विदेशी संस्थासँगको सेवा व्यापारबाट आर्जित रकम १५ दिनमै ल्याउन राष्ट्र बैंककाे निर्देशन
काठमाडौँ — विदेशी संस्थाहरूसँगको सेवा व्यापारबाट आर्जन हुने रकम उतै लुकाउने प्रवृत्ति निरुत्साहित गर्न राष्ट्र बैंकले एक निर्देशन जारी गरेको छ ।
ट्राभल एजेन्सी, ट्रेकिङ ऐजेन्सी, कार्गो कुरियर ऐजेन्ट, होटललगायत संस्थाहरूले विदेशी संस्थाहरूसँग कारोबार गरी त्यसबाट प्राप्त हुने आर्जन १५ दिनभित्र देशमा अनिवार्य ल्याइसक्नुपर्ने निर्देशन दिएको हो । ‘यससम्बन्धी विवरण हरेक त्रयमास समाप्त भएको १५ दिनभित्र नेपाल राष्ट्र बैंक विदेशी विनिमय व्यवस्थापन विभागमा पठाउनुपर्नेछ,’ राष्ट्र बैंकद्वारा जारी विज्ञप्तिमा भनिएको छ ।
राष्ट्र बैंकका अनुसार मुलुकले आर्जन गर्नुपर्ने विदेशी मुद्रा उतै राखी त्यसलाई अनौपचारिक अर्थतन्त्रका क्षेत्रहरूमा प्रयोग गर्ने र मुलुकको विदेशी विनिमय सञ्चितिसमेत कम हुने भएकाले यसलाई कडाइ गरिएको हो । ‘बाहिर कारोबार गरेर पैसा उतै राख्ने, नेपाल नल्याउने गुनासो आयो । यस आधारमा त्यस्ता कारोबार नियन्त्रण गर्न नीतिगत व्यवस्था गरिएको हो,’ विदेशी विनिमय विभाग प्रमुख भीष्मराज ढुंगानाले भने । सेवा क्षेत्रभन्दा बाहेकका व्यापार व्यवसायमा राष्ट्र बैंकले यसअघि नै विभिन्न प्रक्रिया, मापदण्ड र समाय सीमा निर्धारण गरी कडाइ गरिरहेको छ । खुकुलो मानिएको सेवा क्षेत्रको आम्दानी समेत नेपालमा समयमै भित्र्याउन कडाइ गरेको हो ।
‘अब तोकिएको समयभन्दा ढिलो रकम ल्याउने, जानकारी नदिने गरे कानुनअनुसार कारबाही हुन्छ,’ ढुंगानाले भने, ‘त्यसका लागि आधार तयार गर्न यो व्यवस्था गरिएको हो ।’ साथै शिक्षा, स्वास्थ्य र विदेशमा बस्दा प्रयोग गर्न ५ हजार अमेरिकी डलर (५ लाख ६० हजार रुपैयाँ) भन्दा बढी विदेशी मुद्रा माग गर्नेले स्थायी लेखा नम्बर (प्यान) नम्बर लिनुपर्ने भएको छ । यसअघि यस्तो व्यवस्था थिएन । ‘धेरै रकमको कारोबार गर्नेहरूलाई करको दायरामा ल्याउन यो व्यवस्था गरिएको हो,’ विदेशी विनिमय विभाग प्रमुख ढुंगानाले भने ।
प्रकाशित : माघ ८, २०७५ ०८:२६
