चीनले गर्‍यो ‘न्यू सिल्क रोड’ को बचाउ

एपी

बेइजिङ — चिनियाँ अधिकारीहरूले बेइजिङको ‘न्यू सिल्क रोड’ बनाउने पहलको सोमबार बचाउ गरेको छ । मलेसियाले चीनद्वारा बनाइने दुइटा ठूला परियोजना रद्द गरेपछि बेइजिङको यो भनाइ सार्वजनिक भएको हो ।

परियोजना निर्माण गरिने मुलुकहरूले चीनले आफूहरूमाथि ऋणको भारी बोकाउने गुनासो गर्दै आएका छन् । उक्त गुनासाहरू चिर्न बेइजिङको पछिल्लो स्पस्टोक्ति आएको हो ।

चिनियाँ मन्त्रिपरिषद्का योजना नियोग उप–प्रमुख निङ जिझेले विदेशी सञ्चार माध्यममा यसबारे आएका समाचारको खण्डन गर्दै भने, ‘परियोजना लागू हुने मुलुकहरूलाई ऋणको समस्या आउँदैन ।’ उनले यो ऋणमा फसाउने योजना नभएको बताए । ‘परियोजनाले सम्बन्धित मुलुकका नागरिकको जीवनशैली र आर्थिक विकासलाई बढावा मिल्नेछ ।’

Yamaha

सन् २०१३ मा राष्ट्रपति सी जिङपिङको यो कदमको केही मुलुकका सरकारहरूले स्वागत गरेका थिए । एसियाली विकास बैंकले आर्थिक विकासका लागि सन् २०३० सम्म निर्माण गरिने भौतिक संरचनाका लागि २६ ट्रिलियन अमेरिकी डलर खर्चिनुपर्ने जनाइसकेको छ । चिनियाँहरू ‘वन बेल्ट, वन रोड’ र अंग्रेजीमा ‘बेल्ट एन्ड रोड इनिसिएटिभ’ भनिएको उक्त परियोजना एउटा व्यापारिक लगानी हो । यसलाई सहयोग भन्न मिल्दैन । चिनियाँ अधिकारीले व्यापारिक विषयलाई वित्तीय भन्न नमिल्ने प्रतिक्रिया दिएका छन् ।

चीनले यो परियोजनाका लागि गैर–चिनियाँ लगानीकर्तालाई आकर्षित गर्न चाहेको छ । तर, यो परियोजनाअन्तर्गत निर्माण गरिने रेलमार्ग, ऊर्जा केन्द्र, राजमार्ग र अन्य कार्यमध्ये केही मात्रै ती लगानीकर्ताहरूले बनाउन सक्ने बताइएको छ ।

अमेरिका, जापान र भारतलगायतका केही मुलुकले बेइजिङले आफ्नो प्रभाव बढाउनका लागि चीन–केन्द्रित निर्माणलाई अघि बढाउने प्रयास गरेको भन्दै चिन्ता व्यक्त गर्दै आएका छन् । केही चिनियाँ नेतृत्वको परियोजना धेरै महँगो भएको गुनासो गरिएको छ । ती परियोजनाहरूमा स्थानीय कन्ट्रयाक्टरलाई थोरै काम गर्न दिएको छ । थाइल्यान्ड, टान्जानिया, श्रीलंका र नेपाललगायतका केही मुलुक पछाडि हटिसकेका छन् या परियोजनाबारे फेरि छलफल सुरु गरिसकेका छन् ।

मलेसियाली प्रधानमन्त्रीले २० अर्ब अमेरिकी डलरको रेलमार्गसहितका परियोजना रद्द गर्ने घोषणा गरेका थिए । उनले यो परियोजनामा खर्च हुने ठूलो रकम आफ्नो मुलुकले तिर्न नसक्ने बताएका थिए । डिसेम्बरमा श्रीलंकाले बेइजिङसँग डेढ अर्ब डलर ऋण भुक्तानी गर्न नसकेपछि हक्बान्टोटास्थि बन्दरगाह चिनियाँ कम्पनीको नियन्त्रणमा दिन बाध्य भएको थियो ।

प्रकाशित : भाद्र १२, २०७५ ०८:०७
ADVERTISEMENT
प्रतिक्रिया
पठाउनुहोस्

अमेरिकी सिनेटर म्याक्केनको निधन

एपी

वासिङ्टन — अमेरिकाको राष्ट्रपतीय निर्वाचनका उम्मेदवार तथा भियतनामा युद्धमा चर्चित अमेरिकी राजनीतिज्ञ जोन म्याक्केनको आइतबार निधन भएको छ ।

उनको अमेरिकाको एरिजोनामा निधन भएको हो । मस्तिष्क क्यान्सरबाट पीडित म्याक्केनले सन् २०१७ को जुलाईदेखि उपचार गराइरहेका थिए । उनको ८१ वर्षमा निधन भएको हो ।

गम्भीर मस्तिक क्यान्सरको सामान गरिरहेका म्याक्केनले अस्पतालमा गराउँदै आएको उपचार रोक्ने शुक्रबार परिवारले जनाएको थियो । भियतनाम युद्धका नायक म्याक्केन सैनिक जीवनबाट अवकाश लिएसँगै राजनीतिमा प्रवेश गरेका थिए । उनी युद्धमा संलग्न अमेरिकी लडाकु जहाजको पाइलट थिए ।

अमेरिकी राजनीतिमा आक्रामक स्वभावका म्याक्केनले कतिपय नीतिमा पार्टी धारणाभन्दा भिन्न विचार राख्ने गर्थे । रिपब्लिकन पार्टीका वरिष्ठ नेता म्याक्केन अमेरिकी राष्ट्रपति डोनाल्ड ट्रम्पका कट्टर आलोचक मानिन्थे ।

म्याक्केन अमेरिकाको एरिजोना राज्यबाट ६ पटक सिनेटरमा विजयी भएका थिए । यसअघि रिपब्लिकन पार्टीका तर्फबाट राष्ट्रपतिको उम्मेदवार बनेका म्याक्केन अमेरिकी पूर्वराष्ट्रपति बाराक ओबामासँग पराजित भएका थिए । ओबामासँग चुनावमा पराजित भएपछि पनि राजनीतिबाट अवकाश नलिएका म्याक्केन पुन: सिनेटमा निर्वाचित भएका थिए ।

अमेरिकी राजनीति र राष्ट्रपतिका नीतिमा खुला छलफल र कडा बहसमा उत्रन रुचाउने म्याक्केनको ट्रम्पसँग विभिन्न नीतिगत विषयमा मतान्तर रहेको थियो । सैनिक परिवारका म्याक्केनले संसद्को सैनिक सेवा समितिको अध्यक्षको रूपमा समेत भूमिका निर्वाह गरेका थिए । उनले विश्वका विभिन्न स्थानमा अमेरिकी सैनिकको व्यापक उपस्थिति रहनुपर्ने धारणा राख्ने गर्थे । उनले अमेरिकालाई ध्वस्त पार्न चाहने उग्रवादी इस्लामिक शक्तिको निसाना मेटाउनुपर्ने अभिव्यक्ति दिएपछि विवादमा समेत परेका थिए ।

सन् २०१७ मा राष्ट्रपति ट्रम्पले खारेज गर्न चाहेको जीवन बिमासम्बन्धी चर्चित विधेयक ‘एफोर्डेबल केयर एक्ट’ मा म्याक्केनले लामो छलफलपछि विपक्षमा मतदान गरेका थिए । उक्त मतका कारण ट्रम्पको प्रस्ताव विफल भएपछि ओबामा नीतिले निरन्तरता पाएको हो ।

म्याक्केनको निधनप्रति राष्ट्रपति ट्रम्प, पूर्वराष्ट्रपति बाराक ओबामालगायत अन्य विशिष्ट व्यक्तिले दु:ख व्यक्त गर्दै अमेरिकाले एक इमान्दार र असल व्यक्ति गुमाएको प्रतिक्रिया दिएका छन् ।

प्रकाशित : भाद्र ११, २०७५ ०८:२४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT