मृतकका परिवारलाई क्षतिपूर्ति र घाइतेको उपचार खर्च व्यहोर्ने प्रदेश सरकारको निर्णय 

अर्जुन शाह

धनगढी — धनगढीप्रदेश सरकारले कञ्चनपुरमा भएको झडपमा शुक्रबार मृत्यु भएकाका परिवारलाई क्षतिपूर्ति दिने भएको छ ।  मन्त्रिपरिषद्को शनिबार आकस्मिक बैठकले मृतक सन्नी खुनाका परिवारलाई क्षतिपूर्ति र घाइतेलाई उपचार खर्च दिने निर्णय गरेको हो । क्षतिपूर्ति रकम भने खुलाएको छैन ।  

मन्त्रालयमै शनिबार पत्रकार सम्मेलन गर्दै सरकारका प्रवक्तासमेत रहेका आन्तरिक मामिला तथा कानुनमन्त्री प्रकाशबहादुर शाहले कञ्चनपुरमा किशोरी बलात्कारपछि हत्यामा संलग्न दोषीलाई कारबाही र पीडितलाई न्याय दिलाउन केन्द्र र प्रदेश सरकार प्रतिबद्ध रहेको बताए । उनले घटनाको अनुसन्धानमा सहयोग गर्नसमेत आग्रह गरेका छन् ।

Yamaha

‘प्रदेश सरकारकै आग्रहमा केन्द्र सरकारले उच्चस्तरीय छानबिन समिति पठाएको हो’ प्रवक्ता शाहले भने ‘आम नागरिकले उच्चस्तरीय छानबिन समितिलाई काम गर्ने वातावरण दिनुपर्छ ।’
कञ्चनपुरमा उत्पन्न परिस्थितिबारे छलफल गर्न सुरक्षा निकायका प्रमुखसहित शनिबार बिहान मन्त्रिपरिषद्को आकस्मिक बैठक बसेको मन्त्री शाहले बताए । कञ्चनपुरकी किशोरीको बलात्कारपछि हत्याको घटनाले हाल सबैलाई संवेदनशील बनाएको बताउँदै शाहले भने, ‘समस्या समाधानका लागि हामी केन्द्र सरकारसँग निरन्तर समन्वयमा छौं, चाँडै सबै कुरा ठीक हुन्छ ।’

प्रकाशित : भाद्र ९, २०७५ १६:५२
ADVERTISEMENT
प्रतिक्रिया
पठाउनुहोस्
ADVERTISEMENT

कञ्चनपुरमा सर्वपक्षीय बैठकद्वारा ४ बुँदे सहमति, कर्फ्यु जारी

भवानी भट्ट

कञ्चनपुर — जिल्ला प्रशासन कार्यालयले किशोरी बलात्कार र हत्याको घटनालाई लिएर चर्किएको आन्दोलन शान्त बनाउने प्रयासस्वरुप सरोकारवाला पक्षसँग छलफल गरी ४ बुँदे सहमति गराएको छ । 

सर्वदलीय र सर्वपक्षीय बैठकमा प्रहरीको गोली लागी मृत्यु भएकालाई सहिद घोषणासँगै क्षतिपूर्तिका लागि तीनै तहका सरकारसँग आग्रह गर्ने, आन्दोलनका घाइते व्यक्तिको समयमै उपचारको व्यवस्था र शारीरिक अशक्तता भएकाहरुलाई जीविकोपार्जनका लागि यथोचित व्यवस्था गर्न आग्रह गर्ने सहमति भएको प्रमुख जिल्ला अधिकारी तारानाथ अधिकारीले जानकारी दिए। चार बुँदे सहमति भए पनि शुक्रबार राति ८ बजेदेखि लगाइएको कर्फ्यु भने यथावत छ। प्रशासनले अर्को निर्णय नहुँदासम्मका लागि कर्फ्यु जारी गरेको हो। लगातारको कर्फ्युका कारण जनजीवन पनि प्रभावित बनेको छ।

यसैगरी, आन्दोलनका क्रममा सरकारी र व्यक्तिगत सम्पत्तिमा पुगेको क्षति र भीड नियन्त्रण गर्न भएको दमन र गोली चलाइएको विषयमा निष्पक्ष छानबिन गरी दोषीउपर कडा कारबाहीका लागि समिति गठन गर्न सरकारसँग आग्रह गर्ने, जिल्लामा शान्ति सुव्यवस्था कायम राख्न राजनीतिक दल, नागरिक समाज, सञ्चारकर्मी, उद्यमी व्यवसायी सबै क्षेत्रबाट आवश्यक सहयोग गरी सहज वातावरण बनाइ विरोधका कार्यक्रम आजैबाट बन्द गर्न अपिल गर्ने निर्णय भएको प्रजिअ अधिकारीले बताए। शुक्रबार साँझ आन्दोलन उग्र बनेपछि प्रहरीले चलाएको गोली लागेर १ बालकको मृत्यु भएको थियो।

छलफलमा विभिन्न राजनीतिक दलका प्रमुख एवं प्रतिनिधि, अधिकारकर्मी, नागरिक समाज, उच्चास्तरीय छानबिन समितिका सदस्यहरु, सुरक्षा निकायका प्रमुखलगायतको उपस्थिति थियो।

प्रकाशित : भाद्र ९, २०७५ १६:३२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT