कागती बेचेरै ३७ रोपनी जग्गा

कान्तिपुर संवाददाता

जाजरकोट — छेडागाड नगरपालिका १० काफ्लाका ३३ वर्षीय गगनबहादुर बुढा कागती बेचेरै वार्षिक १० लाख रुपैयाँ आम्दानी गरिरहेका छन् । स्थानीय बजारमा कागती (दाना) ५० रुपैयाँ प्रतिकिलो र रस १५० रुपैयाँ प्रतिलिटरमा बिक्री भइरहेको छ । 

उनी दाना र रस बिक्रीका लागि विभिन्न बजार धाउँछन् । ड्रम र बोतलमा कागतीको रस र दाना लिएर नेपालगन्ज, सुर्खेत, खलंगा, चौरजहारी, छिन्चु, सल्लीबजारलगायत बजारमा पुग्ने गरेका छन् । बुढाले उत्पादन गरेको कागती बजारमा पुग्न नपाउँदै उपभोक्ताले खोसाखोस गर्छन् । २० वर्षदेखि छेडागाड १० गाम्कामा कागती खेती गरेरै उनले आर्थिक अवस्था सुधारेका छन् ।

नेपालगन्ज, सुर्खेतलगायत बजारमा कागती प्रतिकिलो एक सय र रस प्रतिलिटरको दुई सय रुपैयाँमा बिक्री गर्ने गरेको बुढाले बताए । उनले परम्परागत काठको कोलबाट कागती रस निकाल्ने गरेका छन् । बुढाले कागतीको अचार र बिरुवा पनि बिक्री वितरण गर्दै आएका छन् ।

प्रतिकिलो कागती अचार एक सय र प्रतिबिरुवा २५ रुपैयाँमा बिक्री हुनेगरेको उनको भनाइ छ । बुढाले६० रोपनी जग्गामा कागती खेती गरिरहेका छन् ।

उनको बगैंचामा भएका १ हजार ७ सय कागतीका बिरुवामध्ये सात सयले फल दिन्छन् । बुढाले वार्षिक रूपमा २५ हजार कागतीका बिरुवा उत्पादन गरेर बिक्री गर्ने गरेका छन् । प्रत्येक वर्ष चार हजार लिटर कागती रस बेच्दै आएको बुढाले जानकारी दिए । ‘गर्मी सिजनमा कागतीको रसको माग बढी छ,’ उनले भने, ‘आधुनिक प्रविधि तथा साधनको अभावले रस निकाल्न कठिनाइ हुने गरेको छ ।’ कागती रस बिक्री गरेरै ३७ रोपनी जग्गा जोड्न सफल भएको उनी बताउँछन् ।

प्रकाशित : वैशाख १, २०७६ ०८:३३
प्रतिक्रिया
पठाउनुहोस्
ADVERTISEMENT
ADVERTISEMENT

भ्रमण वर्ष–२०२० शुभारम्भ : २० लाख पर्यटक भित्र्याइने

कान्तिपुर संवाददाता

लेखनाथ — बीस लाख पर्यटन भित्र्याउने उद्देश्यसहित सरकारले घोषणा गरेको ‘नेपाल भ्रमण वर्ष २०२०’ शुभारम्भ शनिबार पोखराबाट गरिएको छ । गण्डकी प्रदेशका मुख्यमन्त्री पृथ्वीसुब्बा गुरुङले भ्रमण वर्ष शुभारम्भ गरे । 

पश्चिमाञ्चल होटल संघले लेकसाइडको कोमागाने पार्कमा गरिरहेको १६ औं नववर्ष फेवा महोत्सवकै कार्यक्रमस्थलबाट भ्रमण वर्ष शुभारम्भ गरिएको हो । कार्यक्रममा मुख्यमन्त्री गुरुङले संघीय सरकारको योजनालाई साथ दिन तत्पर रहेको बताए ।

पर्यटनमा हाल गण्डकीको ४० प्रतिशत योगदान रहेको बताउँदै उनले सोही मात्रामा पर्यटक भित्र्याउन योजना बनाइरहेको उनले जनाए । ‘गण्डकीले सन् २०१९ लाई आन्तरिक पर्यटन वर्ष, २०२० लाई छिमेकी मुलुकका पर्यटक भित्र्याउने वर्ष र २०२२ मा २० लाख पर्यटक भित्र्याउने वर्षका रुपमा मनाउँदै छौं,’ उनले भने, ‘प्रदेशको पहिलोप्राथमिकता क्रममा पर्यटन नै छ ।’

आन्तरिक र बाहय गरी १० लाख पर्यटक अहिले पनि भित्रिइरहेको जनाउँदै उनले आगामी २ वर्षभित्र १० लाख विदेशी पर्यटक भित्र्याउनैपर्ने दबाब रहेको उल्लेख गरे । गण्डकीका उद्योग, पर्यटन, वन तथा वातावरणमन्त्री विकास लम्सालले पर्यटकीय पूर्वाधार विकासमा मुख्य जोड दिनुपर्ने बताए । पर्यटनमा चिनियाँ लगानी भित्र्याउन लगानीकर्ताले चासो व्यक्त गरिरहेको उनले सुनाए ।

भ्रमण वर्षका राष्ट्रिय कार्यक्रम संयोजक सुरज वैद्यले पोखरामै पर्यटन लगानी सम्मेलन गर्ने तयारी भइरहेको बताए । उनले भ्रमण वर्षकै सन्दर्भमा नेपाल, भारत र चीनका एक/एक महिलाले सगरमाथा आरोहणको तयारी गरिरहेको जनाए । ‘भ्रमण वर्षको काम सुरु भइसकेको छ,’ उनले भने, ‘अब नयाँ रोजगारी र लगानी थपिँदै जानेछन् ।’ पर्यटनमा योगदान दिने ठूलादेखि साना व्यवसायीलाई ‘नेपाल पर्यटन अवार्ड’ बाट सम्मान गर्ने योजना पनि उनले सुनाए । त्रिभुवन अन्तर्राष्ट्रिय विमानस्थलमा दुई वाइडबडी र दुई न्यारो बडी जहाज पार्किङस्थल बनेपछि आकाशमा होल्ड हुनुपर्नेअवस्था अन्त्य हुने उनी बताउँछन् ।

पर्यटन सचिव मोहनकृष्ण सापकोटाले नेपालको आर्थिक उन्नति र प्रगतिमा भ्रमण वर्षले सहयोग पुर्‍याउने बताए । ‘२० को अन्त्यसम्म २० लाख र २५ को अन्त्यसम्म २५ लाख विदेशी पर्यटक भित्र्याउने सरकारको लक्ष्य छ,’ उनले भने, ‘राजस्वमा ७० अर्ब रुपैयाँको योगदानलाई दोब्बर बनाउने र १० लाख रोजगारी सिर्जना गर्ने यसको उद्देश्य हो ।’ पर्यटनमा खपत हुने वस्तु गाउँमै उत्पादन गरेर अर्थतन्त्रलाई स्वावलम्बन बनाउने सरकारको योजना रहेको उनले सुनाए ।

भ्रमण वर्ष २०११ का संयोजक योगन्द्र शाक्यले नेपालको पर्यटन नीतिले पर्यटकबाट लिन मात्रै सिकाएकाले पर्यटकलाई के दिने भन्ने विषयमा सोच्नुपर्ने सुझाव राखे । पर्यटन बोर्डका कार्यकारी सदस्य विप्लव पौडेलले मुस्ताङबाट चीन जोड्ने कोरला नाका खोल्न सके पर्यटनमाकोसेढुंगा साबित हुने उल्लेख गरे ।

प्रकाशित : वैशाख १, २०७६ ०८:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT