निमालाई कान्तिपुरको १ लाख

कान्तिपुर संवाददाता

काठमाडौँ — कान्तिपुरको वार्षिक ग्राहक योजनाअन्तर्गत ‘करोडपति सिजन–३’ को पहिलो साप्ताहिक विजेता निमा राजभण्डारीलाई १ लाख रुपैयाँ हस्तान्तरण गरिएको छ । बुधबार थापाथलीस्थित कान्तिपुर पब्लिकेन्सन्सको कार्यालयमा नेपाल म्यागजिनका सम्पादक बसन्त बस्नेतले राजभण्डारीलाई नगद हस्तान्तरण गरेका थिए । 

निमा राजभण्डारीलाई १ लाख रुपैयाँ हस्तान्तरण गर्दै नेपाल साप्ताहिकका सम्पादक बसन्त बस्नेत । तस्बिर : कान्तिपुर

नागार्जुन नगरपालिका सीतापाइला निवासी राजभण्डारीले नगद पुरस्कार जितेकामा खुसी व्यक्त गरिन् । यो रकमको २५ प्रतिशत गोल्फुटारस्थित डिभाइन सर्भिस वृद्धाश्रमलाई प्रदान गर्ने उनले बताइन् । ‘जिन्दगीमा पहिलो पटक मलाई चिठ्ठा परेको हो,’ उनले भनिन्, ‘अप्रिल पहिलो दिन कान्तिपुरबाट फोन आउँदा कसैले अप्रिल फुल बनाएको हो कि झैं लागेको थियो । दीन–दुःखीलाई सहयोग गर्न चाहन्छु ।’

केहीअघि गरिएको ‘लक्की ड्र’ बाट रसिद नम्बर ४१३०० की उनले उपहार स्वरूप एक लाख रुपैयाँ जितेकी हुन् । उनी इन्टरनेसनल किन्डरगार्डेन प्रि–स्कुलकी अवकाशप्राप्त शिक्षिका हुन् । उनले कान्तिपुर स्थापनाकालदेखि नै यसको ग्राहक रहँदै आएको बताइन् । ‘कान्तिपुरका समाचार विश्वसनीय हुन्छन्,’ उनले भनिन्, ‘गृहिणीका लागि अझ सरल भाषामा स्वास्थ, शिक्षा आदिबारे लेख छापिदिए अझ राम्रो हुने थियो ।’

हरेक साता आइतबार कान्तिपुर टेलिभिजनको ‘कल कान्तिपुर’ कार्यक्रममा ‘लक्की ड्र’ हुने गरेको छ । कान्तिपुर वार्षिक ग्राहक योजनामा कान्तिपुर दैनिक र द काठमाडू पोस्टका वार्षिक ग्राहकले सहभागिता जनाउन पाउनेछन् । लक्की ड्रमार्फत एक जना ग्राहककले बम्पर उपहारका रूपमा एक करोड नगद पाउनेछन् ।

‘लक्की ड्र’ मार्फत मासिक १० लाख रुपैयाँ जित्न सक्नेछन् । साप्ताहिक ‘लक्की ड्र’ मा १ लाख रुपैयाँ पाउनेछन् । ग्राहक बन्नसाथ हातहातै पुरस्कार पाउने सुविधासमेत छ ।

प्रकाशित : वैशाख ५, २०७६ ०९:१९
प्रतिक्रिया
पठाउनुहोस्

व्यापारिक केन्द्र बन्दै माछाखोला

हरिराम उप्रेती

गोरखा — उत्तरी गोरखाको प्रवेशद्वार हो धार्चे गाउँपालिका ५ को माछाखोला । ट्र्याक खुलेर गाडी चलेपछि यो ठाउँ व्यापारिक केन्द्र बन्दै गएको छ । होटल खुल्ने क्रम बढ्दो छ । घरघरै खुद्रा र थोक किराना पसल खुलेका छन् ।



माछाखोला व्यापारिक केन्द्र बन्दै जाँदा धार्चे मात्र नभई चुमनुब्री गाउँपालिकाका सातवटै वडाका बासिन्दालाई किनमेल सजिलो भएको छ । माछाखोलासम्म गाडी चलेपछि उत्तरी गोरखाका बासिन्दाको पैदल दूरी छोट्टिएको छ ।

यसअघि सोतीबाट दैनिक उपभोग्य सामग्री खच्चडमा बोकाएर ढुवानी गर्नेहरू हिजोआज माछाखोलाबाटै कारोबार गर्छन् । तिब्बतको सिमाना लार्के जोड्ने सडकको ट्र्याक खोल्ने क्रममा माछाखोलासम्मको खण्डमा गत पुसबाट गाडी चल्न थालेको गाउँपालिका अध्यक्ष सन्तोष गुरुङले बताए । स्थानीय तह निर्वाचनको बेला गुम्दामा रहेको गाउँपालिका केन्द्र जनप्रतिनिधिकै जोडबलमा माछाखोला सरेको छ ।

‘चुनावका बेला भोट माग्दा सबैलाई पायक पर्ने ठाउँमा केन्द्र राख्छौं भनेका थियौं,’ उनले भने, ‘त्यही प्रतिबद्घता पूरा गर्न माछाखोला केन्द्र भयो ।’ बारपाक, लाप्राक र गुम्दासम्मका बासिन्दालाई सुविधाका लागि माछाखोलाबाट गुम्दाको लप्सीबोटसम्म ट्र्याक खन्न सुरु भएको उनले बताए । वैशाखभित्रै यहाँ बैंक स्थापना हुने गाउँपालिकालेजनाएको छ ।

तल्लो क्षेत्रबाट जाने र चुमनुब्री गाउँपालिकाको सामागाउँ, छेकम्पार, चुम्चेत, विही, सिर्दिबास, ल्हो, प्रोकबाट तल्लो क्षेत्र झर्ने स्थानीय र पर्यटक पैदल यात्रा गर्दा माछाखोला बास बस्न आइपुग्ने गरेका छन् ।

व्यवस्थापन योजना
व्यापारिक गतिविधि बढेर व्यस्त बनेको बजारलाई अव्यवस्थित हुन नदिन तीन साताअघि स्थानीयको भेला भएको थियो । उक्त भेलाले कान्छा गुरुङको अध्यक्षतामा १७ सदस्यीय माछाखोला बजार व्यवस्थापन तथा संरक्षण समिति गठनसँगै बजार क्षेत्रलाई व्यवस्थित बनाउन योजना तयार पारेको छ ।

बजारभित्र खच्चड बास बसाउन रोक लगाइएको छ । खच्चड हिँड्न बगरबाट वैकल्पिक बाटो बनाइएको छ । ‘खच्चड हिँड्दा धेरै फोहोर गर्छ । करेसाबारी पनि नष्ट गर्छ, तल्लो र माथिल्लो बजारमा खच्चड बास बसाउन रोक लगाउने निर्णयगरेका छौं,’ गुरुङले भने, ‘माछाखोलाको बगरमा बास बसाउने व्यवस्था मिलाएका छौं ।’

बूढीगण्डकीको कटानबाट बजार जोगाउन ग्याभिन वाल राख्न पहल गर्ने समितिका अध्यक्ष गुरुङले बताए । ‘माछाखोला र बूढीगण्डकी नजिकै बस्ती रहेकाले बाढी पहिराको डर छ,’ उनले भने, ‘सिमेन्टको पक्की पर्खाल उठाएर बस्ती जोगाउँछौं ।’ प्राविधिक ल्याएर कटान हुन सक्ने सम्भावित क्षेत्रको अध्ययन गराउने तयारी छ । पहिराबाट बजारलाई जोगाउन माथिको थास्कु पाखामा वृक्षरोपणको योजना पनि छ ।

बजारलाई प्लास्टिकमुक्त क्षेत्र बनाउन अभियान सञ्चालन गर्ने पनि भेलामा सहमति भएको छ । उनले भने, ‘दुई–चारवटा फोहोर फाल्नेखाल्डा खनेर डस्टविन राख्न सके बजार सफा देखिन्छ ।’

तिब्बतको सिमाना लार्के जोड्ने सडकको ट्र्याक खोल्ने क्रममा माछाखोलासम्म चल्ने बोलेरो र ट्रकले यात्रुसँग मनलाग्दी भाडा असुलेपछि समितिले नियन्त्रणको प्रयास पनि थालेको छ । ‘सोतीबाट माछाखोलासम्म ट्रकले जनही तीन सय, जिपले पाँच सय लिने गरेको गुनासो बढ्यो,’ उनले भने, ‘अब ट्रकलाई सय, जिपलाई २ सय ५० मात्र लिन भनेका छौं ।’

व्यवस्थित पार्किङका लागि बसपार्क बनाउने पनि योजना छ । उत्तरी क्षेत्रको व्यापारिक केन्द्र भएकाले हाटबजार सञ्चालन गर्न पनि पहल भइरहेको छ । ‘यहाँ नजिकै सय डेढ सय रोपनी जग्गा छ । त्यहाँ ट्रस हालेर हाटबजार चलाउन सके यहाँ उत्पादन भएका कृषि उपजले मार्केट पाउँछ,’ उनले भने ।

प्रकाशित : वैशाख ५, २०७६ ०९:१८
पूरा पढ्नुहोस्
प्रतिक्रिया
पठाउनुहोस्