तिहार बिदामा निगमको डिपो खुल्ला, इन्धन अभाव नहुने

निगमको थानकोटस्थित डिपोबाट काठमाडौं उपत्यकालगायत आसपासका विभिन्न पम्पलाई बुधबार साढे ८ लाख लिटर पेट्रोल र साढे ४ लाख लिटर डिजेल वितरण गरिएको डिपो प्रमुख भरत रेग्मीले बताए ।

निगमले मंगलबार पनि साढे ८ लाख लिटर पेट्रोल र ८.३ लाख लिटर डिजेल विभिन्न पम्पलाई उपलब्ध गराएको थियो । डिपोले काठमाडौं उपत्यका, बनेपा, सिन्धुपालोक, रसुवा, नुवाकोट र सिन्धुलीका केही पेट्रोल पम्पलाई इन्धन उपलब्ध गराउँदै आएको छ । प्रत्येक पम्पले माग गरेबमोजिम इन्धन उपलब्ध गराइएको उनले बताए । बुधबार लक्ष्मीपूजा र सार्वजनिक बिदा भए पनि थानकोटस्थित डिपो भने खुला छ ।

सार्वजनिक बिदा भए पनि आकस्मिक रूपमा इन्धनको माग भएमा उपलब्ध गराउन दुई अधिकृतकसहित आठ कर्मचारीलाई तयारी अवस्थामा राखिएको रेग्मीले बताए । थानकोटस्थित डिपोमा डिजेल ७० लाख र पेट्रोल ४० लाख लिटर भण्डारण छ ।