८ महिनामा ६ लाख पर्यटक
काठमाडौँ — सन् २०१८ को पहिलो ८ महिनामा हवाई मार्ग हुँदै नेपाल आउने पर्यटकको संख्या ६ लाख ८० हजार पुगेको छ ।
अध्यागमन विभागले जारी गरेको तथ्यांकअनुसार सन् २०१८ को जनवरीदेखि अगस्तसम्म नेपाल आउने विदेशीको संख्या ६ लाख ८० हजार ९ सय ९६ पुगेको हो । यो सन् २०१७ को पहिलो आठ महिनाको तुलनामा १८ प्रतिशतले बढेको हो ।
त्रिभुवन अन्तर्राष्ट्रिय विमानस्थलबाट अगस्त महिनामा मात्रै ८७ हजार पर्यटक नेपाल आएको देखिन्छ । अघिल्ल्लो वर्ष यही महिनामा ७३ हजार विदेशी नेपाल आएका थिए । यो संख्या कम्तीमा ४५ वटा मुलुकका विदेशीहरूको हो । यसमा नेपाल घुम्न आउने, काम गर्न आउने र विदेशी नागरिकता लिइसकेका नेपालीहरूसमेत पर्छन् ।
अगस्त महिनामा सबैभन्दा धेरै भारतबाट १४ हजार, श्रीलंकाबाट ९ हजार, चीनबाट ७ हजार, अमेरिकाबाट ४ हजार र यूकेबाट २ हजार ९ सय विदेशी नेपाल आएका थिए ।
पर्यटन बोर्डका अनुसार श्रीलंकाबाट आउने पर्यटकको संख्या ७४, भारतबाट आउने पर्यटकको संख्यामा ३७ प्रतिशतले बढेको छ । यो तुलनात्मक दर अघिल्लो वर्षको अगस्त महिनाका आधारमा हो । त्यसैगरी सार्क क्षेत्रका मुलुकबाट आउने पर्यटकको संख्या ४८ प्रतिशतले बढेको देखिन्छ । त्यसैगरी अघिल्लो वर्षको अगस्त महिनाको तुलनामा चिनियाँ पर्यटकको आगमन पनि ६३ प्रतिशतले बढेको छ ।
युरोपेली मुलुकबाट आउनेहरू २१ प्रतिशत जर्मनीबाट ३१, फ्रान्सबाट २५ र बेलायतबाट २१ प्रतिशतले पर्यटक बढेका छन् । अस्ट्रेलियाबाट ३९, न्युजिल्यान्डबाट १८ तथा अमेरिका/क्यानडाबाट १५ प्रतिशतका दरले पर्यटक बढेका छन् ।
यसअघि जुलाई (मध्य असारदेखि मध्य साउन) सम्म नेपाल आउने विदेशीको संख्या ७३ प्रतिशतले बढेको थियो । जुलाईमा मात्रै ७३ हजार विदेशी नेपाल आएका थिए भने जनवरीदेखि जुलाईसम्म नेपाल आउने विदेशीहरूको संख्या ५ लाख ९३ हजार पुगेको थियो ।
