नेप्से र कारोबार रकम दुवै बढे

दिनभरको कारोबारमा परिसूचक ४.७७ अंकले बढेपछि समग्र नेप्से १ हजार १ सय ९९ विन्दुमा पुगेको छ । अघिल्लो दिनको तुलनामा यो ०.४० प्रतिशतले बढी हो । उक्त दिन बजार खुलेदेखि नै सुधारको बाटोमा देखिएको नेप्से अन्त्यसम्म पनि बढी नै रहयो । कारोबारमा आएकामध्ये उत्पादन तथा प्रशोधन र लघुवित्तबाहेक बाँकी सबै समूहको परिसूचक बढेपछि समग्र नेप्से करिब ५ अंकले उकालो लागेको हो ।

करिब चार हजार कारोबारमा १ सय ६० कम्पनीका ११ लाख ८९ हजार ६ सय ८९ कित्ता सेयर किनबेच भए । ती कारोबारबाट २९ करोड ४१ लाख रुपैयाँ परिचालन भयो । अघिल्लो दिनको तुलनामा कारोबार रकम करिब ८ करोड रुपैयाँले बढी हो । परिसूचक बढेपछि सेयर बजारको आकार कुल बजार पुँजीकरण पनि बढेर १४ खर्ब १९ अर्ब रुपैयाँ कायम भएको छ ।

मंगलबार होटल समूहको परिसूचक २.७९ प्रतिशतले बढयो । यसैगरी बैंकिङलगायत ८ वटा समूहको परिसूचक एक प्रतिशतभन्दा कमले बढे । उक्त दिन उत्पादन तथा प्रशोधन समूहको परिसूचक ०.८८ र लघुवित्त समूहको परिसूचक ०.०४ प्रतिशतले ऋणात्मक रहेको नेप्सेले जनाएको छ । मंगलबार नेपाल दूरसञ्चार कम्पनीको मात्र १ करोड ७१ लाख बराबरको सेयर कारोबार भएको छ ।