लाङटाङ आउने पर्यटक बढ्दै

बलराम घिमिरे

रसुवा — लाङटाङ क्षेत्र घुम्न आउने पर्यटकहरूको संख्या भूकम्पपछि क्रमिक रूपमा बढ्दै गएको छ ।भूकम्पपछिको तीन वर्षमा करिब २९ हजार विदेशी पर्यटकले लाङटाङ क्षेत्रको भ्रमण गरेका छन् । सार्क र अन्य राष्ट्र गरी २९ हजार १ सय १९ पर्यटक निकुञ्ज भित्रिएका हुन् ।


लाङटाङ राष्ट्रिय निकुञ्जको तथ्यांकअनुसार भूकम्प गएको वर्ष ४ हजार २ सय ९२, आर्थिक वर्ष २०७३/७४ मा ११ हजार ६८ र आर्थिक वर्ष २०७४/७५ मा १३ हजार ७ सय ५९ पर्यटकले लाङटाङ क्षेत्रको भ्रमण गरेका छन् । भूकम्प जानुभन्दा अगाडि करिब १६ हजार पर्यटक लाङटाङ घुम्न आएका थिए ।

Yamaha

भूकम्प गएको वर्ष घुम्न आउने पर्यटक घटेर ४ हजारमा झरेको थियो । अहिले लाङटाङ क्षेत्र घुम्न आउने पर्यटकहरूको संख्या बढेर भूकम्प जानुभन्दा अगाडिकै अवस्थामा पुगेको लाङटाङ राष्ट्रिय निकुञ्जका प्रमुख संरक्षण अधिकृत युवराज रेग्मीले बताए ।

२०७२ वैशाख १२ गतेको भूकम्पले लाङटाङ क्षेत्रको पर्यटनमा ठूलो क्षति पुगेको थियो । लाङटाङ क्षेत्र अहिले पुनर्निर्माणसँगै पुरानै अवस्थामा पुगेको छ । भूकम्पले भत्काएका तीनवटै पर्यटकीय पदमार्गहरूको मर्मत तथा सुधार तथा होटलहरू पुनर्निर्माण भएका छन् । बस्ती नजिकैबाट लाङटाङ ग्लासियर र हिमालको अवलोकन गर्न सकिने भएकाले पर्यटकको रोजाइमा लाङटाङ क्षेत्र पर्ने गरेको लाङटाङका स्थानीय पर्यटन व्यवसायी तेम्बा लामाले बताए । ‘काठमाडौंबाट छोटो र सजिलो पदमार्गमा लाङटाङ क्षेत्र पर्छ,’ उनले भने, ‘थोरै दिनमा एकैपटक धेरै कुरा हेर्न सकिन्छ । त्यसैले लाङटाङ घुम्न पर्यटकले मन पराउँछन् ।’

भूकम्पपछि लाङटाङको अवस्था हेर्न आउने पर्यटकहरू धेरै रहेको लामाले भने । नेपालको तेस्रो पर्यटकीय पदमार्गका रूपमा लाङटाङ क्षेत्रलाई लिइन्छ । पुनर्निर्माण सँगै पुरानै अवस्थामा फर्किसकेको घोडातबेलाका होटल व्यवसायी ढिन्डुप तामाङले बताए । ‘पर्यटक बस्नका लागि सुरक्षित होटल र घर बनिसके,’ उनले भने, ‘भूकम्पले भत्काएको गोरेटो बाटो र पुल पनि निर्माण भइसक्यो ।’

निकुञ्जमा आउने पर्यटकमध्ये करिब ९० प्रतिशत पर्यटक लाङटाङ तथा क्यान्जिन घुम्न जाने गरेको लाङटाङ राष्ट्रिय निकुञ्जका सूचना अधिकारी अजित पराजुलीले बताए । निकुञ्जभित्र पर्यटक भित्र्याउनका लागि लाङटाङ राष्ट्रिय निकुञ्ज र गोसाइँकुण्ड गाउँपालिकाले ‘पर्यटन प्रवद्र्धन’ का कार्यक्रम सञ्चालन गरिरहेका छन् । पर्यटकका लागि रसुवामा घुम्न तीनवटा पदमार्ग छन् ।

प्रकाशित : श्रावण २४, २०७५ ०७:४१
ADVERTISEMENT
प्रतिक्रिया
पठाउनुहोस्
ADVERTISEMENT

रसुवागढी नाका एक सातादेखि ठप्प

बलराम घिमिरे

रसुवा — रसुवागढी नाकामा एक सातादेखि यातायात ठप्प भएको छ । गोसाइँकुण्ड गाउँंपालिका २, घट्टेखोला पुलमा बाढीले क्षति पुर्‍याएपछि नाका ठप्प भएको हो ।

बाढीले क्षति पुर्‍याएको पुल मर्मतमा ढिलाइ हुँदा साउन १२ देखि यातायात ठप्प भएको हो । जोखिम बढेपछि अन्तर्राष्ट्रिय व्यापारिक नाका केरुङ चल्ने सवारीसाधन सञ्चालनमा रोक लगाइएको प्रमुख जिल्ला अधिकारी कृष्ण पौडेलले बताए । ‘साना–ठूला दुवै किसिमका सवारीसाधन सञ्चालनमा रोक लगाएका छौँ,’ उनले भने ।

नाकामा यातायात ठप्प भएपछि स्याउ, लसुनलगायत सामग्री कुहिन थालेका छन् । केरुङबाट आयात गरिएका सामान कुहिन थालेपछि व्यापारीलेहरू भरियालाई बोकाएर सामान टिमुरेतर्फ ल्याउन गरेका छन् । यातायात नचलेकाले साउनको भन्सार असुलीमा कमी आउने रसुवा भन्सार कार्यालयका प्रमुख भन्सार अधिकृत गोपाल कोइरालाले बताए । ‘लामो समयसम्म यातायात ठप्प भयो भने साउन महिनाको राजस्व लक्ष्य पूरा गर्न गाह्रो छ,’ उनले बताए ।

मंगलबारदेखि पुलको मर्मत गर्न थालिए पनि साइडमा निर्माण सामग्री नभएकाले कामले गति लिन सकेको छैन । पुल मर्मतका लागि चाहिने निर्माण सामग्री आयात हुन नसक्दा मर्मतमा ढिलाइ भएको डिभिजन सडक कार्यालय नुवाकोटका डिभिजन प्रमुख नीरज शाक्ले बताए । पासाङल्हामु मार्गको त्रिशूली–बेत्रावती खण्डको तिरतिरे भीरमा पहिरो गएपछि निर्माण सामग्री उतै रोकिएकाले ढिला भएको उनले बताए ।

मर्मतका लागि आवश्यक गिट्टी, बालुवा, सिमेन्ट, रड, जाली र फर्मा शनिबार साइडमा आइपुग्ने शाक्यको भनाइ छ । ‘निर्माण सामग्री आइपुगेपछि काम द्रुत गतिमा अघि बढ्छ,’ उनले भने । पानीको बहाव उच्च भएकाले ठुल्ठूला ढुंगा खसालेर ढलान गर्न लागिएको छ । आइतबारबाट पुलको जगमा ढलान गर्ने काम सुरु हुन्छ । ढलान गर्दा छिट्टै सेट हुने सिमेन्ट प्रयोग हुने शाक्यले बताए । पुल मर्मत सुरु गरेको १५ दिनभित्र यातायात सञ्चालनमा ल्याउने कार्यालयको लक्ष्य छ । पुलको जगमा ढलान गरे पनि सडक विभागको पुल माहाशाखाको प्राविधिक टोलीसँग परमर्श गरेर मात्र यातायात सञ्चालन गरिने शाक्यले बताए ।

पुल मर्मत नहुंँदा सामग्री आयात गरी नेपाल आउन लागेका कन्टेनर रसुवागढी नाकापारि नै रोकिएका छन् । नेपालतर्फ आउन र चीनतर्फ जान लागेका करिब २ सय बढी कन्टेनर बीचबाटोमै रोकिएका छन् । बाढीले पुलको टिमुरेतर्फको पिलरमा क्षति पुर्‍याएको छ । पुलको लम्बाइ ५१ मिटर छ । यो पुल चीन सरकारले स्याफ्रुबेंसी–रसुवागढी सडक निर्माण गर्दा बनाइदिएको हो ।

यसले चीनसँगको अन्तर्राष्ट्रिय नाका रसुवागढी जोड्छ । भूकम्पले तातोपानी नाका बन्द भएपछि २०७२ मंसिरदेखि रसुवागढी नाकाबाट सामग्री आयात तथा निर्यात हँुदै आएको छ । रसुवागढी नाकालाई चीनले २०७४ भदौ १४ गते अन्तर्राष्ट्रिय नाका घोषणा गरिसकेको छ । रसुवागढी नाका हुँदै चीनबाट तयारी कपडा, स्याउ, जुत्ताचप्पल, रबर, हातेझोला, मोटर ब्याट्री, यूपीएस, प्लास्टिकका सामग्रीलगायत आयात हुने गरेका छन् ।

प्रकाशित : श्रावण २०, २०७५ ०८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT