नयाँ वर्षमा सौराहा भरिभराउ

'सौराहामा ६ हजार र चितवन निकुञ्ज आसपासका होटलमा समेत गरेर १२ हजारको हाराहारीमा शय्या छन् । अरू बेलामा ८० प्रतिशतसम्म कोठा भरिएका हुन्छन् । नयाँ वर्षमा कोठा नपाएर पर्यटक फर्कन्छन् ।’
रमेशकुमार पौडेल

चितवन — नयाँ वर्षको पहिलो दिन आइतबार बिहान कमल आचार्य ५ बजे नै बिउँझिए । काठमाडौंबाट शनिबार आएर सौराहा बसेका उनी आइतबार बिहान ६ बजे हात्ती चढेर जंगल घुम्न गइसकेका थिए । शनिबार सौराहा निकै भरिभराउ थियो ।

चितवन निकुञ्जको सौराहा नजिक बूढी राप्ती खोलामा डुंगा चढेका पर्यटक । निकुञ्ज आउने पर्यटक डुंगा चढेर रमाउने गर्छन् । तस्बिर : कान्तिपुर

कोठा नपाइएला भनेर उनले पाँच दिनअघि नै बुक गरेका रहेछन् । पर्यटकको चाप धेरै भएका कारण बिहान एक घण्टाअगावै हात्ती सफारी सुरु भएको थियो ।

Citizen

‘शनिबार हामीले यहाँ कोठा छैन भन्ने सूचनाबोर्ड नै होटल अगाडि राख्नुपर्‍यो,’ पर्यटकीय होटलहरूको संस्था क्षेत्रीय होटल संघ चितवन सौराहाका अध्यक्ष सुमन घिमिरेले भने । पर्यटकहरू सौराहा आएर चितवन निकुञ्ज र यस आसपासका मध्यवर्ती सामुदायिक वन घुम्छन् । यहाँ आउने प्रायः पर्यटकले हात्ती सफारी गर्छन् । पर्यटकको चाप बढेपछि हात्ती सफारीको व्यवस्थापन गर्न कर्मचारीलाई धपेडी थियो ।

‘हिजो शनिबार लगभग पाँच सयजनाले हात्ती सफारी गरे । आज पनि त्यत्तिले नै गर्ने सम्भावना छ । त्यसैले बिहान ५ बजे नै आएर फिल्डमा खटेको छु,’ बाघमारा सामुदायिक वनमा हात्ती सफारी गराउने युनाइटेड हात्ती सहकारीका कर्मचारी रुमन चौधरीले भने । अरू बेला सयदेखि अढाइ सयसम्मले हात्ती चढ्ने गर्छन् । दसैंका बेला र त्यसपछि अंग्रेजी र नेपाली नयाँ वर्षमा पर्यटकको चाप हवात्तै बढ्ने उनले बताए ।

हात्ती सफारीमा मात्रै नभएर राप्ती नदीमा डुंगा चढ्ने र जिप चढेर सामुदायिक वन तथा निकुञ्ज घुम्नेको चाप पनि अत्यधिक नै देखियो । सौराहामा मात्रै नभएर निकुञ्जसँग जोडिएका चितवनका हरेक पर्यटकीय क्षेत्रका होटलहरू भरिएका थिए । पश्चिम क्षेत्र पटिहानी जगतपुरमा रहेको जंगल भिल्ला होटलका सञ्चालक गणेश पौडेलले आफ्नो होटलका सबै कोठा भरिएको बताउँछन् ।
‘मेरो होटलमा ६० शय्या छन् । शनिबार कुनै खाली रहेनन् । पाँच–छजनाबाहेक सबै नेपाली हुन् । चितवनका पनि बसेका थिए । बुटवल, भैरहवा, पोखरा, वीरगन्जदेखिका आएर बसेका थिए,’ पौडेलले भने ।

मेघौलीको होटल साराङका सञ्चालक सुबोध प्रधान पनि नयाँ वर्षमा पर्यटकहरू राम्रै आएको बताउँछन् । क्षेत्रीय होटल संघ चितवन सौराहाका महासचिव राममणि खनाल बस्ने कोठा नपाएर पर्यटकहरू फर्केकोसमेत बताउँछन् ।

‘शुक्रबार शनिबारको मेसो पनि पर्‍यो । नयाँ वर्षको अवसर पनि भयो । बालबच्चाको परीक्षापछि स्कुल पनि बिदा भएकाले यो बेला धेरैजसो परिवारसहित घुम्न आउँछन्,’ महासचिव खनालले भने । काठमाडौं सातदोबाटोबाट आएका कमल आचार्य पनि बच्चासहित छजना निकुञ्ज घुम्न आएका थिए ।

सौराहामा मात्रै ६ हजार पर्यटक धान्ने होटलको क्षमता छ । ‘सौराहा र चितवन निकुञ्ज आसपासका होटलहरूमा १२ हजारको हाराहारीमा पर्यटक सुत्न बस्न सक्छन् । अरू बेलामा बढीमा ८० प्रतिशतसम्म कोठा भरिएका हुन्छन् । नयाँ वर्षमा कोठा नपाएर पर्यटक फर्कन्छन्,’ अध्यक्ष घिमिरेले भने । उनका अनुसार नयाँ वर्षका दुई–तीन रात होटलहरूमा ८० प्रतिशतसम्म नेपाली बसेका हुन्छन् । अरू बेला ४० प्रतिशतसम्म हो ।

चितवन निकुञ्ज घुम्न वर्षमा दुई लाखको हराहारीमा देशविदेशका पर्यटकहरू आउने गर्छन् । जसमध्ये ९० प्रतिशत सौराहा पुग्छन् । सौराहाका होटलमा बास बसेर पर्यटकहरू निकुञ्ज घुम्छन् ।

हात्ती सफारी गर्दा जनावरहरू भने देख्न नपाएको पर्यटकहरूको गुनासो छ । परिवारसहित आएका कलमलले डेढ घण्टा हात्तीमा घुम्दा वन कुखुरा र मृगहरू मात्रै देखे । हात्तीमा घुम्दा उनले यहाँको आकर्षण दुर्लभ वन्यजन्तु एकसिंगे गैंडा देखेनन् । ‘टाढाटाढाबाट समय र पैसा खर्च गरेर आई हात्ती चढेर डुल्दा हेर्न खोजेको कुराहरू देखिँदैनन् । घुमाउने समय पनि कम भयो कि ? समय कम भएपछि सजिलो बाटो घुमाएर फर्कनै हतार गरेजस्तो लाग्छ,’ कमलले भने ।

प्रकाशित : वैशाख २, २०७६ ०८:४२
ADVERTISEMENT
प्रतिक्रिया
पठाउनुहोस्
ADVERTISEMENT

धरान—चतरा–हेटौंडा सडक : २९ किलोमिटर पिच

प्रताप विष्ट

हेटौंडा — झन्डै ३१८ किमि लामो धरान–चतरा–हेटौंडा सडकको निर्माण कार्य तीव्रगतिमा भइरहेको छ । उक्त सडकको पश्चिमी क्षेत्रतर्फ १७ किलोमिटर कालोपत्रे भइसकेको छ । पूर्वी खण्डमा १२ किलोमिटर कालोपत्रे भएको छ । पश्चिमी क्षेत्रका ३३ वटा पुलमध्ये १७ वटा निर्माण भइसकेका छन् । १६ वटा निर्माणाधीन अवस्थामा छन् ।

सिन्धुलीको हरिहरपुर गाउँपालिकाको तीनकुने खोलामा निर्माणाधीन पुल । तस्बिर : प्रताप/कान्तिपुर

‘सडकतर्फ ४२ प्रतिशत र पुलतर्फ ६८ प्रतिशत काम सकिसकेको छ,’ धरान–चतरा–हेटौंडा आयोजना प्रमुख राजेशप्रसाद पौडेलले भने, ‘तोकिएको समयमा नै पुल र सडकको काम सक्नेछौं ।’

सुनसरी, उदयपुर, सिन्धुली र मकवानपुरका भित्री उपत्यकाहरू जोडदै पूर्व–पश्चिम राजमार्गको वैकल्पिक मार्गका रूपमा हेरिएको सडकको दुवै खण्डमा करिब ५५ प्रतिशत काम सम्पन्न भइसकेको आयोजनाले जनाएको छ । सडकको तुलनामा पुल निर्माणको कार्यले तीव्रता पाएको छ । राजमार्गको पूर्व र पश्चिम गरी दुई खण्डमा विभाजन गरेर काम भइरहेको छ ।

आयोजनाका पश्चिम खण्डका इन्जिनियर केशव ओझाका अनुसार सिन्धुलीको कमलामाई नगरपालिकाको भीमानदेखि मकवानपुरको हेटौंडा उपमहानगरपालिका ६ चौघडासम्मको कुल ११५ किलोमिटर सडकमा धमाधम काम भइरहेको छ ।

हेटौंडा उपमहानगरपालिका ६ चौघडादेखि गौरीटारसम्म करिब २ किलोमिटर सडकमा काम हुन सकेको छैन । उच्च अदालत पाटनको हेटौंडा इजलासले सडक विस्तार नगर्न अन्तरिम आदेश जारी गरेर काम रोकेको छ । स्थानीयवासीले घर टहराको क्षतिपूर्ति मात्र होइन, जमिनको पनि मुआब्जा पाउनुपर्ने माग राख्दै अदालतमा रिट निवदेन दर्ता गराएका थिए ।

राजमार्गको पूर्वी खण्डका इन्जिनियर गोविन्द दुमरूले ४६ वटा पुलमध्ये २३ वटा निर्माण सम्पन्न भइकसकेको जानकारी दिए । धरान–चतरा(गाईघाट–सिन्धुली–हेटौंडा सडकको ट्र्याक ओपन गर्ने कार्य गत वर्षमा नै सम्पन्न भइसकेको थियो । सरकारले यो सडकलाई मदन भण्डारी राजमार्गअन्तर्गत राखेको छ । मदन भण्डारी राजमार्गलाई इलामदेखि डडेलधुरासम्म तोकिएको छ । उक्त सडकलाई प्राथमिकताको आयोजनामा राखेर चालु आवका निम्ति ३ अर्ब रुपैयाँ विनियोजित गरेको छ ।

उक्त सडकको पश्चिमी खण्डतर्फ ३३ वटा पुल निर्माण गर्नुपर्छ भनेपूर्वी खण्डमा ४६ वटा पुल निर्माण गर्नुपर्छ । यस आयोजनमा ७९ वटा पुल निर्माण गर्नुपर्छ । ‘आगामी १८ महिनाभित्र धरान–चतराको सडक कालोपत्रे गर्ने योजना रहेको छ,’ आयोजना प्रमुख पौडेलले भने, ‘यो सडकको निर्माणका निम्ति सरकारले उच्च प्राथमिकता दिएका कारण डेढ वर्षभित्र सडकमा सवारी साधन गुड्न थाल्नेछन् ।’

आव २०६४/२०६५ देखि सुरु भएको उक्त योजनामा सरकारले बर्सेनि ८ करोडदेखि २५ करोड रुपैयाँसम्म बजेट विनियोजन गर्दै आएको थियो । यो सडकले भित्री मधेसका चार जिल्ला मकवानपुर–सिन्धुली–उदयपुर र सुनसरीका करिब ५० लाख बासिन्दालाई प्रत्यक्ष लाभ पुर्‍याउनेछ ।

धरान–चतरा सडक मकवानपुरमा ४९ किमि, सिन्धुलीमा १ सय ४० किमि, उदयपुरमा ११० किमि र सुनसरीमा १८ किलोमिटर पर्छ ।

प्रकाशित : वैशाख २, २०७६ ०८:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT