाउँदै म्यान अफ द फाइनल चुनिएका थिए ।

किंग्सको मार्की खेलाडीमा सोमपाल नै छन् । सोमपालकै कप्तानीमा किंग्सले गत सिजनको ईपीएलमा खेलेको थियो ।

प्रकाशित : श्रावण १, २०७५ ०८:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT