लाङटाङमा घरैपिच्छे होटल

बलराम घिमिरे

रसुवा — पुनर्निर्माणपछि अहिले लाङटाङका घरहरू एक घर, एक होटलजस्तै भएका छन् । भूकम्पपछि पुनर्निर्माण गरिएका ८५ प्रतिशतभन्दा बढी घरमा स्थानीयले होटल सञ्चालन गरेका छन् ।

भूकम्पले पूर्ण क्षति गरेको लाङटाङमा पुनर्निर्माणपछि बनेका घर । तस्बिर : बलराम/कान्तिपुर

पर्यटकीय क्षेत्र भएकाले लाङटाङका स्थानीयको मुख्य पेसा होटल व्यवसाय हो । पशुपालन गर्नेको संख्या थोरै छ । भूकम्पपछि थातथलोमा फर्केका लाङटाङबासी आफ्नै पुरानो पेसा–व्यवसायमा फर्किसकेको थाङस्यापका होटल व्यवसायी फिन्जो तामाङले बताए । ‘पुनर्निर्माणपछि बनेका ८५ प्रतिशत घरमा स्थानीयले होटल सञ्चालन गरेका छन्,’ उनले भने, ‘कृषि पेसा गर्न भने जंगली जनावरले दिएन । बारीमा लगाएको सबै खेतीपाती बँदेलले खाइदिन्छ ।’

Yamaha

होटल व्यवसायी गाउँ फर्केर जमेका छन् । भूकम्पपछि क्याङजिनमा ६ वटा नयाँ होटल थपिएका छन् । पशुपालन गर्ने कृषकहरू पनि अहिले नयाँ बनेका घरमा होटल व्यवसाय गर्न थालेका छन् । थाङस्यापका बाबु तामाङ पुराना चौरीपालक कृषक हुन् । भूकम्पपछि उनले चौरीपालन व्यवसाय नै छोडे । ‘भूकम्पले चौरी पनि मरे, यो पेसामा धेरै दु:ख गर्नुपर्छ,’ उनले सुनाए । उनको होटल पनि छ ।

‘दु:ख गर्ने उमेर गइसक्यो, अब होटल मात्रै चलाउँछु,’ उनले भने, ‘चौरीबाट भन्दा होटलबाट राम्रो आम्दानी हुन्छ ।’ भूकम्पपछि पहिरोमा परी लाङटाङमा २० जना कृषकको मृत्यु भयो । चार सयभन्दा बढी चौरी, याक तथा नाक मरे । भूकम्प जानुभन्दा अगाडि लाङटाङमा ३० वटा चौरी गोठ रहेकामा अहिले १८ वटा मात्र छन् । भूकम्पपछि पर्यटकीय क्षेत्र लाङटाङमा चौरी पाल्ने कृषकको संख्या घट्दै गएको गोठ समितिका अध्यक्ष तेन्जेन लामाले बताए ।

भूकम्पले लाङटाङ क्षेत्रको पर्यटन लगभग शून्यमा झारेको थियो । हिमपहिरोमा परी स्थानीय बासिन्दा, स्वदेशी तथा विदेशी पर्यटक गरी २ सय १० जनाले ज्यान गुमाएका थिए । तीमध्ये १ सय ७५ जना स्थानीय रहेका थिए । हिमपहिरोमा हराएका सयौं स्वदेशी तथा विदेशी पर्यटकको अझै अत्तोपत्तो छैन । लाङटाङ राष्ट्रिय निकुञ्जको सुरक्षार्थ खटिएका नारायण दल गणका १० जना नेपाली सेनासमेत अझै बेपत्ता छन् ।

सुन्दर पर्यटकीय क्षेत्र लाङटाङ पुनर्निर्माणसँगै करिब पुरानै अवस्थामा पुगेको छ । भूकम्पले ध्वस्त भएको पर्यटकीय क्षेत्र लाङटाङ अहिले पुनर्निर्माणसँगै मुस्कुराउन थालेको छ । ‘सुरक्षित होटल र घर धेरै बनिसके,’ गोसाइँकुण्ड गाउँपालिका ४ का अध्यक्ष सुब्बा लामाले भने, ‘लगभग पुरानै अवस्थामा लाङटाङ फर्किएको छ ।’

प्रहरी चौकी र स्वास्थ्य संस्था पनि सञ्चालनमा आएका छन् । क्यान्जिनमा १ सय १० किलोवाटको नयाँ लघु जलविद्युत् निर्माण भएको छ । स्थानीय पर्यटन विकासका लागि पुनर्निर्माणमा जुटेका हुन् । लाङटाङलाई पुरानै अवस्थामा फर्काउन स्थानीयको सक्रियता बढेको छ । सिजनको बेला दैनिक ७० देखि ८० पर्यटक लाङटाङ आउने गरेको होटल व्यवसायी ढिन्डुप तामाङले बताए ।

‘पर्यटक संख्या बढेर भूकम्प जानुअगाडिकै अवस्थामा पुगेको छ,’ उनले भने । क्याङजिन पुगेपछि बस्ती नजिकैबाट वरिपरि हिमाल हेर्न सकिन्छ । त्यही हेर्न पर्यटकको घुइँचो लाग्ने गरेको छ । आँखाअगाडि चारैतिर दर्जनभन्दा बढी हिमाल देखेपछि पर्यटक दंग पर्छन् ।

लाङटाङ काठमाडौंबाट छोटो र सजिलो पदमार्ग हो । यही कारण विदेशी पर्यटकको सहज रोजाइमा पर्छ,’ पर्यटन व्यवसायी तेम्बा लामाले सुनाए, ‘पर्यटकले थोरै दिनमा एकै पटक धेरै कुरा हेर्न र घुम्न पाउँछन् ।’

प्रकाशित : मंसिर २१, २०७५ ०९:०१
प्रतिक्रिया
पठाउनुहोस्
ADVERTISEMENT
ADVERTISEMENT

इन्स्टाग्राम स्टोरिज कसरी देखाउने ?

हेलो शुक्रबार

काठमाडौँ — सामाजिक सञ्जाल प्रयोगकर्ताको शैली बुझ्ने हो भने फेसबुक प्रोढमाझ बढी लोकप्रिय बन्दैछन् भने इन्स्टाग्राम नयाँ पुस्ताका प्रयोगकर्तामाझ चर्चित । आफन्त र परिवारका सदस्य फेसबुकमा बढी सक्रिय हुन थालेपछि नयाँ पुस्ता फेसबुकमा कम सक्रिय हुन थालेको अध्ययनले देखाएको छ ।

फोटो पोस्ट गर्न मन पराउने र आफन्त तथा परिवारका सदस्यहरूबाट सुरक्षित रहने प्लेटफर्मको खोजीले गर्दा अहिले इन्स्टाग्रामको लोकप्रियता बढ्दो छ । फेसबुक स्वामित्वको फोटो सेयरिङ एपमा धेरै फिचरहरू स्न्यापच्याटबाट कपी गरिएका छन् । टीनएज प्रयोगकर्तामाझ लोकप्रिय रहेको स्न्यापच्याटको स्टोरिज, सेक्रेट च्याटजस्ता फिचर आफ्नोमा कपी गरेपछि इन्स्टाग्रामको प्रयोगकर्ता स्न्यापच्याटको भन्दा बढी छन् ।

स्न्यापच्याटको लोकप्रियता किन बढ्दो छ भने यसमा कम उमेरका प्रयोगकर्ता बढी हुने गर्थे । एक साथीले अर्कोलाई पठाएको तस्बिर केही मिनेटमै स्वत: डिलिट हुने फिचरका कारण प्रयोगकर्ता भविष्यमा सोही फोटोका कारण आफूलाई नराम्रो स्थिति आइपर्ला भनेर विचार गर्नुपर्ने अवस्थामा थिएनन् । झन्, यसको स्टोरिज फिचरमा प्रयोगकर्ताले हालेको फोटो २४ घण्टामा स्वत: डिलिट हुन्थ्यो ।

स्न्यापच्याटको लोकप्रियताको यही कारण देखेर फेसबुक स्वामित्वको इन्स्टाग्रामले यो फिचर कपी गरेको थियो । अर्को कम्पनीको फिचर जस्ताको तस्तै कपी गरेको आरोप खेपे पनि इन्स्टाग्रामलाई कुनै असर परेन किनकि उसका धेरै प्रयोगकर्ताले यसलाई मन पराए र प्रयोग गर्न थाले ।

तर, इन्स्टाग्राम पनि अहिले पहिलेको जस्तो छैन् । फेसबुकले आफ्नोस्वामित्वमा लिएपछि पछिल्लो समय इन्स्टाग्राम पनि फेसबुककै अंगजस्तो बनेको छ । धेरैभन्दा धेरै फेसबुक प्रयोगकर्तालाई इन्स्टाग्राममा जोड्ने कम्पनीको लक्ष्यले फेसबुकका धेरै सदस्यहरू अहिले इन्स्टाग्राममा जोडिएका छन् । आफ्ना साथीहरूमाझ २४ घण्टाको लागि मात्रै फोटो सेयर गर्न मिल्ने स्टोरिज फिचरमा इन्स्टाग्राम प्रयोगकर्ताको आकर्षण बढेको छ । फेसबुकले यो फिचर आफ्नो म्यासेन्जर र फेसबुक एपमा राखे नयाँ पुस्ताका प्रयोगकर्ताहरू भने इन्स्टाग्राममै यो फिचर प्रयोग गर्न बढी रुचाउँछन् ।

स्टोरिजमा फोटोसहित राख्न मिल्ने फरक–फरक स्टिकर र स्वरूपले पनि प्रयोगकर्तालाई आकर्षण गरिरहेको छ । अहिले इन्स्टाग्राम स्टोरिजको दैनिक प्रयोगकर्ता ४० करोड नाघेको छ । यो स्टोरिज सुरुमा प्रयोग गर्ने स्न्यापच्याटको कुल प्रयोगकर्ताभन्दा बढी हो । तर, फेसबुक प्रयोगकर्ताहरू पनि अहिले इन्स्टाग्राममा ह्वात्तै बढेको छ । यसैकारण इन्स्टाग्राममा स्टोरिजमा फोटो अपलोड गर्दा आफ्ना परिवार र आफन्तले देख्ने हुन् कि ? उनीहरूले आफ्ना फोटो देखेर के भन्ने हुन् भन्ने डर बढ्दो छ ।

इन्स्टाग्रामले यसै साता नयाँ फिचर सार्वजनिक गरेको छ, जसले प्रयोगकर्तालाई आफ्नो स्टोरिजमा राखेको फोटो आफूले चाहेको व्यक्तिलाई मात्रै देखाउन मिल्छ । यो फिचर फेसबुकको फ्रेन्ड लिस्टलाई व्यवस्थापन गर्ने जस्तो छ । फेसबुकमा आफ्नो फ्रेन्ड लिस्टमा भएका व्यक्तिलाई कलेजको साथी, कार्यालयको साथी, परिवार भनेर ग्रुपमा राखेजस्तै इन्स्टाग्राममा आफ्नो
स्टोरिज हेर्न सक्ने समूहलाई पनि यसैगरी व्यवस्थापन गर्न मिल्छ । यो फिचर प्रयोगका लागि इन्स्टाग्रामको स्टोरिज सेयर गर्नुअघि एड्भान्स सेटिङमा जानुपर्छ, जहाँ इडिट योर क्लोज फ्रेन्ड लिस्ट भन्ने अप्सन देखिन्छ । क्लोज फ्रेन्ड लिस्ट अप्सनमा क्लिक गरेपछि आफूलाई आफ्नो लिस्टमा एड गर्न मन लागेको साथीहरू समावेश गर्न सकिन्छ ।

जुन साथीहरूलाई लिस्टमा समावेश गरिएको छ, उक्त साथीहरूलाई त्यसबारे नोटिफिकेसन जान्छ । सूचीमा समावेश गरिएको साथीलाई हटाउन पनि मिल्छ । यो सूची तयार पारिसकेपछि उक्त समूहलाई देखिने गरी मात्रै स्टोरिज सेयर गर्न मिल्छ । यसले गर्दा आफ्ना साथीहरूलाई मात्रै देखाउन मन लागेको पोस्ट उनीहरूले मात्रै देख्छन् । यस्तो सूचीका साथीहरूसँग मात्रै सेयर गरिएको स्टोरिजमा उनीहरूले हरियो चिह्न देख्न सक्छन्, जसमा क्लोज साथीलाई मात्रै सेयर गरेको भन्ने जनाउ हुन्छ ।

प्रकाशित : मंसिर २१, २०७५ ०९:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्