विशाखापट्टनम्मा अड्किएको मल आयात

शंकर आचार्य

पर्सा — रेल्वे र्‍याक नपाएर भारतको विशाखापट्टनम् बन्दरगाहमा लामो समयदेखि अड्किएको कृषि सामग्री कम्पनीको युरिया मल वीरगन्ज आउन थालेको छ ।

त्यहाँ अड्किएको ३० हजार टन युरिया मलमध्ये १ रेल्वे र्‍याक मल आइतबार सिर्सिया सुक्खा बन्दरगाहमा आइपुगेको कम्पनी वीरगन्ज क्षेत्रीय कार्यालय प्रमुख अजयकुमार श्रीवास्तवले जानकारी दिए । उक्त र्‍याकमा २ हजार ५ सय ५० टन रहेकामा सोमबारबाट मल परिचालनसमेत गर्न सुरु गरिसकिएको उनले बताए ।


कम्पनी वीरगन्ज क्षेत्रीय कार्यालयलाई यो लटमा करिब ८ सय टन मल पाएको र बाँकी अत्यधिक माग रहेको विराटनगर क्षेत्रीय कार्यालयलाई पठाइएको उनले बताए ।
भारतको इन्डियन पोटास लिमिटेडले ग्लोबल टेन्डरबाट नेपालसम्म ल्याउन लागेको मल वीरगन्ज ल्याउन रेल्वे र्‍याक नपाएर ढिलाइ भइरहेको थियो । बाँकी रहेको मल पनि क्रमश: आउने जानकारी पाएको श्रीवास्तवले बताए । ती मलले पनि धमाधम र्‍याक पाउन थालेकाले क्रमश: मल वीरगन्ज आइपुग्ने उनले बताए । २ र ३ नम्बर प्रदेशका जिल्लाहरूमा रासायनिक मलको वितरण गर्दै आएको कम्पनी क्षेत्रीय कार्यालयमा युरिया मलको मौज्दात झन्डै सकिएको थियो । कार्यालयसँग करिब ५० टन मल मात्र मौज्दात रहन गएको थियो ।

Yamaha


हाल धानबालीको सिजन भएकाले यो मलको अत्यधिक माग रहेको छ । विशेषगरी तराईका जिल्लाहरूमा अहिले धानबालीमा यो मल छरिँदै छ । भदौ महिनाभरि पनि यो क्रम जारी रहन्छ । हाल रौतहट, सर्लाही, महोत्तरी, धनुषा आदि जिल्लामा युरिया मलको माग बढी रहेको छ ।


आईपीएलको सम्झौताको मल आइपुगेपछि त्यसपछि पनि युरिया मल आउने श्रीवास्तवले बताए । विल्सन इन्टरनेसनल र देश ट्ेरडिङले ग्लोबल टेन्डरबाट युरिया मल ल्याउन लागेको उनले बताए । तर, तिनले ल्याउने मल के कति हो भनि यकिन जानकारी भने आइनसकेको उनले बताए ।


डीएपीको पर्याप्त मौज्दात
हाल उतिसारो माग नरहेको अर्को मल डीएपीको मौज्दात भने कम्पनी क्षेत्रीय कार्यालयसँग पर्याप्त रहेको छ । हाल कार्यालयसँग ७ हजार ५ सय टन डीएपी मौज्दात रहेको उनले बताए ।


यता साल्ट ट्ेरडिङ कर्पोरेसन लिमिटेड अञ्चल कार्यालय वीरगन्जको एक र्‍याक डीएपी मल आइतबार सिर्सिया सुक्खा बन्दरगाह आइपुगेको कार्यालय प्रमुख अमोज लामिछानेले जानकारी दिए । गत आर्थिक वर्षकै कोटाअनुसारको बाँकी रहेको ५ हजार टन डीएपीमध्ये आधा आइतबार आइपुगेको उनले बताए । बाँकी मल पनि केही दिनभित्रै आइपुग्ने उनले बताए ।


भारतकै आईपीएलले ग्लोबल टेन्डरबाट उक्त मल ल्याइरहेको उनले बताए । हाल डीएपी मलको माग कम रहेकाले आउँदो गहुँ सिजनका लागि उक्त मल उपयोगी हुने लामिछाने बताउँछन् ।

प्रकाशित : भाद्र १५, २०७५ ०८:४९
ADVERTISEMENT
प्रतिक्रिया
पठाउनुहोस्
ADVERTISEMENT

नाबालिका असुरक्षित

शंकर आचार्य

पर्सा — पटेर्वासुगौली गाउँपालिका–२ स्थित मकैबारीमा साउन ४ गते सुस्तमनस्थितिकी १५ वर्षीया किशोरीलाई छिमेकी केदारबहादुर कार्कीले जबर्जस्ती करणी गरे ।

त्यसै दिन पर्सागढी नगरपालिका–८ हरपुरकी १४ वर्षीया अर्की किशोरी पनि बलात्कारमा परिन् । घरमा कोही नभएको मौका छोपी उनलाई छिमेकी टैट महराले बलात्कार गरे ।
पछिल्लो समय पीडक पक्राउ पर्ने र कारबाही हुने क्रम पनि बढेको छ तर बलात्कारका घटनामा कमी आएको छैन । विशेष गरी नाबालिकामाथि ज्यादती बढदो छ ।

जिल्ला प्रहरी कार्यालयको तथ्यांकले जिल्लामा बलात्कार घटना बर्सेनि बढदै गएको देखाउँछ । गत वर्ष १६ घटना भएका छन् । त्यसभन्दा अघिल्लो वर्ष यस्ता १० घटना भएका थिए ।

गत आवमा जबरजस्ती करणी उद्योगका ९ घटना भएका छन् । अघिल्लो आवमा यस्ता ११ घटना थिए ।

बलात्कारका घटनापछि बालिका सुरक्षा तथा यस सम्बन्धमा जनचेतना वृद्धिको आवश्यकता महसुस गर्दै आवाज पनि उठ्छ । तर ती आवाज केही दिनमै सेलाउँछन् । अर्को घटना भएपछि फेरि त्यस्तै माग उठ्न थाल्छ ।

सामाजिक अभियन्ता प्रकाश थारू बलात्कारका घटना न्यूनीकरणका लागि अभिभावक र किशोरी तथा युवतीलाई लक्षित गरी जनचेतनामूलक कार्यक्रम सञ्चालन गर्न आवश्यक रहेको बताउँछन् ।

‘बलात्कार हाम्रो समाजको ठूलो समस्या र चिन्ताको विषय बन्दैछ, महिला र बालबालिकाको शिक्षा, स्वास्थ्यजस्ता विषयमा केन्द्रित रही गैरसरकारी संस्थाहरूले विभिन्न कार्यक्रम गर्दैछन्, अब उनीहरूको सुरक्षालाई उच्च प्राथमिकतामा राखेर जनचेतनामूलक कार्यक्रम जरुरी भइसकेको छ,’ उनले भने ।

गैरसरकारी संस्था दिव्य युवा क्लबकी महिला अधिकार कार्यक्रम संयोजक कोपिला चौलागाईं साह अब पुरुषहरूलाई यौनजन्य व्यवहार, बलात्कार गरेपछि हुने सजाय, सामाजिक बेइज्जती र उनीहरूका अभिभावकले भोग्ने मानसिक तनाव आदि बारे प्रशिक्षण दिने बेला आएको बताउँछिन् ।

‘बलात्कृत महिलाले एकातिर शारीरिक र मानसिक पीडा भोग्छन्,’ साहले भनिन्, ‘अर्कातिर कतिपय घटनामा बलात्कारीहरू राजनीतिक संरक्षणको कारण कारबाहीमा पर्दैनन् ।’

जिल्ला प्रहरी कार्यालयका प्रवक्ता डीएसपी सत्यनारायण थापा यस्ता घटनाको जानकारी पाएलगत्तै पीडकलाई पक्राउ गरी कारबाहीको दायरामा ल्याउने गरिएको बताउँछन् ।

‘बलात्कारका घटनामा शून्य सहनशिलता अपनाइन्छ,’ उनले भने, ‘पीडकलाई कारबाही र बलात्कृतको उपचार तथा पुन:स्थापनामा पनि हामी गम्भीर भएर लाग्छौँ ।’

प्रकाशित : भाद्र ४, २०७५ १९:१०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT