बन्दीपुरमा डेढ लाख पर्यटक

‘भूकम्पको वर्ष पर्यटक घटेका थिए,’ समिति अध्यक्ष बैंस गुरुङले भने, ‘बितेको १ वर्षमा आएका डेढ लाखमध्ये ७५ प्रतिशत आन्तरिक पर्यटक थिए ।’ स्वदेशी पर्यटकको आगमन उत्साहजनक देखिएको उनले बताए । ‘बिस्तारै हाम्रो पर्यटन व्यवसाय तंग्रिएको छ,’ उनले भने, ‘बढेको आगमन दरले व्यवसायमा लगानी बढाउनेको हौसला थपेको छ ।’

पर्यटक व्यवसायीले बन्दीपुरमा होटल–रेस्टुरेन्ट थपेका छन् । पुराना होटलमा सेवा सुविधा विस्तार गरेका छन् । पर्यटकलाई लक्षित गरी होमस्टेको व्यवस्था पनि गरिएको छ । यहाँ सानाठूला गरी ५५ वटा सुविधा सम्पन्न होटल तथा रेस्टुरेन्ट सञ्चालनमा छन् ।

होटल र होमस्टे गरी दैनिक एक हजार जना पर्यटक राख्न सकिने अवस्था रहेको व्यवसायीले बताएका छन् । बन्दीपुरमा पर्यटक सफा बस्ती र पुराना मौलिक शैलीका घरसँगै प्राकृतिक दृश्यालेकनका लागि आउने गरेका छन् ।