लमजुङमा नक्कली नोट छ्यापछ्याप्ती

आश गुरुङ

लमजुङ — एउटै नम्बर अंकित १ हजार रुपैयाँका नक्कली नोट बेंसीसहरका बजारमा छ्यापछ्याप्ती देखिएको छ । एकै दिनको अघिपछि उक्त नोट बजारमा भेटिएपछि आर्थिक कारोबारमा संलग्न ग्राहक तथा वित्तीय संस्थामा त्रास फैलिएको छ ।

लमजुङको बेंसीसहरका विभिन्न वित्तिय सहकारीमा भेटिएका १ हजार रुपैयाँको नक्कली नोट । तस्बिर: आश गुरुङ/कान्तिपुर

बजारमा देखिएको नक्कली नोट सहकारी तथा बैंकसम्म पुगेको छ। केही पैसा बैंकबाट सहकारी हुँदै ग्राहकबाट अर्को बैंकसम्म पुगेको छ।

Yamaha

एउटै नम्बरका उक्त नोटमा अघिल्लो भागको दायाँतर्फ ‘च’ को मुनी २५ र ३१४१४३ र बायाँ तर्फ ‘च’ को मुनी २५ र ३१४१३४ अंकित छ। बेंसीसहर–८ शेराका ईश्वरकुमार श्रेष्ठले अन्नपूर्ण बचत तथा ऋण सहकारीबाट १ हजार रुपैयाँका १ सय नोट रहेको १ लाख रुपैयाँको प्याक लगेर राष्ट्रिय वाणिज्य बैंकमा लैजाँदा बैंकले प्याकमा एउटा नक्कली नोट फेला पारेको बताए।

उनका अनुसार उक्त नोट सनराइज बैंकको छापसहितको टाँचा लागेको थियो। बैंकका प्रबन्धक मानबहादुर खत्रीका अनुसार ग्राहकले सुन चुक्ता गर्न आउँदा उक्त १ लाख रुपैयाँको प्याकभित्र उक्त नोट परेर आएको हो। ‘नक्कली नोट जफत गरेर राखेका छौँ। राष्ट्रबैंकमा पठाउँछौं’ उनले भने।

मेगा बचत तथा ऋण सहकारीका प्रबन्धक सुमन सेवदीका अनुसार बजारमा किस्ता संकलन गरेर आएका बजार प्रतिनिधिबाट १ हजार रुपैयाँका २ वटा नक्कली नोट सहकारीमा आइपुगेको छ। दुवैको एउटै नम्बर रहेको छ।

‘मंगलबार र बिहीबार लगातार बेंसीसहर क्षेत्रबाट उठाइएको किस्ता रकममा नक्कली नोट पर्न आएको छ। यसलाई खिचेर राखेका छौँ। बैंकमा बुझाउँछौँ।’ उनका अनुसार नक्कली नोटमा लालिगुराँसको छायाँ छैन।

स्टीकरमा एनआरबी (नेपाल राष्ट्र बैंक) लेखिएको छैन। पेपर क्वालिटी कमजोर छ। ‘फिल्डका साथीहरुले पैसा उठाएर ल्याएपछि आफैँ गन्छौँ। गन्दागन्दै नोटमा शंका लाग्यो। अनि हेर्दा नक्कली रहेछ’ उनले भने।

बुधबार बेंसीसहरकै संयुक्त भूपू सैनिक बचत तथा ऋण सहकारी संस्थाबाट जम्मा गर्ने भनी रिलायन्स फाइनान्समा बुझाएको रकममा १ हजार रुपैयाँको नक्कली नोट परेको छ।

फाइनान्सका प्रबन्धक विशाल जोशीका अनुसार बिहीबार उक्त रकम फेला परेको हो। नवील बैंकका सहायक प्रबन्धक नारायणप्रसाद आचार्यले ग्राहकले बुझाएको रकममा १ हजार रुपैयाँको नक्कली नोट फेला परेको तर, कसले बुझाएको हो भनी थाहा नभएको बताए।

लमजुङ उद्योग वाणिज्य संघका अध्यक्ष राजेश थापाले नक्कली नोटकको बिगबिगीले व्यवसायीलाई समस्या परेको बताए। ‘नक्कली नोट बजारमा देखिएको छ। पैसा आउने ग्राहकबाट व्यवसायीलाई हो। कसले कसरी ल्याउँछन् र दिन्छन् थाहा हुँदैन’ उनले भने, ‘छामेर पत्ता लगाउनुपर्ने, सबैको ख्याल नपुग्न सक्छ।’

बैंकमा सक्कली नक्कली छुट्याउने मेशिन नहुँदा समस्या परेको उनले बताए। ‘बैंकमा भीड छ। त्यही भीडमा १ लाख रुपैयाँको नोटमा एउटा नक्कली नोट जाने गरेको पाइएको छ’ उनले भने, ‘कहाँबाट कसरी आयो, यसले त्रास फैलाएको छ।’

जिल्ला प्रहरी कार्यालयका प्रहरी निरीक्षक राजेन्द्र अधिकारीले यसबारे औपचारिक जानकारी नभएको बताए। ‘बजारमा हल्ला छ। तर, उजुरी कसैले लिएर आएको छैन’ उनले भने। उजुरी लिएर आएमा यसबारे कारबाही अघि बढाउने उनले बताए।

Esewa Pasal

प्रकाशित : भाद्र २२, २०७५ १४:२६
प्रतिक्रिया
पठाउनुहोस्
ADVERTISEMENT

प्रस्तावित हवाई मैदान उपेक्षित

‘हवाईजहाज ग्राउन्ड बनाउने कुरा आए हामी अझै श्रमदान गर्न तयार छौं’
आश गुरुङ

लमजुङ — हवाईजहाज चढ्न पाउने भन्दै कुटोकोदालो बोकेर डाँडा सम्याउन लागिपर्नेमध्ये धेरै दिवंगत भइसके । बाँचेका पनि कतिपयमा अझै आस मरेको छैन । लमजुङका बासिन्दाले साढे ४ दशकअघि हवाई मैदान बनाउन नाल्माको शीतलेस्वाँरा डाँडालाई कुटोकोदालो गरी सम्याए ।

लमजुङको बेंसीसहर नगरपालिका ५, शीतलेस्वाँरास्थित प्रस्तावित शीतलेस्वाँरा हवाई मैदानमा चर्दै र आहालमा बसेका चौपाया । तस्बिर : आश

दुई महिनाको श्रमदानपछि हवाई मैदानको नमुना बन्यो । त्यतिबेला श्रमदान गरेका नाल्माका ९० वर्षीय मनराज गुरुङले भने, ‘न हवाई मैदान बन्यो, न जहाज नै आयो । गाईभैंसी चराउनलाई पो खनेजस्तो भयो ।’ उनका अनुसार त्यतिबेला नाल्मा, पुरानकोट, बाख्रेजगतलगायत ठाउँका बासिन्दाले श्रमदान दिएका थिए ।

हवाई मैदान भनेर खनेको ठाउँ गौचरनमा परिणत भएको उनले बताए । ‘हवाईजहाज ग्राउन्ड बनाउने कुरा आए हामी श्रमदान गर्न अझै तयार छौं,’ उनले भने, तर ठूला मान्छे बनाउन सुरसार गर्दैनन् । हामी के गरौं ।’

लमजुङलाई हवाईमार्गमा जोड्ने उद्देश्यले २०२८ सालमा स्थानीयले श्रमदान दिएपछि तत्कालीन राष्ट्रिय पञ्चायत सदस्य श्रीकान्त अधिकारी हेलिकप्टरमा आएर ३ हजार ३ सय रुपैयाँको मौखिक ठेक्का दिएका थिए । त्यसपछि ३/४ महिना हवाई मैदानका लागि काम गरेका स्थानीयले अहिलेसम्म उक्त ज्याला पाएका छैनन् ।

त्यसपछि कुनै काम हुन नसकेको स्थानीय सिंहरास तामाङले बताए । ‘चुनावमा जसलाई जिताएर पठाए पनि केही गरेनन्,’ उनले भने । नाल्मा घर भएका युवा नेता विवश बुढाथोकीका अनुसार हवाई मैदान निर्माणबारे स्थानीय र प्रदेश सरकारले कुनै वास्ता गरेका छैनन् । ‘हामीले भन्दै आएका छौं । बेंसीसहरका मेयर र मुख्यमन्त्रीले यसबारे केही भन्नुपर्ने हो,’ उनले भने, ‘तर मलाई लाग्छ, उनीहरूबीच केही कुरा भएजस्तो छैन ।’

शान्ति प्रक्रियापछि ०६४ सालमा एमाले नेता पृथ्वीसुब्बा गुरुङ संस्कृति, पर्यटन तथा नागरिक उड्डयनमन्त्री बन्दा उनकै निर्देशनमा नागरिक उड्डयन प्राधिकरणका प्राविधिकले विमानस्थलको विस्तृत अध्ययन गरे । ‘पहिलो वर्ष १८ लाख र दोस्रो वर्ष २० लाख रुपैयाँ बजेट पनि विनियोजन भयो,’ विमानस्थल निर्माण समितिका तत्कालीन अध्यक्ष श्यामबहादुर गुरुङले भने, ‘पछि खानेपानी स्थानान्तरणका लागि ९ लाख बजेटसमेत मिल्यो । त्यतिबेला काम भयो, त्यसपछि हुन सकेन ।’

उनका अनुसार जिल्ला र केन्द्रको कुनै पनि निकायले नहेर्दा शीतलेस्वाँरा हवाई मैदान अलपत्र पर्‍यो । अहिले उक्त क्षेत्रबाट निर्वाचित पृथ्वीसुब्बा गुरुङ गण्डकी प्रदेशका मुख्यमन्त्री छन् । स्थानीयका अनुसार मुख्यमन्त्रीले समेत यसबारे चासो राखेका छैनन् ।

बेंसीसहर नगरपालिका ५ मा पर्ने उक्त हवाई मैदानको लम्बाइ ४ सय र चौडाइ झन्डै २ सय मिटरको छ । प्राविधिक टोलीले लम्बाइ ८ सय मिटर बनाउनुपर्ने प्रतिवेदन तयार पारेको थियो । अहिले वरिपरि झाडी छ । मैदानमा पानीको पोखरी बनेको छ । गोरु, भैंसी, बाख्रालगायत चौपाया चरिरहेका हुन्छन् ।

नयाँ समिति बनेको ५/६ वर्ष भए पनि कुनै काम नभएको स्थानीय बताउँछन् । हवाई मैदान निर्माण समिति अध्यक्ष गोपीप्रसाद गुरुङले काम हुन नसकेको बताए । अहिले उक्त समिति पुनर्गठन हुन सकेको छैन । ‘हवाई मैदान बनाउने भन्दै मन्त्रालय धाएँ । कति नेतालाई भनेँ । कसैले सुनेनन् । काममा हिँड्दा आफ्नै गोजीको ३५/४० हजार रित्तियो । कसलाई के भन्ने ?’ उनले भने, ‘जसले गर्नुपर्छ भने, उनैले चासो दिएनन् ।’

सरकारले करिब ३ वर्षअघि हरेक जिल्लामा हवाई मैदान निर्माण गर्ने नीति अघि सारेको थियो । तर, निर्माणाधीन शीतलेस्वाँरा हवाई मैदानको कुनै काम अघि बढेको छैन । नाल्माका शंकर गुरुङले नेतामा विकासप्रति हेर्ने दृष्टिकोण राम्रो नभएको बताए । ‘विकास भनेको जसले गर्दा पनि हुन्छ । जोकोहीले प्रस्ताव राख्दा हुन्छ । यहाँ त एउटाले सुरु गरेको अर्कोले नगर्ने, अर्कोले गरेको नगर्ने भएर बिग्रियो,’ उनले भने, ‘हवाई मैदान भएर नियमित जहाज आउने वातावरण बने यस क्षेत्रको विकास नै छुट्टै ढंगले अघि बढिसक्थ्यो ।’

पोखरामा अन्तर्राष्ट्रिय विमानस्थल बन्ने भएपछि वरपरका जिल्लामा पनि मैदान अत्यावश्यक भएको उनको बुझाइ छ । काउलेपानी पर्यटन विकास समिति अध्यक्ष देउबहादुर गुरुङका अनुसार वरपरका सबै गाउँ पर्यटकीय हुन् । पुरानकोट, नाल्मा, गाउँसहर हेर्न देशीविदेशी सबै रुचाउँछन् । ‘बेंसीसहरदेखि यहाँसम्मको बाटो राम्रो भइदिए, शीतलेस्वाँरामा हवाई मैदान भइदिए, यहाँको पर्यटनले विश्वमा नाम कमाइसक्थ्यो,’ उनले भने ।

जिल्लामा हवाई मैदानको आवश्यकता र निर्माण कार्य सुरु भएर अलपत्र परे पनि प्रशासक र विकासे अड्डाको ध्यान कहिल्यै नपुगेको स्थानीय बताउँछन् । ७ वर्षअघि जिल्ला परिषद्ले १ पटक हवाई मैदान निर्माणका लागि मन्त्रालयसँग बजेट मागेको थियो । त्यसयता माग गरिएको छैन । स्थानीय तह कार्यान्वयनमा आए पनि बेंसीसहर नगरपालिकाले प्रस्तावित शीतलेस्वाँरा हवाई मैदानबारे केही निर्णय गरेको छैन ।

नगरपालिका प्रमुख गुमानसिंह अर्यालले यसको महसुस भए पनि नगरपालिकाले केही गर्न नसकिने बताए । ‘नगरपालिकाले यसको आवश्यकता महसुस गरी प्रदेश सरकारमा यसअघि नै अवगत गराएका छौं,’ उनले भने । प्रस्तावित शीतलेस्वाँरा हवाई मैदान बेंसीसहरबाट करिब १० किलोमिटरमा पर्छ । सवारीसाधनमा १ घण्टामा पुग्न सकिन्छ । बेंसीसहरदेखि नाल्मा हुँदै पोखरासम्मको दु्रतमार्ग निर्माण भए उक्त ठाउँको विकास हुने स्थानीयको भनाइ छ ।

प्रकाशित : भाद्र २२, २०७५ ०७:५३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT