१८.१२°C काठमाडौं
१२० टन ओखर खपत
सुनसरी — धरानस्थित कृषि उपज बजारमा तिहारको बेला कोसी करिडोरको पहाडी जिल्लामा उत्पादित १ सय २० टन ओखर थोकमा बिक्री भएको छ । यो गत वर्षको तुलनामा २० प्रतिशत बढी हो । गत वर्ष सय टन ओखर बिक्री भएको थियो ।
पूर्वी पहाडी जिल्लामा उत्पादित ओखरको मुख्य बजार भने पोखरा र जनकपुर रहेको कृषि उपज बजारका व्यवस्थापक लक्ष्मण भट्टराईले बताए । काग तिहारदेखि भाइटीकाको अघिल्लो दिनसम्म मात्र धरानमा ओखरको बजार लाग्ने गरेको छ ।
उक्त अवधिमा यसपटक ६० लाख रुपैयाँ बराबरका ओखर बिकेको भट्टराईले बताए । तिहारमा भाइटीकाको बेला मात्र बढी प्रयोग गरिने ओखरलाई पोषणविज्ञहरूले ‘ड्राई फ्रुट्स’ मध्येकै उत्तम मान्ने गरेका छन् ।
ओखरको गुदीमा पाइने फेनोलिक कम्पाउन्ड र एन्टी अक्सिडेन्टले क्यान्सर लाग्नबाट समेत बचाउने र ओमेगा २३ तथा मोनोस्याचुरेटेड फयाट प्रचुर मात्रामा पाइने पोषणविदहरूले बताएका छन् । पछिल्लो समयमा ओखरको कारोबार तिहार लक्षित भए पनि अरूबेला पनि बढदै गएको भट्टराईले बताए ।
उनले भने, ‘धरानमा ओखर कोसी पहाडी जिल्लाहरूबाट आउने गर्छ । त्यसमा पनि मुख्य गरी धनकुटाको बुधबारे क्षेत्रबाट बढी आउने गर्छ । विशेषगरी तिहारकै बेला यसको माग उच्च हुने गरेको छ ।’
प्रकाशित : कार्तिक २५, २०७५ ०८:०९
