तस्करी रोक्न सघाउँछौं : चीन

केरुङमा नेपाल र चीनका सीमावर्ती जिल्लाका सुरक्षा अधिकारीहरूबीच बुधबार भएको छलफलमा कार्यक्रममा सुनलगायत सबै मालवस्तुहरूको चोरी तस्करी नियन्त्रण गर्न चिनियाँ अधिकारीले सहयोग गर्ने प्रतिबद्धता जनाएका हुन् । पछिल्लो समय तस्करले रसुवागढी नाकाको प्रयोग गर्न थालेपछि नियन्त्रण गर्न बैठकमा नेपाली पक्षले चिनियाँ अधिकारीहरूलाई अनुरोध गरेको प्रमुख जिल्ला अधिकारी कृष्ण पौडेलले बताए ।

‘चाडपर्वमा हुन सक्ने सुनलगायत सबै मालवस्तुको तस्करी नियन्त्रण गर्न चिनियाँ पक्षले सहयोग गर्ने प्रतिबद्धता जनाएको छ,’ उनले भने, ‘नाकाबाट हुन सक्ने सुनलगायत सबै मालवस्तुको चोरी तस्करी नियन्त्रण गर्न चिनियाँ भन्सार कार्यालयलाई चनाखो बनाउने कुरामा चिनियाँ अधिकारीले प्रतिबद्धता जनाएका छन् ।’

चीनको केरुङसम्म जानका लागि रसुवाबासीलगायत अन्य जिल्लाका बासिन्दालाई एकदिने पास र व्यवसायीलाई बिजनेस पासको व्यवस्था लागू गर्न नेपाली पक्षले बैठकमा पुन: चिनियाँ अधिकारीहरूलाई अनुरोध गरेको छ । चिनियाँ अधिकारीले दुई देशबीचको व्यापार सहजीकरण गर्नका लागि ट्रान्सपोर्टेसन एग्रिमेन्टको तयारी भइरहेको बैठकमा बताएका छन् ।

चिनियाँ अधिकारीहरूलाई नेपाली पक्षले वान डे पास नहुँदा व्यापार सहजीकरण असहज भएको बैठकमा बताएका थिए । वान डे पासको व्यवस्था नहुँदा रसुवा जिल्लाभन्दा बाहिरका व्यापारीलाई व्यापार व्यवसाय गर्न असहज भएको छ । जिल्लाभन्दा बाहिरका व्यापारी र गाडी चालकसमेत केरुङ जान पाइरहेका छैनन् । जिल्लाभन्दा बाहिरका चालक र व्यापारी एकदिने पासको व्यवस्था नहुँदा केरुङसम्म जान नसकेको गुनासो गरे । रसुवा जिल्लाभन्दा बाहिरका व्यापारी र चालकलाई केरुङसम्म जाने पहुँच छैन । केरुङसम्म जान खुकुलो व्यवस्था भए व्यापार–व्यवसायले गति लिने व्यापारीहरू बताउँछन् ।

बैठकमा नेपालको तर्फबाट रसुवा जिल्लाका प्रमुख जिल्ला अधिकारी कृष्ण पौडेललगायत भन्सार र सुरक्षा अधिकारी तथा चिनियाँ पक्षबाट जनवादी गणतन्त्र चीनको केरुङस्थित फ्रन्टायर इन्स्पेक्सन स्टेसनका मेजर केर्नेल गाओ हुइहाईसहित भन्सार, अध्यागमन, क्वारेन्टाइन र सुरक्षा अधिकारीहरूको सहभागिता थियो ।

भूकम्पले क्षति गरेका जिल्लाका तीन वटा विद्यालय चीन सरकाले बनाउने सहमति भएकामा अहिलेसम्म निर्माण सुरु नभएको विषयमा नेपाली पक्षबाट अनुरोध भएकामा छिट्टै निर्माण सुरु गरिने कुरामा चिनियाँ पक्षबाट सकारात्मक जवाफ प्राप्त भएको छ । नाकामा रहेका दुवै देशका सुरक्षा अधिकारीहरूलाई भाषागत क्षमता विकासमा सहयोग गर्न चिनियाँ पक्षले सहयोग गर्ने बैठकमा बताएका छन् । दुवै देशका स्थानीय प्रशासन, भन्सार अध्यागमन तथा सुरक्षा निकायबीच समयसमयमा बैठक बसी दुवै पक्षको समन्वयमा थप प्रभावकारी बनाउने छलफल भएको प्रजिअ पौडेलले बताए ।