सम्मेलनलाई सजियो जुम्ला

कान्तिपुर संवाददाता

जुम्ला — जुम्लाको आर्थिक समृद्धिका लागि लगानी सम्मेलनको तयारी भइरहेको छ । ‘विकास सामथ्र्यको उजागर’ नाराका साथ भदौ २९ मा चन्दननाथ नगरपालिकाले सम्मेलन गर्न लागेको हो ।

संघीय मामिला तथा सामान्य प्रशासन मन्त्रालय, उद्योग वाणिज्य तथा आपूर्ति मन्त्रालय र चन्दननाथ नगरपालिकाको संयुक्त आयोजनामा लगानी सम्मेलन हुन लागेको छ । नगरप्रमुख कान्तिका सेजुवालले लगानी सम्मेलनको तयारी तिब्ररुपमा भइरहेको बताइन् । ‘कर्णालीमै पहिलो पटक लगानी सम्मेलन हुन लागेको छ,’ उनले भनिन्, ‘सम्मेलनका लागि देश तथा विदेशका लगानीकर्ता आउनेछन् ।’

विकासका लागि लगानी सम्मेलन सार्थक हुने प्रमुख प्रशासकीय अधिकृत शिवराज चौलागाईले बताए । ‘सम्मेलन जुम्लाको विकासको आधार हुनेछ,’ उनले भने, ‘त्यसै आधारमा टेकेर यहाँको विकासलाई एकद्वार ढंगले अगाडि बढाइनेछ ।’ प्रदेश सरकारका मुख्यमन्त्रीसहित मन्त्रीहरू, विभिन्न मन्त्रालयका अधिकारी, राष्ट्रिय योजना आयोगका पदाधिकारी, विभिन्न मुलुकका राजदूत, उद्योगी, व्यवसायीलगायतलाई निम्ता गरिएको नगरपालिकाले जनाएको छ ।

सम्मेलनमार्फत लगानीकर्ताको बेसलाइन सर्भे हुने नगरपालिकाले जनाएको छ । ‘सम्मेलन जुम्लालाई चिनाउने एक अस्त्र बन्नेछ,’ नगरप्रमुख सेजुवालले भनिन्, ‘जुम्लामा कैयौं पर्यटकीय गन्तव्य छन्, थरीथरीका जडीबुटी छन् । तिनको प्रचारप्रसार र बजारीकरणमा पनि सहयोग पुग्नेछ ।’

उनले सम्मेलनमार्फत पर्यटकीय गन्तव्यको पहिचान हुने जनाइन् । उनका अनुसार जिल्लामा उत्पादित औषधिजन्य जडीबुटीको प्रशोधन र बजारीकरणमा समेत सहयोग पुग्ने नगरपालिकाको अपेक्षा छ । लगानी सम्मेलनमा तीन सय जनाको उपस्थिति हुने अनुमान छ । जुम्लामा एक नगरपालिकासहित ७ वटा गाउँपालिका छन् ।

Yamaha

सबै स्थानीय सरकारले यहाँको सम्भावना र विकासको खाका तयार गरेर प्रस्तुत गर्नेछन् । जसले जुम्लाको समग्र विकासमा टेवा पुर्‍याउने नागरिक अगुवाको आशा छ ।

Esewa Pasal

प्रकाशित : भाद्र १७, २०७५ ०९:२४
प्रतिक्रिया
पठाउनुहोस्
ADVERTISEMENT

विमानस्थल मुआब्जामै १४ अर्ब खर्च

रासस

काठमाडौँ — विमानस्थल निर्माणका लागि आवश्यक पर्ने जग्गा खरिदमा ठूलो परिमाणको बजेट खर्च हुने गरेको पाइएको छ ।

नेपाल नागरिक उड्डयन प्राधिकरणले गत आर्थिक वर्षमा जग्गा प्राप्ति र मुआब्जा वितरणमा मात्रै १४ अर्ब १८ करोड ५४ लाख ४२ हजार रुपैयाँ खर्चेको हो । चालु आवमा आठ अर्ब ५५ करोड २५ लाख जग्गा प्राप्तिका लागि विनियोजन गरिएको छ ।

यी तथ्य तथा तथ्यांकले विमानस्थल निर्माणका लागि आवश्यक जग्गा प्राप्तिमा मोटो रकम खर्च गर्नुपर्दा निर्माण थप महँगो र जटिल बन्दै गएको छ । प्राधिकरणले चालू आवका लागि ४५ अर्ब १७ करोड ५६ लाख ९५ हजार रुपैयाँ विनियोजन गरेको छ ।

प्राधिकरणका उपमहानिर्देशक राजन पोखरेल जग्गा प्राप्ति र मुआब्जाका लागि बढी खर्च भइरहेको स्वीकार गरे । उनले भने, ‘प्राधिकरणले आन्तरिक विमानस्थलमा खर्च गरिरहेको छ । सञ्चालन खर्च उठाउन नै समस्या परेको छ । राज्यको दायित्वअनुसार पनि कतिपय स्थानमा लगानी गरिएको छ ।’ गत आवमा त्रिभुवन अन्तर्राष्ट्रिय विमानस्थल विस्तारका लागि कोटेश्वरतर्फ पाँच अर्ब मुआब्जा वितरण गरिएको थियो । स्थानीयवासीले मुआब्जा बुझे पनि चित्त बुझाउन सकेका छैनन् ।

यस्तै, गौतमबुद्ध विमानस्थलका लागि गत आवमा १३ अर्ब ६१ करोड रुपैयाँ विनियोजन गरिएको थियो । उक्त विमानस्थलको भौतिक प्रगति ५० प्रतिशतभन्दा माथि पुगेको छ । आगामी दस महिनाभित्र विमानस्थल सञ्चालनमा ल्याउने तयारी गरिएको छ । पोखरा विमानस्थलका लागि एक अर्ब २० करोड, विराटनगर विमानस्थल विस्तार गर्न थप जग्गा प्राप्तिका लागि १५ करोड, झापाको चन्द्रागिरि विमानस्थल विस्तारका लागि ३० करोड, जनकपुर विमानस्थलका लागि पाँच करोड, डोल्पा विमानस्थलका लागि ३० लाख रुपैयाँ विनियोजन गरिएको छ । सरकारले क्षेत्रीय रूपमा सञ्चालनमा रहेका विमानस्थलको स्तरोन्नति तथा थप विस्तार गर्ने नीति लिएकाले थप बजेट विनियोजन गरिएको हो ।

प्रदेश १ सरकारले विराटनगर विमानस्थललाई थप विस्तार गर्ने नीति लिएको छ । छिमेकी देशमा समेत उडान गर्ने गरी उक्त विमानस्थलको स्तरोन्नति गर्न लागिएको हो । सञ्चालनमा रहेको नेपालगन्ज विमानस्थलको स्तरोन्नति भइरहेको छ । सुर्खेत विमानस्थल स्तरोन्नति गर्ने लक्ष्य छ । हवाई पहुँच तथा सेवालाई थप विस्तार गर्ने लक्ष्यका साथ सञ्चालनमा रहेका विमानस्थलाई साधन स्रोत सम्पन्न बनाउन लागिएको हो ।

यस्तै, आन्तरिक विमास्थल निर्माणका लागि प्रस्ताव गरिएको काभ्रेपलाञ्चोकको नागी डाँडामा जग्गा प्राप्तिका लागि २५ करोड रुपैयाँ छुटयाइएको छ । जग्गा खरिद तथा विकास शीर्षकमा देशका ठूला तथा मझौला विमानस्थल निर्माण गर्न जग्गाको मुआब्जाका लागि उक्त परिमाणको खर्च गरिएको हो । सबैभन्दा बढी त्रिभुवन अन्तर्राष्ट्रिय विमानस्थलको कोटेश्वरतर्फको क्षेत्र विस्तार गर्न पाँच अर्ब खर्च भएको छ । पोखरा क्षेत्रीय विमानस्थलका लागि गत आवमा एक अर्बभन्दा बढी विनियोजन गरिएको भए पनि १०.५ प्रतिशत मात्रै खर्च गरिएको छ ।

यस्तै, निजगढ दोस्रो अन्तर्राष्ट्रिय विमानस्थलको जग्गा प्राप्तिका लागि ८४ करोड रुपैयाँ विनियोजन गरिएको थियो । यस्तै धावनमार्ग, टयाक्सी वे तथा एप्रोन निर्माणमा एक अर्ब ५५ करोड ४९ लाख ६३ हजार विनियोजन गरिएको छ ।

भवन निर्माण शीर्षकमा २९ करोड ६५ लाख, परामर्श तथा सल्लाहमा १८ करोड ३० लाख ७० हजार रुपैयाँ विनियोजन गरिएको थियो । प्राधिकरणले बिजुली तथा पानीमा मात्रै १३ करोड १९ लाख ६५ हजार रुपैयाँ खर्च गरेको छ । सपोर्ट प्रणाली उपकरणमा १० करोड ३७ लाख ४५ हजार, अन्य सेवातर्फ ९७ करोड २३ लाख ५९ हजार, एप्रोन सडक निर्माणमा ९६ करोड ९१ हजार, यान्त्रिक उपकरणमा सात करोड ५४ लाख ८६ हजार र सरसफाइमा सात करोड ५१ लाख १४ हजार रुपैयाँ खर्चिको छ । संस्कृति पर्यटन तथा नागरिक उड्डयन मन्त्रालयका प्रवक्ता घनश्याम उपाध्याय नागरिकको सामाजिक उत्तरदायित्व पूरा गर्न सरकारले विमानस्थल निर्माणमा ठूलो खर्च गर्नुपरेको बताए ।

त्रिभुवन विमानस्थलको नाफा पाँच अर्ब
प्राधिकरणका अनुसार त्रिभुवन अन्तर्राष्ट्रिय विमानस्थलले गत आवमा पाँच अर्ब ८१ करोड ७६ हजार रुपैयाँ नाफा कमाएको छ ।

पोखरा नागरिक उड्डयन कार्यालयले तीन करोड ६२ लाख ७७ हजार, गौतमबुद्ध विमानस्थलले एक करोड ३२ लाख १३ हजार, तेन्जिङ हिलारी विमानस्थलले ८९ लाख ७५ हजार, भरतपुर विमानस्थलले ६९ लाख ११ हजार, सिमिकोट विमानस्थलले तीन लाख ९७ हजार तथा नेपालगञ्ज विमानस्थलले तीन लाख ९६ हजार रुपैयाँ नाफा गरेको छ ।


मुलुकभर ५६ विमानस्थलमध्ये ३६ सञ्चालनमा छन् । तीमध्ये २९ विमानस्थल कालोपत्र गरिएको छ । गत आवमा भद्रपुर, विराटनगर, जनकपुर, धनगढीजस्ता क्षेत्रीय विमानस्थल घाटामा रहेका थिए ।

–रमेश लम्साल र सीबी अधिकारी

प्रकाशित : भाद्र १७, २०७५ ०९:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT