निजगढ विमानस्थल निर्माणले गति लिँदै
सिमरा — निजगढ अन्तर्राष्ट्रिय विमानस्थल क्षेत्रलाई सुरक्षित बनाउन बाउन्डरी फिनिसिङका लागि बाहिरी तथा भित्री तारबार निर्माण कार्य तीव्र पारिएको छ ।
विमानस्थलको पूर्वतयारीका लागि बाहिरी तथा भित्री तारबार, नदी नियन्त्रण गर्न तटबन्ध निर्माण, विमानस्थल क्षेत्रभित्र परेका घरजग्गाको मुआब्जा वितरणलगायत काम तीव्र गतिमा भइरहेको दोस्रो अन्तर्राष्ट्रिय विमानस्थल आयोजना कार्यालय सिमराले जनाएको हो ।
पहिलो चरणको निर्माण काममा अहिलेसम्म ९ करोड रुपैयाँ खर्च भएको आयोजना प्रमुख ओम शर्माले बताए । धावन मार्ग निर्माणका लागि चार किल्लाभित्रका रूख कटान गर्ने र बाटाका दुवै साइडमा गरी ६३ किलोमिटर अस्थायी तारबार घेराउ कार्य अघि बढाइएको उनले जनाए । तारबार घेराउमा ७० प्रतिशत प्रगति भएको उनले बताए ।
तारबार गर्नुपर्ने सबै क्षेत्रमा पिलर गाड्ने कार्य पूरा भएको उनले दाबी गरे । ‘विमानस्थल आयोजनाको कार्य तीन चरणमा भइरहेको छ,’ शर्माले भने, ‘पहिलो चरणमा नदी नियन्त्रण र तारबार निर्माण कार्य जारी छ ।’ अहिलेसम्म ८ सय ३ मिटर तारबार लगाउने काम ठेकेदारले पूरा गरिसकेका छन् । ती ठेकेदारले १४ किलोमिटरमा तारबार निर्माण गर्ने जिम्मेवारी पाएको उनले जनाए ।
शर्माका अनुसार ८ खर्बको अनुमानित लागतमा विमानस्थल निर्माण हुनेछ । विमानस्थलका लागि ८ हजार ४५ हेक्टर जमिन आयोजनाले अधिग्रहण गर्नुपर्नेछ । ती जग्गामध्ये ३ हजार ६ सयदेखि
४ हजार हेक्टर जग्गामा धावन मार्ग निर्माण हुनेछ । सुरुमा २ वटा धावनमार्ग निर्माण हुनेछन् । त्यसपछि थप एउटा धावन मार्ग निर्माण गरिने आयोजना प्रमुख शर्माले बताए ।
बाउन्ड्री फिनिसिङसँगै पसाहा नदीमा १० किलोमिटर दक्षिणी सिमानसम्म नदी नियन्त्रणको काम हुनेछ । त्यसमध्ये ८ सय मिटर पसाहामा नदी नियन्त्रणको काम भइरहेको छ । यसै वर्ष थप ५ सय मिटर तटबन्ध निर्माणको काम सुरु गरिनेछ ।
विमानस्थल क्षेत्रभित्र परेको काटगाउँ र ककडी गाउँको ५८ बिघा जग्गा अधिग्रहणका लागि मुआब्जा वितरण कार्य अन्तिम चरणमा पुगेको छ । तीमध्ये काटगाउँको ४८ बिघा र ककडीको १० बिघा जग्गाको मुआब्जा वितरण भइरहेको छ । यसरी ६० प्रतिशत बढीलाई मुआब्जा वितरण गरी सकिएको छ ।
काटगाउँ बस्तीमा रहेका १ सय ३३ घर विमानस्थल क्षेत्रभित्र परेको आयोजना प्रमुख शर्माले जनाए । ‘१ सय २५ घरपरिवारले मुआब्जा बुझिसकेका छन्,’ उनले भने, ‘बाँकी रहेकाहरू मुआब्जा बुझ्ने क्रममा छन् ।’ ककडीको खाली खेत मात्र विमानस्थल क्षेत्रभित्र परेको उनले जनाए ।
आयोजनाभित्र पर्ने १ सय १० बिघा जग्गामध्ये ६० बिघा जग्गा नागरिक उड्डयन प्राधिकरणका नाउँमा दर्ता भइसकेको उनले जनाए । ईआईए रिपोर्टअनुसार विमानस्थल निर्माणका लागि २४ लाख रूख कटान गर्न प्रस्ताव गरिए पनि न्यूनतम रूख कटान गरी विमानस्थल निर्माणको काम अघि बढाइने उनले बताए ।
टाँगिया बस्तीलाई केन्द्र मानेर विमानस्थलको निर्माण कार्य सुरु गरिने उनले जनाए । ‘टाँगिया बस्तीमा धेरै रूख पर्दैनन्,’ उनले भने, ‘पहिला नै त्यहाँको रूख काटिएपछि जग्गा खाली छ ।’ टाँगिया बस्तीलाई जितपुर सिमरा उपमहानगरपालिकाको पिलुवा नजिक पसाहा किनारमा वा कोल्हवी नगरपालिकाभित्र सार्न विकल्प देखिएको उनले बताए ।
झन्डै एक हजार बिघामा फैलिएको टाँगिया बस्तीलाई स्थानान्तण गर्न कलैया, निजगढ र जितपुर सिमरामा रहेको ऐलानी तथा निजी जग्गामा बसोबासको व्यवस्था मिलाउने कार्यसमेत अघि बढाइएको उनले बताए । शर्माका अनुसार पेरिमिटर सडक तथा फिनिसिङ निर्माणका लागि ठूला साना गरी ४ हजार २ सय ३२ रूख बिरुवा कटान गर्नुपर्नेछ ।
आयोजनाको विस्तृत परियोजना प्रतिवेदन डीपीआर तथा मास्टर प्लान तयार गर्नका लागि अन्तर्राष्ट्रियस्तरका ६ वटा परामर्शदाताको आशयपत्र स्वीकृत भई प्रस्ताव प्राप्तिका लागि मूल्यांकनको चरणमा रहेको आयोजना कार्यालयले जनाएको छ । आर्थिक वर्ष ०७३/७४ देखि आयोजना कार्यालयले पूर्वतयारीको काम सुरु गरेको हो ।
प्रकाशित : पुस १३, २०७५ ०९:०५