हाँस–कुखुरालाई २ रुपैयाँ कर

तरकारी र मोटरसाइकलमा पोका वा झोलामा सामान राखेर विक्री गर्दै हिँड्नेलाई १० रुपैयाँ कर तोकियो
आश गुरुङ

लमजुङ — बेंसीसहर नगरपालिकाले हाँस, कुखुरा र अन्य पन्छीको आयातमा २ रुपैयाँ कर लगाएको छ । नगरवासीलाई नभइ बाहिरबाट विक्री गर्न ल्याउनेलाई कर लगाएको हो ।

‘हामीले कुखुरा र हाँसमा २ रुपैयाँ कर लिने निर्णय गरेका छौँ। घरमा पालिएकालाई लिने होइन। जसले बाहिरी जिल्ला वा स्थानीय तहबाट गाडीमा ल्याएर विक्री गर्न खोज्छ, उनीहरुलाई लिने भनेका हौँ,’ नगर प्रमुख गुमानसिंह अर्यालले भने।

हाटबजार लाग्दा व्यवसायिक रुपमा विक्रीका लागि ल्याइने पन्छी तथा पशुमा पनि कर लिइनेछ। ‘सबैले करको विरोध गरेका छन्। बुझेर मात्रै विरोध गर्नुपर्छ,’ उनले भने। आलु, तरकारी तथा पोका वा झोलामा सामान राखेर मोटरसाइकलमा विक्री गर्ने हिँड्नेलाई भने १० रुपैयाँ कर तोकिएको छ।

आर्थिक ऐन २०७५ अनुसार खसी, बोकामा प्रतिगोटा २५ रुपैयाँ र राँगा, भैंसी तथा बंगुरमा प्रतिगोटा ५० रुपैयाँ कर तोकेको छ। नगरपालिकाले अधिकतम् ३५ हजार रुपैयाँसम्म कर तोकेको जनाएको छ।

एकीकृत सम्पत्ति करतर्फ ३ करोडदेखि ५ करोडसम्म सम्पत्ति हुनेका लागि ३५ हजार रुपैयाँ र ५ करोडमाथि सम्पत्ति हुनेका लागि प्रतिहजारमा २ रुपैयाँका दरले कर तोकेको नगरपालिकाले जनायो।

एकीकृत सम्पत्ति करमा सबैभन्दा कम १ लाखदेखि १० लाखसम्म सम्पत्ति हुनेका लागि १ सय ५० रुपैयाँ तोकिएको छ। नगरपालिकाका प्रमुख प्रशासकीय अधिकृत भीमप्रसाद तिवारीले सम्पत्ति कर पूर्ण रुपमा लागू भएको र अन्य कर लागू गर्ने तयारीमा रहेको बताए।

नगरपालिकाले आर्थिक वर्ष ०७५/७६ को एकीकृत सम्पत्ति कर सोही चालु आवको पुस मसान्तसम्म बुझाउनेलाई ५ प्रतिशत छुटको व्यवस्था समेत गरेको छ।

अर्को आर्थिक वर्षमा बुझाए १० प्रतिशत र त्यसपछि ५ प्रतिशतका दरले बढदै जानेछ। नगरपालिकाले पटके सवारी कर नलिने निर्णय गरेको छ। यस्तै, ग्रामीण भेगबाट डोका र डालामा तरकारी तथा फलफूल राखी बजार घुमाएर बेच्ने किसानको हकमा व्यवसायिक कर नलिने नगरपालिका प्रमुख अर्यालले बताए।

बेंसीसहरको व्यवसायिक कर उठाउने जिम्मा नगरपालिकाले लमजुङ उद्योग वाणिज्य संघलाई दिएको छ। संघले चालु आर्थिक वर्षमा व्यवसायिक करबापत उठेको रकमको २५ प्रतिशत राखेर नगरपालिकालाई बुझाउनेछ। संघका अध्यक्ष राजेश थापाले गत आर्थिक बर्षदेखि व्यवसायीलाई कर उठाउँदै आएको बताए।

नगरपालिकाले नागरिकता सिफारिसमा वंशजको १ सय र अंगिकृतको २ हजार र राहदानी सिफारिस ३ सय रुपैयाँ तोकेको छ। जन्ममृत्यु सिफारिस १ सय, नामथर संशोधन १ सय, नाता प्रमाणित नेपालीमा २ सय ५० र अंग्रेजीमा ५ सय तोकेको छ।

नगर प्रमुख अर्यालका अनुसार अहिलेसम्म बेंसीसहर नगरपालिकाले लगाएको करबारे विवाद र विरोध आएको छैन। ‘गत आर्थिक बर्षमै निर्णय गराएका थियौं। अहिले पनि लगभग त्यही निर्णय हो। कहींकतैबाट विरोध छैन’ उनले भने।

नगरपालिकाले सम्पत्ति कर, भूमि कर (मालपोत), घरबहाल कर, व्यवसाय कर, जटिुबटी, कवाडी र जीवजन्तु कर, सवारी साधन कर, विज्ञापन कर, मनोरञ्जन कर, बहाल बिटोरी शुल्क, पार्किङ शुल्क, ट्रेकिङ, कायाकिङ, क्यानोनिइङ, बन्जीजम्प, जीपफ्लायर र र्‍याफ्टिङ कर, सेवा शुल्क तथा दस्तुर, पर्यटक शुल्क गरी १३ शीर्षकमा कर लिने निर्णय गरेको छ। तर, अधिकांश कार्यान्वयनमा नआएको नगरपालिकाले जनाएको छ।

प्रकाशित : भाद्र ३, २०७५ १८:५०
प्रतिक्रिया
पठाउनुहोस्

उपप्रधानमन्त्रीद्वारा दूतावास पुगेर वाजपेयीप्रति श्रद्धाञ्जलि

कान्तिपुर संवाददाता

काठमाडौँ — उपप्रधान एवं रक्षामन्त्री ईश्वर पोखरेलले नेपाल सरकारको तर्फबाट भारतका पूर्वप्रधानमन्त्री अटलविहारी वाजपेयीको निधनप्रति श्रद्धाञ्जलि व्यक्त गरेका छन् । 

लैनचौरस्थित दूतावासमा आइतबारदेखि राखेको शोक पुस्तिकामा नेपाल सरकारको तर्फबाट समवेदना सन्देश व्यक्त तथा स्वर्गीय वाजपेयीको तस्बिरमा माल्यार्पण गर्दै श्रद्धाञ्जलि व्यक्त गरेका हुन् । रक्षामन्त्री पोखरेललाई भारतीय राजदूत मन्जिव सिंहले स्वागत गरेका थिए । निष्ठावान‍् राजनीतिज्ञको परिचय बनाएका ९३ वर्षीय वाजपेयीको बिहीबार निधन भएको थियो । दुतावासमा राखिएको शोक पुस्तिकामा श्रद्धाञ्जलि व्यक्त गर्दै उपप्रधानमन्त्री पोखरेलले वाजपेयीलाई उच्च व्यक्तित्वका धनी, देशभक्त र सुदूर दृष्ट्रिकोण भएको नेताको रूपमा विश्व जगतले सम्झिरहने उल्लेख गरे ।

‘विश्वका जनताले उच्च व्यक्तित्वका धनि, वाक क्षमता, देशभक्ति र सुदूर दृष्टिकोण भएका नेताको रुपमा वाजपेयीका योगदानलाई चीरकालसम्म सम्झिरहनेछन्,’ आजैदेखि राखिएको शोक पुस्तिकामा उनले लेखे, ‘सन् २००२ मा नेपालमा भएको सार्क सम्मेलनका क्रममा नेपाल–भारतकाबीच विकसित भएको द्विपक्षीय सम्बन्धलाई नेपाली जनताले स्मरण गरिरहेका छन् ।’

उनले भावविह्वल भएको भारतीय सरकार र त्यहाँ जनतासँग नेपालको पूर्ण साथ रहेको शोक सन्देशमा उल्लेख गरे । सरकारले यसअघि परराष्ट्रमन्त्री प्रदीप ज्ञवालीलाई बाजपेयीको अन्त्येष्टिमा सहभागी हुन दिल्ली पठाएको थियो ।

प्रकाशित : भाद्र ३, २०७५ १८:३९
पूरा पढ्नुहोस्
प्रतिक्रिया
पठाउनुहोस्