साँघुरियो शोधनान्तर घाटा

गत वर्षको ११ महिनामा शोधनान्तर ७४ अर्ब २३ करोड रुपैयाँले बचतमा थियो । गत वैशाखको तुलनामा जेठ महिनाको शोधनान्तर घाटा साढे १४ अर्ब रुपैयाँले कम हो । गत वैशाखमा यस्तो घाटा १८ अर्ब ९३ करोड रुपैयाँ थियो । उक्त अवधिमा रेमिटयान्स आप्रवाह बढेकाले शोधनान्तर घाटामा सुधार देखिएको राष्ट्र बैंकले जनाएको छ ।

शोधनान्तर र चालु खातामा गत वर्षदेखि नै चाप पर्न थालेको थियो । गत आर्थिक वर्ष पहिलो २ महिना (साउन र भदौ) मा पनि शोधनान्तर ऋणात्मक थियो । त्यसपछिका महिनाहरूमा शोधनान्तरमा सुधार देखिँदै आए पनि चालु खाता ऋणात्मक रहेको थियो । यो आर्थिक वर्षको सुरुका दुई महिनामा पनि पुरानै प्रवृत्ति दोहोरियो र शोधनान्तर ऋणात्मक बन्यो । त्यसपछिका दुई महिना (असोज र कात्तिक) महिनामा शोधनान्तर बचतमा देखिए पनि आकार घट्दै गएको थियो । त्यसपछिका सबै महिनामा शोधनान्तर लगातार घाटामा छ ।

अघिल्ला वर्षहरूमा वार्षिक व्यापार घाटाको रकमभन्दा बढी रेमिटयान्स भित्रिँदै आएकाले घाटाको प्रभाव खासै देखिएको थिएन । तर, पछिल्ला वर्षहरूमा रेमिटयान्स आप्रवाह र व्यापार घाटाबीचको अन्तर फराकिलो बन्दै गएकाले अवस्था चुनौतीपूर्ण बन्दै गएको अर्थविद्हरूले जनाएका छन् ।

चालु आर्थिक वर्षको ११ महिनामा ६ खर्ब ७९ अर्ब ७३ करोड रुपैयाँ रेमिटयान्स मुलुक भित्रिएको छ । गत वर्षको सोही अवधिको तुलनामा यो ७.३ प्रतिशतले बढी हो । अघिल्लो वर्षको सोही अवधिमा यस्तो रेमिटयान्स ५.८ प्रतिशतले बढेको थियो ।

गएको ११ महिनामा मुलुकको व्यापार घाटा १० खर्ब ३३ अर्ब रुपैयाँ पुगेको छ । गत वर्षको सोही अवधिको तुलनामा यो २४.६ प्रतिशतले बढेको हो । समीक्षा अवधिमा निर्यात–आयात अनुपात ६.७ प्रतिशत कायम भएको छ । यस्तो परिसूचक अघिल्लो वर्षको सोही अवधिमा ७.५ प्रतिशत रहेको राष्ट्र बैंकको तथ्यांक छ ।

यसैगरी ०७५ जेठमा वार्षिक विन्दुगत उपभोक्ता मूल्य वृद्धिदर ४.१ प्रतिशत पुगेको छ । यस्तो मूल्यवृद्धिदर ०७४ जेठमा २.८ प्रतिशत थियो । खाद्य वस्तुको मूल्यमा आएको वृद्धिका कारण अघिल्लो वर्षको तुलनामा समग्र मूल्य वृद्धिदर बढ्न गएको राष्ट्र बैंकले जनाएको छ ।

प्रकाशित : श्रावण २, २०७५ ०७:३१