ओयो १५ सहरमा आउँदै

सजना बराल

(नयाँदिल्ली) — होटल सञ्जाल ‘ओयो रुम्स’ ले नेपालका १५ सहरमा विस्तार गर्ने भएको छ । काठमाडौं र पोखरामा सीमित ओयो होटल अबको दस महिनाभित्र अरू १५ सहरमा पुग्ने यसका संस्थापक रीतेश अग्रवालले बताए । हाल नेपालका पाँच सय वटा होटल आबद्ध रहेकामा अब एक हजार पुर्‍याउने लक्ष्य लिएको लोधी रोडस्थित इन्डिया हाबिटाट सेन्टरमा आयोजित कार्यक्रममा उनले बताए ।

नेपालका होटल उद्यमीहरू आकर्षक परियोजनासाथ आइरहेको उनले सुनाए । इन्टरनेट प्रयोगकर्ताको संख्या बढदो र ओयो एपमार्फत बुकिङ गर्नेहरू धेरै भएकाले अन्य सहरका होटलसँग सहकार्य गर्न चाहेको उनको भनाइ थियो । ‘ओयो होटल रोज्ने स्थानीय धेरै छन्,’ उनले भने, ‘हामी भारत र चीनमा पनि उपलब्ध भएकाले त्यहाँका मान्छे नेपाल जाँदा ओयोमै बस्ने सम्भावना पनि धेरै छ ।’ ओयो होटलका कोठाको मूल्य ९ सय ९९ रुपैयाँदेखि २ हजार रुपैयाँसम्म छ । हाल ४५ कर्मचारी नेपालमा छन् ।

Citizen


भारत तथा दक्षिण एसियाका लागि ओयोका प्रमुख कार्यकारी अधिकृत आदित्य घोषले पनि नेपालको पर्यटन वृद्धि र उद्यमशीलता विकासमा आफूहरूले सघाउन चाहेको उल्लेख गरे । ‘नेपालका होटल सञ्चालकसँग अद्भुत आइडिया छ,’ उनले भने, ‘तिनलाई आफूकहाँ कसरी ग्राहक भित्र्याउने र रिझाउने भन्नेबारे राम्रो ज्ञान छ । हामीले त्यहाँको प्राविधिक दक्षता बढाउन, तालिम दिन र सञ्जाल बढाउनमा मात्रै जोड दिए पुग्छ ।’

नेपालमा सन् २०१७ बाट सञ्चालन सुरु गरेको ओयोले काठमाडौं र पोखराका एक सयभन्दा बढी होटलका १ हजार ८ सय कोठामा सेवा दिइरहेको छ । ‘नेपाल हाम्रा लागि उपयुक्त बजार हो,’ घोषले भने, ‘आउँदो गर्मी महिनाभर १० हजार कोठा संख्या पुर्‍याउनेछौं ।’ उनले कुन कुन सहर भने टुंगो लागिनसकेको बताए । पहिलो पटक काठमाडौं जाँदा थुप्रै होटल खाली देखेको रीतेश सम्झन्छन् । सुन्दर स्थान भएर पनि राम्रो मर्मत (सम्भार नहुँदा ती छायाँमा परेको उनले ठाने । ओयोले यस्तै मध्यस्तरका होटलको पुनर्निर्माण, मर्मत अन्य सुधार गरेर आफ्नो मापदण्डमा ल्याउँछ । यसका प्रमुख विशेषतमा टीभी, सफा तन्ना, नि:शुल्क ब्रेकफास्ट, नि:शुल्क वाइफाई, टाइलेट्री किट आदि पर्छन् । ओयो एपमार्फत कोठा बुकिङ गर्न सकिन्छ ।

भारतमा १ हजार ४ सय करोड लगानी
ओयोले तीन सय दिनभित्र भारत र दक्षिण एसियामा १४ करोड भारु लगानी गर्ने घोषणा गरेको छ । ‘यो वर्षभित्र भारतका ६ सय ५० होटलका २० हजारभन्दा बढी कोठामा पुग्न चाहिरहेका छौं,’ ‘कलेक्सन ओ’ ब्रान्ड पनि सुरु गरेको पत्रकार सम्मेलनमा उनले भने, ‘भारतको ग्लोबल ब्रान्डका रूपमा विश्वका कुनाकुनामा देखिने अवसर छ हामीसँग छ ।’ भारतमा एक लाख रोजगारी सिर्जना गरेको रीतेशले बताए । सन् २०१३ मा एउटा होटलबाट सुरु गरिएको ओयो सञ्जाल अहिले विश्वको सातौं ठूलो होटल सञ्चालक सञ्जाल बनेको २५ वर्षे रीतेशले दाबी गरे । आफूहरू भारतको पहिलो र चीनमा चौथो ठूलो होटल ब्रान्ड रहेको उनको भनाइ थियो । यसको सञ्जाल जापान, इन्डोनेसिया, सिंगापुर, बेलायत, मलेसिया, फिलिपिन्स, श्रीलंकालगयात देशमा छ ।

प्रकाशित : चैत्र १, २०७५ १०:००
प्रतिक्रिया
पठाउनुहोस्

पूर्वाधारमा बिमा कम्पनी : लगानीको बाटो खुल्यो

कान्तिपुर संवाददाता

काठमाडौँ — बिमा कम्पनीले कृषि, पर्यटन, जलविद्युत्, घरजग्गालगायत पूर्वाधारमा लगानी गर्न पाउने भएका छन् । बिमा समितिले हालै जारी गरेको ‘बिमकको लगानी निर्देशिका २०७५’ मार्फत यस्तो व्यवस्था गरेको हो । यसअघि बिमा कम्पनीले सिधै पूर्वाधारमा लगानी गर्न नपाउने व्यवस्था थियो ।

नयाँ व्यवस्थाअनुसार कम्पनीले बढीमा २० प्रतिशतसम्म लगानी पूर्वाधार क्षेत्रमा गर्न पाउँछन् । एउटै परियोजनामा लगानी गर्नका लागि भने १० प्रतिशतको सीमा तोकिएको छ । यसमा कम्पनीले आह्वान गरेको कुल रकमको १० प्रतिशतभन्दा बढी लगानी गर्न पाइने छैन । लगानी गरिने कम्पनी पब्लिक कम्पनी हुनुपर्नेछ ।

स्पष्ट नीति नभएकै कारण बिमा कम्पनीसँग लगानीयोग्य पुँजी भए पनि वाणिज्य बैंक, विकास बैंकको मुद्दती निक्षेप र सरकारी ट्रेजरी बिल्समा लगानी गर्दै आएका थिए । समितिले पहिलो पटक बिमा कम्पनीका लागि लगानी निर्देशिका जारी गरेको हो । यसअघि जारी लगानी नीतिमा बिमा कम्पनीको लगानीसम्बन्धी साँघुरो व्यवस्था थियो । यसकारण बिमा कम्पनीले पूर्वाधारलगायत विविध क्षेत्रमा लगानी गर्न पाउनुपर्ने माग गरेका थिए ।

मुद्रा र पुँजी बजारको विकासका लागि सुझाव दिन डेपुटी गभर्नर शिवराज श्रेष्ठको संयोजकत्वमा गठित समितिले पनि बिमा कम्पनीको लगानी दायरा फराकिलो बनाउन सुझाव दिएको थियो । त्यसपछि सुझाव कार्यान्वयनका लागि सरकारले बिमा समितिलाई निर्देशन दियो । सोही निर्देशनअनुसार बिमा समितिले लगानी निर्देशिका जारी गरेको हो ।

नयाँ व्यवस्थाअनुसार बिमा कम्पनीले घरजग्गा व्यवसायमा पनि लगानी गर्न पाउने छन् । कुल टेक्निकल रिजर्भ (कम्पनीको सबै दायित्व समावेश गरी गणना गरिएको बचत) को बढीमा ५ प्रतिशतसम्म घरजग्गा व्यवसायमा लगानी गर्न पाउने व्यवस्था निर्देशिकामा छ । निर्देशिकामा जीवन र निर्जीवन बिमा कम्पनीलाई क्षेत्रगत रूपमा लगानी गर्न पाउने सीमा पनि तोकिएको छ ।

त्यसो त कम्पनीले निर्देशिकामा क्षेत्रगत रूपमा तोकिएको सीमाभन्दा बढी पनि लगानी गर्न पाउँछन् । त्यसका लागि तोकिएको मापदण्डसहित समितिबाट पूर्वस्वीकृति लिनुपर्छ । घरजग्गा व्यवसायमा रहेको लगानीलाई कम्तीमा हरेक तीन वर्षमा एकपटक र अन्य क्षेत्रमा गरेको लगानीलाई प्रत्येक दिन मूल्यांकन गर्नुपर्ने व्यवस्था निर्देशिकामा छ ।

बिमा कम्पनीहरूको लगानी दायरा विस्तार गरेर निकै राम्रो काम भएको नेपाल लाइफ इन्स्योरेन्सक कम्पनीका प्रमुख कार्यकारी अधिकृत विवेक झाले बताए । ‘यसअघि लगानीका लागि धेरै विकल्प थिएन,’ उनले भने, ‘अहिले धेरै विकल्प दिइएको छ । यसले सही दिशामा बिमा कम्पनीको लगानी विस्तार गर्न मद्दत गर्छ ।’

नयाँ व्यवस्थाअनुसार बिमा कम्पनीले वाणिज्य बैंकको मुद्दती निक्षेपमा ४० प्रतिशतसम्म लगानी गर्न पाउँछ । ‘वाणिज्य बैंक र नेपाल पूर्वाधार बैंकको मुद्दती निक्षेपमा कुल टेक्निकल रिजर्भको ४० प्रतिशतसम्म लगानी गर्न सकिनेछ,’ निर्देशिकामा उल्लेख छ । बैंकमा मुद्दती निक्षेपमा बचत गर्न सम्बन्धित बैंक स्थापना भएको ५ वर्ष पूरा भएको र पछिल्ला तीन वर्षसम्म नाफामा गएको हुनुपर्नेछ । यसरी निक्षेप गर्दा एउटा बैंकमा अधिकतम १५ प्रतिशतसम्म मात्र बचत गर्न सकिनेछ । यस्तै विकास बैंकको मुद्दती निक्षेपमा २० प्रतिशत र वित्त कम्पनीको मुद्दती निक्षेपमा १० प्रतिशत बचत गर्न पाइने व्यवस्था निर्देशिकामा छ ।

यसैगरी बिमा कम्पनीलाई कुल टेक्निकल रिजर्भको १० प्रतिशतसम्म पब्लिक कम्पनीको सेयरमा लगानी गर्न छुट दिइएको छ । सेयर लगानी गरिने कम्पनीको चुक्ता पुँजीको ५ प्रतिशतभन्दा बढी हुन नहुने व्यवस्था छ ।

यस्तै बैंक तथा वित्तीय संस्थाको अग्राधिकार सेयर, डिबेन्चरका साथै सरकार, राष्ट्र बैंक तथा सरकारबाट मान्यता प्राप्त बचतपत्र वा ऋणपत्रमा पनि बिमा कम्पनीलाई लगानी छुट दिइएको छ । बिमा कम्पनीले कुल लगानीको बढीमा ५ प्रतिशत सामूहिक लगानी कोषको एकाइमा लगाउन सक्ने सुविधा पनि निर्देशिकामा दिइएको छ ।

प्रकाशित : चैत्र १, २०७५ ०९:५८
पूरा पढ्नुहोस्
प्रतिक्रिया
पठाउनुहोस्