दूरसञ्चार प्राधिकरणमा सञ्चारमन्त्रीको छड्के, २४ घण्टाभित्र विवरण पेश गर्न निर्देशन

विजय तिमल्सिना

काठमाडौँ — सञ्चार तथा सूचना प्रविधि मन्त्री गोकुल बाँस्कोटाले नेपाल दूरसञ्चार प्राधिकरणमा बुधबार अनुगमन गरेका छन् । विभागीय मन्त्रीका हिसालबे प्राधिकरण कार्यालय अनुगमनका लागि पुगेको मन्त्री बाँस्कोटाले जानकारी दिए ।

सवा १० बजे प्राधिकरण कार्यालय पुगेका मन्त्री बाँस्कोटाले छुट्टाछुट्टै विभाग पुगेर प्रगति विवरण माग गरेका थिए । प्राधिकरण अन्तर्गत सञ्चालित विभिन्न परियोजनाको प्रगतिबारे आफूले चासो राखेको र २४ घण्टाभित्र प्रगति विवरण उपलब्ध गराउन निर्देशन दिएको मन्त्री बाँस्कोटाले जानकारी दिए ।

Citizen


दुई वर्षमा काम सक्ने गरी अप्टिकल फाइबर विस्तारको लागि यूटीएल र स्मार्ट टेलिकम प्रालिलाई प्राधिकरणले जिम्मा दिएको थियो । उक्त परियोजनाको काम सुरु नभएकोको विषयमा पनि मन्त्री बाँस्कोटाले चासो राख्दै प्रगति विवरण पेश गर्न निर्देशन दिएका थिए ।

यस्तै, ग्रामीण दूरसञ्चार कोषअन्तर्गत प्राधिकरणले सञ्चालन गरेको परियोजनाको काम समयमै नसकिएको विषयमा पनि २४ घण्टाभित्र विवरण पेश गर्न निर्देशन दिएको बाँस्कोटाले बताए ।

प्राधिकरणका प्रवक्ता मीनप्रसाद अर्यालले मन्त्री बाँस्कोटाले कर्मचारीको हाजिरीसहित प्राधिकरणको वर्तमान अवस्थाबारे अनुगमन गरेको जानकारी दिए ।

‘ग्रामीण दूरसञ्चार कोष, फ्रिक्वेन्सी, लाइसेन्सजस्ता विषयमा सोधपुछ गर्नुभयो र विवरण उपलब्ध गराउन निर्देशन दिनु भएको छ,’ उनले भने,‘मन्त्रीले सबै शाखा र विभागमा पुगेर सोधपुछ गर्नुभएको थियो ।’

प्रकाशित : पुस २६, २०७५ १४:२६
प्रतिक्रिया
पठाउनुहोस्

सिन्धुलीस्थित रामबहादुर बम्जनको आश्रमबाट दुईजना सोधपुछका लागि प्रहरी नियन्त्रणमा

राजकुमार कार्की

सिन्धुली — तपस्वी रामबहादुर बम्जनको सिन्धुलीस्थित आश्रमबाट सोधपुछका लागि प्रहरीले दुईजनालाई नियन्त्रणमा लिएको छ । बम्जन आश्रमबाट बेपत्ता भएका र बलत्कारको समेत आरोप लागेपछि सिन्धुपाल्चोक आश्रममा छानबिन पश्चात प्रहरी टोली यहाँ आइपुगेको हो । 

सिन्धुलीको कमलामाई नगरपालिका–८ को पैरेमा रहेको तपस्वी रामबहादुर वम्जनको आश्रमको भव्य घर । तस्बिर :राजकुमार कार्की/कान्तिपुर

प्रहरी नायब उपरीक्षक विमल कँडेलको नेतृत्वमा आइपुगेको टोलीले अनुसन्धानका लागि सिन्धुली प्रहरीको सहायतामा आश्रमका महात्मा गुरु भनिने मकवानपुरका इन्द्रबहादुर स्याङ्तान र सर्लाहीका गोपाल योञ्जनलाई नियन्त्रणमा लिएको हो।

कमलामाई नगरपालिका–८ को पैरेमा करिब ४२ बिगाहा जमीनमा बम्जनको आश्रम छ। २४ बिगाहा लालपुर्जा भएको र बाँकी सामुदायिक वनको जग्गा रहेको बताइएको छ। जिल्ला प्रहरी कार्यालयका प्रमुख रामेश्वर यादवका अनुसार केही सोधपुछका लागि दुईजनालाई नियन्त्रणमा लिइएको हो। विस्तृत विवरण सोधपुछपछि थाहा हुने उनको भनाइ छ।

बोधीधर्म श्रवण संघका केन्द्रीय सदस्य छत्र घिसिङका अनुसार प्रहरीले केही सोधपुछका लागि भनेर लगेको छ। प्रहरीले सिन्धुली आश्रममा छानबिन सुरु गरेसँगै त्यहाँ रहेका आनी तथा मेमेहरुमा (महिलालाई आनी तथा पुरुषहरुलाई मेमे भनिन्छ) कौतुहलता छाएको छ।

बोधीधर्म श्रवण संघका केन्द्रीय अध्यक्ष निलबहादुर थिङ्गका अनुसार तपस्वी बम्जन सिन्धुली आश्रममा नै रहेको र ठुलो क्षेत्र भएकाले कता बस्छन् भनेर आफूलाई समेत जानकारी नहुने बताए। उनले छानबिनमा आफूहरुले सघाउने समेत बताए। ठुलै शक्ति लागेर गुरुको बद्नाम गर्ने प्रपञ्च रचिएको र सबै कुरा समयले बाहिर ल्याउने उनको दाबी छ।

प्रकाशित : पुस २६, २०७५ १४:००
पूरा पढ्नुहोस्
प्रतिक्रिया
पठाउनुहोस्